E parofita ni Kalou o Joni na Dauveipapitaisotaki. (Luke 1:76) A sucu ena icavacava ni imatai ni senitiuri B.G.V., ni bera ni sucu o Jisu. E lesi koya na Kalou me vakarautaka nona sala na Mesaia se Karisito. E vunautaka sara kina na itukutuku ni Kalou vei ira na Jiu, me rawa nira veivutuni qai lesu vua na Kalou.—Marika 1:1-4; Luke 1:13, 16, 17.

 Na itukutuku e kacivaka o Joni ena vukei ira na vakarorogo mera kila ni Mesaia yalataki o Jisu na kai Nasareci. (Maciu 11:10) E uqeti ira tale ga mera veivutunitaka nodra valavala ca, ra qai papitaiso. (Luke 3:3-6) A papitaisotaki ira e levu o Joni, qori na vuna e vakatokai kina me Dauveipapitaisotaki. Na papitaiso vakasakiti duadua e cakava, ya nona papitaisotaki Jisu. a—Marika 1:9.

Ena ulutaga qo

•  Cava e duatani duadua kina o Joni na Dauveipapitaisotaki?

•  O cei o rau na nona itubutubu?

•  O cei e vakavuna nona vakamatei?

•  Rau dau veiqati o Joni na Dauveipapitaisotaki kei Jisu?

•  E vica na tagane e vakatokai na yaca Joni ena iVolatabu?

 Sa parofisaitaki tu mai na ka ena cakava: Nona cakacaka vakaitalatala o Joni, e vakayacori kina na parofisai ni o koya na italai i Jiova. (Malakai 3:1; Maciu 3:1-3) E “vakarautaki ira na tamata mera nei Jiova.” Qori nona vukei ira na Jiu mera ciqoma na itukutuku ni Kalou me baleti Jisu Karisito.—Luke 1:17.

 Kena irogorogo: E kaya o Jisu “e sega ni dua e uasivi Joni na Dauveipapitaisotaki, ia o koya e lailai duadua ena Matanitu vakalomalagi.” (Maciu 11:11) E parofita o Joni, e italai tale ga a parofisaitaki. E sega ni dua gona na dauveiqaravi ni Kalou e uasivi koya ena gauna e bula tiko kina. Na ka e tukuna tale ga o Jisu e vakaraitaka ni o Joni ena sega ni veiliutaki ena Matanitu vakalomalagi. b A mate na parofita yalodina qo ni bera ni sevutaka o Jisu na bula i lomalagi. (Iperiu 10:19, 20) Kena ibalebale, ena bula tawamudu ga ena vuravura parataisi ena veiliutaki ni Matanitu ni Kalou.—Same 37:29; Luke 23:43.

 O Sakaraia kei Ilisapeci. O Sakaraia e dua na bete e Jiu. E sucu vakacakamana o Joni, ni sa sega ni rawa tu ni vakaluveni o tinana, “rau sa qase tale ga” kei Sakaraia.—Luke 1:5-7, 13.

 A musuka na ulu i Joni o Eroti Anitipasa, ena nona veivabukani na watina o Erotiasa. E dau tukuna o Eroti ni dua na Jiu e muria tiko na Lawa. Ia e tukuna vakadodonu vua o Joni ni cala nona vakamautaki Erotiasa. Qori e vakararawataki Erotiasa sara ga.—Maciu 14:1-12; Marika 6:16-19.

 E sega ni tukuni ena iVolatabu ni rau veiqati o Joni kei Jisu. (Joni 3:25-30) E marautaka mada ga o Joni nona ilesilesi me vakarautaka nona sala na Mesaia. E kaya: “Au veipapitaisotaki ena wai, mera kilai koya kina na Isireli.” E tomana: “O koya ga qo na luve ni Kalou.” (Joni 1:26-34) Dua na ka nona marautaka o Joni na vuavuaivuavinaka ni cakacaka vakaitalatala i Jisu.