E mate o Jisu me rawa ni vosoti kina noda ivalavala ca, meda rawata tale ga na bula tawamudu. (Roma 6:​23; Efeso 1:7) Nona mate e vakadinadinataka se mani veivakatovolei cava eda sotava e rawa nida yalodina tiko ga vua na Kalou.—Iperiu 4:​15.

 Dikeva na yaga ni nona mate o Jisu.

1.   E mate o Jisu me rawa ni “vosoti na noda ivalavala ca.”​—Kolosa 1:​14.

    E uasivi na imatai ni tamata o Atama ena gauna a buli kina, e sega ni valavala ca. Ia e digia me beca na Kalou, qai dewavi ira kece nona kawa na nona ivalavala ca. E kaya na iVolatabu: “Ena nona talaidredre gona e dua ga na tamata e okati kina e levu mera ivalavala ca.”​—Roma 5:​19.

    O Jisu tale ga e uasivi, e ganiti koya gona me “isoro ni noda ivalavala ca.” (1 Joni 2:2) E tarai keda kece na kawatamata na nona talaidredre o Atama, ia nona mate o Jisu e bokoca laivi nodra ivalavala ca o ira era vakabauti koya.

    O Atama e volitaki keda ina valavala ca. O Jisu e yalorawarawa ni solia nona bula ena vukuda, me voli keda lesu na kawatamata. Koya gona, “ke mani valavala ca e dua, sa tiko vata kei Tamada e dua na noda dauveivuke, o Jisu Karisito, o koya na yalododonu.”​—1 Joni 2:1.

2.   E mate o Jisu “mera kua ni rusa kina o ira na vakaraitaka nodra vakabauti koya, mera rawata ga na bula tawamudu.”​—Joni 3:​16.

    A buli o Atama me bula tawamudu, ia e kena itotogi na mate. Ena ‘vuku ni nona ivalavala ca, mani dewa na mate vei ira na tamata kece ga ni sa valavala ca na tamata kece ga.’​—Roma 5:​12.

    Ia nona mate o Jisu e kauta laivi nodra ivalavala ca o ira na vakabauti koya, e vakaotia tale ga na mate. E kaya na iVolatabu: “Me vaka na nona veiliutaki voli vakatui o ivalavala ca kei mate, ena veiliutaki tale ga vakatui ena yalododonu na loloma soli wale, me rawati kina na bula tawamudu ena vuku i Jisu Karisito na noda Turaga.”​—Roma 5:​21.

    E lekaleka ga na bula ni kawatamata nikua. Ia na Kalou e yalataka nira na rawata na bula tawamudu na tamata yalododonu, ena vakaturi ira tale ga na mate me rawa ni yaga vei ira nona mate vakaisoro o Jisu.​—Same 37:29; 1 Korinica 15:22.

3.   E ‘talairawarawa o Jisu me yacova sara na mate’, qori e vakadinadinataka ni rawa nida yalodina vua na Kalou ke da mani sotava mada ga e levu na ka dredre se veivakatovolei.​—Filipai 2:8.

    E uasivi na vakasama kei na yago i Atama, ia na nona garova na ka e sega ni dodonu me nona, a talaidredre kina vua na Kalou. (Vakatekivu 2:​16, 17; 3:6) E tukuna kina o Setani na meca nabadua ni Kalou, nida na sega ni rawa ni talairawarawa vua na Kalou, vakabibi ke tu kece vei keda na ka meda bula kina. (Jope 2:4) E dina ni vakamadualaki o Jisu ni bera ni mate ena rarawa, ia e talairawarawa tu ga vua na Kalou qai yalodina tiko ga vua. (Iperiu 7:​26) Qori e vakadinadinataka se vakacava na veika dredre se veivakatovolei eda sotava, eda na rawa ni yalodina tiko ga vua na Kalou.

Taro me baleti Jisu

•   Na cava e mate vakararawa kina o Jisu? Cava e sega ni bokoca kina na Kalou na itotogi ni mate?

   E kaya na lawa ni Kalou “na isau ni ivalavala ca na mate.” (Roma 6:​23) A vakamatatataka sara ga na Kalou vei Atama na lawa qori, ni sau ni talaidredre na mate. (Vakatekivu 3:3) E “sega ni lasu rawa” na Kalou, e vakayacora dina na ka e tukuna. (Taito 1:2) E qai vakadewa kina o Atama vei ira nona kawa na ivalavala ca kei na mate.

   E ganiti ira gona na kawa i Atama mera mate, ia na Kalou e dolea vei ira “na levu ni nona loloma soli wale.” (Efeso 1:7) E vakavotui na cecere ni lewadodonu ni Kalou kei na titobu ni nona yalololoma ena nona talai Jisu mai me cabora nona bula uasivi me keda ivoli na kawatamata.

•   Na gauna cava e mate kina o Jisu?

   A mate o Jisu ena “ikaciwa ni aua” se rauta na tolu na kaloko ena yakavi ni nodra kanavata ni Lakosivia na Jiu. (Marika 15:33-​37, ivakamacala e ra) Na tikinisiga qori e veidonui kei na Vakaraubuka na 1 ni Epereli 33 G.V., ena noda ivolanivula.

•   A mate i vei o Jisu?

   A vakamatei o Jisu ena vanua “e vakatokai ena vosa vakaIperiu me o Kolikoca, kena ibalebale na Vanua ni Qavokavoka.” (Joni 19:17, 18) Ena gauna ya na vanua qori e tiko ena “taudaku ni matamatanikoro” e Jerusalemi. (Iperiu 13:12) E kena irairai ni toka ena dua na delana, ni kaya na iVolatabu ni so era raica tu mai “vakayawa” nona vakamatei o Jisu. (Marika 15:40) Ia ena gauna qo sa sega ni kilai na vanua e tiko kina o Kolikoca.

•   A mate vakacava o Jisu?

   E levu era vakabauta ni a mate o Jisu ena kauveilatai, ia e kaya na iVolatabu: “E colata na noda ivalavala ca ena kau.” (1 Pita 2:​24, King James Version) Era vakayagataka o ira na dauvola iVolatabu e rua na vosa vaKirisi me vakaibalebaletaka na iyaya e vakamatei kina o Jisu, qori na stau·rosʹ kei na xyʹlon. Levu vei ira na dauvakadidike era kaya ni rua na vosa qori e vakaibalebaletaka na kauvaro se dua na duru balavu.

•   Me vakananumi vakacava na nona mate o Jisu?

   A tauyavutaka o Jisu vei ratou nona imuri e dua na soqo rawarawa ga ena bogi ni Lakosivia era dau solevutaka na Jiu. E kaya: “Dou cakava tiko ga qo mo dou vakananumi au kina.” (1 Korinica 11:24) Oti ga e vica na aua a vakamatei o Jisu.

   Era vakatauvatana na dauvola iVolatabu nona mate o Jisu ina kena lai cabori na lami ena Lakosivia. (1 Korinica 5:7) Na soqo ni Lakosivia era dau vakananuma kina na Isireli na nodra sereki mai na veivakabobulataki. Era dau vakananuma tale ga na lotu vaKarisito na iVakananumi i Jisu Karisito ena nodra sa sereki mai na valavala ca kei na mate. E dau vakananumi e veiyabaki na Lakosivia ena 14 ni Naisani ena ivolanivula vakaivolatabu; era cakava tale ga qori na lotu vaKarisito ena nodra dau vakananuma e veiyabaki na iVakananumi.

   Dua na iwiliwili levu ni lewe i vuravura era dau vakananuma e veiyabaki na mate i Jisu ena tikinisiga e veidonui kei na ika14 ni Naisani.