Io, ena rawa ni vosoti iko na Kalou ke o cakava eso na ka. E kaya na iVolatabu ni Kalou e dau ‘tu vakarau ni veivosoti’ qai dau “veivosoti vakalevu.” (Niemaia 9:​17; Same 86:5; Aisea 55:7) Ni vosoti keda na Kalou, e guilecava vakadua na noda cala. E “bokoca” na noda ivalavala ca. (Cakacaka 3:​19) Ni vosoti keda tale ga na Kalou, e sega tale tiko ni nanuma na noda cala. E kaya: “Au na sega tale ni nanuma na nodra ivalavala ca.” (Jeremaia 31:34) Ni vosoti keda, e sega ni vakasamataka tale tiko noda cala se me vakayagataka qori me totogitaki keda kina.

 Ia e sega ni yavutaki na nona veivosoti na Kalou ni vakademeni keda se me raica vakamamada na nona ivakatagedegede. Ni sega ni veisautaka na nona ivakatagedegede me ganiti keda. Ya na vuna ena sega ni vosota kina eso na ivalavala ca.​—Josua 24:19, 20.

Ka mo cakava me vosoti iko kina na Kalou

1.   Vakadinadinataka ni valavala ca o cakava e beci kina na ivakatagedegede ni Kalou. De dua era rarawa eso ena cala o cakava, ia e bibi mo kila ni o vakararawataka na Kalou ena cala o cakava.​—Same 51:​1, 4; Cakacaka 24:16.

2.   Vakatusa nomu ivalavala ca vua na Kalou ena masu.​—Same 32:5; 1 Joni 1:9.

3.   Mo rarawataka nomu cala. Na “rarawa e salavata kei na loma ni Kalou” ena vakavuna mo veivutuni qai veisautaka na ivakarau ni lomamu. (2 Korinica 7:​10) O na rarawataka mada ga na itovo lalai kece o dau cakava e vakavuna nomu valavala ca.​—Maciu 5:​27, 28.

4.   ‘Veisautaka’ nomu ivakarau ni bula. (Cakacaka 3:​19) Kena ibalebale o na sega ni vakaruataka tale tiko nomu cala, se ena rairai vinakati mo na veisautaka na ivakarau ni nomu rai se na ka o dau cakava.​—Efeso 4:​23, 24.

5.   Muria na ikalawa mo vakadodonutaka kina na nomu cala se mo veivakameautaki. (Maciu 5:​23, 24; 2 Korinica 7:​11) Mo kere veivosoti vei ira o vakararawataka ena vuku ni nomu cala se mo sosomitaka na veika o taura vakatawadodonu.​—Luke 19:​7-​10.

6.   Kerea nona veivosoti na Kalou ena masu ena vuku ni soro ni veivoli i Jisu. (Efeso 1:7) Me rawa ni saumi na nomu masu, ena vinakati mo vosoti ira na cala vei iko.​—Maciu 6:​14, 15.

7.   Ke o cala bibi, mo lai raica e dua na qase ni ivavakoso. Ena rawa ni vukei iko qai masulaki iko tale ga.​—Jemesa 5:​14-​16.

Nanuma cala me baleta na veivosoti ni Kalou

 “Keu vakatutusa vua e dua na bete se italatala ni lotu ena bokoci noqu cala.”

 E sega ni tu vua e dua na tamata na lewa me bokoca na nona cala e dua tale ena mata ni Kalou. Ena rawa ni veivakacegui na nomu tusanaka nomu cala vua e dua tale, ia e rawa ga ni vosoti iko na Kalou.​—Efeso 4:​32; 1 Joni 1:​7, 9.

 Ia na cava ga e cavuta kina na vosa qo o Jisu vei ratou na nona yapositolo: “Ke dou vosota nona ivalavala ca e dua, ena vosoti, ke dou sega ni vosota nona ivalavala ca e dua, ena sega ni vosoti”? (Joni 20:23) E tukuna tiko eke o Jisu na lewa e solia duadua ga vei ratou na nona yapositolo ni sobuti ratou na yalo tabu.​—Joni 20:22.

 Me vaka ga e yalataka, ratou na ciqoma na isolisoli qo na yapositolo ena gauna e sobuti ratou kina na yalo tabu ena 33 G.V. (Cakacaka 2:​1-4) E qai vakayagataka na yapositolo o Pita na lewa qori ena gauna e totogitaki rau kina o Ananaiasa kei Savaira. Ena veivuke ni yalo tabu e kila kina o Pita na nodrau ilawaki qai vakataulewataka ni na sega ni vosoti na nodrau cala.​—Cakacaka 5:​1-​11.

 Ni ratou mai mate na yapositolo, e oti na isolisoli qori wili tale ga kina na isolisoli ni veivakabulai kei na duivosavosa. (1 Korinica 13:​8-​10) E sega gona ni tu vua na tamata na dodonu me bokoca na nona ivalavala ca e dua tale.