Era vakabauta na lotu vaKarisito ni mate o Jisu ena vuku ni noda ivalavala ca. (1 Pita 3:18) Ia e sega ni vakatau wale ga noda vakabulai noda vakabauta ni o Jisu na iVakabula. O ira mada ga na timoni era kila ni o Jisu “na Luve ni Kalou,” ia era vakarusai qai sega ni vakabulai.—Luke 4:41; Juta 6.

•  Ka meu cakava me rawa niu vakabulai

•  Vakacava “Nodra Masu na iValavala ca”?

•  E vu mai vei “Nodra Masu na iValavala ca”?

•   Dodonu mo vakabauta ni solia o Jisu nona bula ena vuku ni noda ivalavala ca. (Cakacaka 16:30, 31; 1 Joni 2:2) Qori noda vakabauta ni bula dina o Jisu, e dina tale ga na ka kece e tukuni ena iVolatabu me baleti koya.

•   Vulica na ka e kaya na iVolatabu. (2 Timoci 3:15) E kaya na iVolatabu ni rau tukuna o Paula kei Sailasa vua na ovisa ni valeniveivesu: “Vakabauta na Turaga o Jisu, o na bula.” Oti qori rau vakavulica sara vua “na vosa i Jiova.” a (Cakacaka 16:31, 32) Qori e dusia ni na rawa ga ni vakabauti Jisu na ovisa ni valeniveivesu ke kila na Vosa ni Kalou. Ena vinakati gona me kila vinaka na ka dina e yavutaki ena iVolatabu.—1 Timoci 2:3, 4.

•   Veivutuni. (Cakacaka 3:19) E dodonu mo veivutuni se rarawataka mai vu ni lomamu nomu ivakarau, se itovo ca o dau cakava tu e liu. Era na raica na tamata nomu muduka na itovo ca e cata na Kalou, qai “cakava na ka e vakaraitaka ni o veivutuni.”—Cakacaka 26:20.

•   Mo papitaiso. (Maciu 28:19) E kaya o Jisu ni dodonu mera papitaiso o ira kece era via nona tisaipeli. Qori sara ga na ka e cakava na ovisa ni valeniveivesu sa cavuti oti mai. (Cakacaka 16:33) A yaco tale ga qori ena gauna a vakavulici ira kina e dua na ilala levu na yapositolo o Pita ena ka dina me baleti Jisu, “era mani papitaiso       nira ciqoma ena marau na nona vosa.”—Cakacaka 2:40, 41.

•   Talairawarawa ina ivakaro i Jisu. (Iperiu 5:9) O ira era “muria na ka kece” e vakarota o Jisu, era vakaraitaka ena nodra itovo nira nona imuri. (Maciu 28:20) Era ‘muria na vosa      , ra sega ni rogoca wale ga.’—Jemesa 1:22.

•   Vosota me yacova na icavacava. (Marika 13:13) Me rawa nira vakabulai na tisaipeli i Jisu, ena yaga ‘me tiko vei ira na vosota.’ (Iperiu 10:36) Kena ivakaraitaki, e talairawarawa tu ga na yapositolo o Paula ena ivakavuvuli i Jisu, qai yalodina vua na Kalou. Tekivu mai na gauna e lotu vaKarisito kina e vosota tu ga me yacova nona mate.—1 Korinica 9:27.

 Eso na lotu era dau cavuta na masu me vaka “Nodra Masu na iValavala ca,” kei na “Masu ni Veivakabulai.” E vakabauti na masu qori era vakaraitaka kina nodra ivalavala ca, era vakabauta tale ga ni mate o Jisu ena vuku ni nodra ivalavala ca. Era kerea tale ga vei Jisu me dusimaka na lomadra. Ia e sega vakadua ni cavuti ena iVolatabu “Nodra Masu na iValavala ca,” se me cavuqaqataki.

 Eso era nanuma na cavuti ni “Nodra Masu na iValavala ca,” ena vakadeitaka kina e dua ni na vakabulai me tawamudu. Ia ena sega ni rawa ni vakabulai e dua ke masu tu ga. Nida tamata ivalavala ca, eda na cala tu ga e veigauna. (1 Joni 1:8) Qori na vuna e vakavulica kina o Jisu vei ira nona imuri mera masuta wasoma me vosoti nodra ivalavala ca. (Luke 11:2, 4) Kena ikuri, eso mada ga na lotu vaKarisito era nanuma nira na bula tawamudu, era sa sega ni rawata qori nira sa vakanadakuya na Kalou.—Iperiu 6:4-6; 2 Pita 2:20, 21.

 Era sega ni duavata na daunitukutuku makawa ena itekitekivu ni “Nodra Masu na iValavala ca.” Eso era kaya nira tauyavutaka na Lotu na ivakarau qori. Eso tale era vakabauta ni levu era cavuta na masu qori ena gauna e kilai levu kina na ivakavuvuli vakalotu ena ika18 kei na ika19 ni senitiuri. Se mani cava e yaco, na iVolatabu e veisaqasaqa kei na ivakarau qori.