E sega ni vakaibalebaletaka na iVolatabu na “vakalutu,” ina nona naulu i tuba na gone. Ia e levu na tikinivolatabu e laurai kina na rai ni Kalou me baleta na bula, wili kina na gone se bera ni sucu.

 E isolisoli ni Kalou na bula. (Vakatekivu 9:6; Same 36:9) E ka talei vua na veika bula kece, okati kina na bula ni gone se tiko ena katonigone. Ke dua gona e nakita nona vakamatei na gone se bera ni sucu, e tautauvata ga kei na laba.

 E kaya na Lawa ni Kalou vei ira na Isireli: “Ke ra veimulomulo na tagane, ra qai vakamavoataka e dua na yalewa bukete, mani vakasucudole o koya, ia e sega ni vakavumate na mavoa e yaco, me qai sauma o koya e cala na ka e lavaka vua na wati yalewa, ia me sauma me vaka na nodra lewa na turaganilewa. Ia ke vakavumate na mavoa e yaco, me qai isau ni bula na bula.”—Lako Yani 21:22, 23. a

•  Tekivu ena gauna cava nona bula e dua?

•  Ena vosota na Kalou nona vakalutu e dua na tina?

•  E cala na vakalutu ke vakaleqai kina o tina se o gone?

 Na Kalou e okata e dua me tamata bula ena gauna ga e kunekunetaki kina. Ena nona Vosa na iVolatabu, e wasoma nona vakatauvatana e dua na gone se bera ni sucu ina tamata bula. Dikeva mada eso na ivakaraitaki ni tautauvata ga nona rai na Kalou me baleta na gone e tiko e ketei tinana, kei na gone sa sucu.

•   E uqeti vakalou o Tui Tevita me kaya vua na Kalou: “Na matamuni mada ga e raici au niu se kunekunetaki tiko.” (Same 139:16) O Jiova e okati Tevita me tamata bula ena gauna se bera ni sucu kina.

•   Ni bera mada ga ni sucu na parofita o Jeremaia, sa kila tu na Kalou ni na solia vua na ilesilesi bibi. E kaya vua na Kalou: “Ni bera niu buli iko ena katonigone, au sa kilai iko, ni bera ni o sucu, au sa vakatabui iko. Au lesi iko mo nodra parofita na veimatanitu.”—Jeremaia 1:5.

•   E dauvolai iVolatabu o Luke, e vuniwai tale ga. E vakaibalebaletaka na vosa vaKirisi ni gone e kunekunetaki tiko, ina dua na gone sa sucu.—Luke 1:41; 2:12, 16.

 Na Kalou e rawa ni vosoti ira na vakalutu. Ke ra duavata kei na rai ni Kalou me baleta na bula, e sega ni dodonu me ora na lomadra. “O Jiova sa yalololoma qai dauveinanumi . . . Me vaka na yawa ni icabecabe ni siga mai na idromudromu ni siga, sa biuta vakayawa vei keda o koya na noda cala.” b (Same 103:8-12) O Jiova ena vosoti ira na veivutunitaka mai vu ni lomadra nodra cala makawa, wili kina na vakalutu.—Same 86:5.

 E kaya na iVolatabu ke rivarivabitaki mada ga na bula nei tina se o gone, sega ni ulubale ya ni kena vakayagataki na wainimate se so tale na veiqaravi vakavuniwai me muduki kina na bula ni gone e buketetaki tiko.

 Ia vakacava ke yaco e dua na leqa ena gauna ni vakasucu qai vinakati me vakatulewataki me bula o tina se o gone? Rau na vakatulewa sara ga ena ituvaki qori na veiwatini.