Na vosa “Vunau Koula” e sega ni volai ena iVolatabu. Ia e levu era vakayagataka na vosa qo, mera vakaibalebaletaka na ivakarau ni bula a vakavulica o Jisu. E kaya o Jisu ena nona Vunau ena Ulunivanua: “Na ka kece dou vinakata mera cakava vei kemudou na tamata, dou cakava tale ga vei ira.” (Maciu 7:12; Luke 6:31) E dau vakamacalataki tale ga va qo na Vunau Koula: “Cakava vei ira eso tale, na ka o vinakata me caka vei iko.”—Encyclopedia of Philosophy.

•  Cava na ibalebale ni Vunau Koula?

•  Cava e yaga kina na Vunau Koula?

•  Vakacava eda muria ga na Vunau Koula meda rawaka kina vei ira eso tale?

•  O na muria vakacava na Vunau Koula?

 Na Vunau Koula, e uqeti keda meda cakava vei ira eso tale na ka eda vinakata me caka vei keda. Kena ivakaraitaki, levu era dau marautaka nira dokai, kauaitaki ra qai lomani. Koya gona, ‘meda cakava tale ga’ qori vei ira eso tale.—Luke 6:31.

 Eda rawa ni muria na Vunau Koula ena ivakarau ni noda bula kece. Kena ivakaraitaki, e rawa ni . . .

•   Dei kina na vakawati.—Efeso 5:28, 33.

•   Vukei ira na itubutubu ena nodra tuberi na gone.—Efeso 6:4.

•   Ra veimaliwai vinaka kina na veitokani, tiko veitikivi, kei ira na cakacaka vata.—Vosa Vakaibalebale 3:27, 28; Kolosa 3:13.

 Eda rawa ni raica tale ga e levu na ivakavuvuli ni Vunau Koula ena iVolatabu ena Veiyalayalati Makawa. Na ka e vakavuvulitaka qo o Jisu, e vakabibitaki “ena Lawa [na imatai ni lima na ivola ena iVolatabu] kei na ka era vola na Parofita [na ivola vakaparofisai].” (Maciu 7:12) Kena ibalebale, na Vunau Koula e okati kina na ka dina ena Veiyalayalati Makawa: lomani ira na kainoda.—Roma 13:8-10.

 Sega. E vakabibitaki ena Vunau Koula na noda dausoli ka. Ni tukuna o Jisu na Vunau Koula, e vakavulica meda lomani ira na tamata kece ga, wili kina o ira na keda na meca. (Luke 6:27-31, 35) E uqeti keda gona na Vunau Koula, meda caka vinaka vei ira kece na tamata.

1.  1. Dau veikauaitaki. Kauaitaki ira oni tiko veitikivi. Kena ivakaraitaki, ke o raica e dua e levu nona iyaya ni volivoli, o rogoca e dua e curu i valenibula, se yalolailai e dua drau cakacaka vata. Ni o “kauaitaka na ka . . . e baleti ira eso tale,” o na kila kina na ka mo kaya se cakava mo rawa ni veivuke kina.—Filipai 2:4.

2.  2. Dau veinanumi. Biuti iko ena kena ituvaki e dua e sotava tu na ituvaki dredre. Cava o na vakila ena ituvaki qori? (Roma 12:15) Qori ena uqeti iko mo vukei ira.

3.  3. Dau yalorawarawa. Eda duidui kece. Na ka era vinakata eso tale me caka vei ira, ena rairai duidui mai na ka o vinakata mera cakava vei iko. Koya gona, mai na levu na sala o rawa ni vukei ira kina, cakava na ka era na marautaka vakalevu.—1 Korinica 10:24.