“Au sega vakadua ni tadra niu na veiqaravi vakatabakidua vei Jiova.” Qori na ka e tukuna o Gwen na tacida yalewa mai Igiladi e lai veiqaravi e Albania na vanua e vinakati vakalevu kina na veivuke. a

 O Gwen e dua ga vei ira e levu na tacida era toki i Albania mera veivuke ena nodra kumuni “na veika talei ni veimatanitu kece.” (Akeai 2:7) Cava mada e uqeti ira na tacida qo? Na veiveisau cava era cakava me rawa nira toki kina? Cava era cakava mera marau tiko ga?

 O ira kece na dautukutuku era lai veivuke i Albania e tautauvata kece na nodra inaki, ya na nodra lomani Jiova ra qai via vukei ira eso tale mera kilai koya.

 Ni bera nira toki, era vakarabailevutaka nodra cakacaka vakaitalatala. E vakarautaki ira qori ena nodra veiqaravi e vanuatani. E kaya o Gwen: “Au lewena na iwasewase lailai vosa vaka-Albania ena vanua au tiko kina. Oti au gole i Albania ena dua na soqo ni veiwasewase. Au mani gade tale i kea meu rawa ni kila vinaka na kena vosa.”

 O Manuela e dua na tacida yalewa, ni yabaki 23 a toki me lai veivuke ena dua na ivavakoso lailai e Itali. E kaya: “Va na yabaki noqu veiqaravi tu e kea, au rogoca sara ni vinakati e levu na veivuke e Albania. Au mani tuvanaka meu lai painia i kea me vica ga na vula.”

 Ni se qai yabaki vitu o Federica a rogoca ena dua na soqo ni veiwasewase na itukutuku me baleti Albania. E kaya: “E vakamacalataka na tacida e vunau tiko ni levu na vuli iVolatabu era sa tauyavutaka tiko na dautukutuku e Albania, era sa gole tale ga ena soqoni. Au kaya sara vei rau noqu itubutubu niu via lako i Albania. Rau kurabuitaka na ka au tukuna qori. Ia e kaya o tamaqu, ‘Masulaka vei Jiova, ke nona inaki ena sauma.’ Oti ga e vica na vula keitou sureti vakavuvale me keitou lai veiqaravi i Albania!” Sa vakamau o Federica, sa oti tale ga qo e vica vata na yabaki nodrau veiqaravi tiko vakatabakidua kei na watina o Orges e Albania.

 Oti nona cegu mai na cakacaka o Gianpiero, rau toki sara kei watina o Gloria i Albania. E kaya o Gianpiero: “E lima na luvei keirau tagane, keirau susugi ratou kece e Itali. Le tolu ratou toki ina vanua e vinakati vakalevu kina na veivuke. E uqeti keirau na Vale ni Vakatawa e kena ulutaga, ‘O Rawa ni Lai Veivuke i Masitonia?’ Keirau veivosakitaka sara na sala me keirau vakayagataka kina noqu peniseni me rawa ni keirau veiqaravi e Albania.”

 Ena vinakati vei ira na via veivuke ena dua tale na vanua mera tuvatuvanaki vinaka, ra qai cakava na veiveisau me rawa nira toki. (Luke 14:28) Dua ya, nodra tuvanaka na sala mera tokoni ira kina vakailavo. O Gwen sa cavuti oti mai, gauna se tiko kina e Igiladi a toki me lai tiko kei tacina me rawa ni maroroya eso na ilavo. Rau kaya tale ga o Sophia kei Christopher rau tiko tale ga mai Igiladi: “Keirau volitaka neirau motoka kei na so tale na iyaya ni vale. Keirau vinakata me dua mada ga na yabaki neirau tiko e Albania.” E marautaki dina ni rau qai lai veiqaravi vakadede e Albania.

 Eso na dautukutuku era veiqaravi me vica na vula e Albania. Oti era lesu ina nodra vanua mera lai cakacaka, maroroi lavo, ra qai lesu tale i Albania. Qori na ka rau cakava o Eliseo kei Miriam. E kaya o Eliseo: “A susu o Miriam ena dua na vanua e Itali era dau gade vakalevu kina na saravanua. E rawarawa tale ga me kunei e kea na cakacaka vagauna. Ena vulaikatakata, keirau dau lai cakacaka i kea me tolu na vula. Na ilavo keirau rawata mai kina e vukei keirau ena neirau veiqaravi e Albania ena vo ni ciwa na vula. Keirau cakava tiko qori ena loma ni lima na yabaki.”

 Ena vinakati vei ira era toki mera vakamatauni ira ena vanua vou era na veiqaravi kina. Ia e dau yaga vakalevu nodra ivakasala kei na nodra ivakaraitaki na tacida ena vanua ya. E kaya o Sophia sa cavuti oti mai: “Dau batabata sivia e Albania ni vakatauvatani mai Igiladi. Dua gona na vulaibatabata, au vakatotomuria nodra isulusulu na tacida yalewa e kea.” O Grzegorz kei na watina o Sona rau tiko mai Poladi. Rau gole me rau lai veivuke e Prizren e dua na tauni rairai totoka mai Kosovo. b E kaya o Grzegorz: “O ira na tacida e ke era dau yalomalumalumu, yalololoma qai vosovoso! Era vukei keirau me keirau kila na nodra vosa kei na levu tale na ka. Kena ivakaraitaki, era dau tukuna vei keirau na vanua e sau lailai kina na iyaya. Era dau vukei keirau tale ga ena sala me keirau volivoli kina ena makete.”

 E yaga vakalevu nodra dau toki eso e vanuatani ni rawa nira lai veitokani kei ira na tacida e kea, ra kila tale ga na nodra isususu. E kaya o Sona: “Na nona loloma o Jiova e veisautaka na nodra bula e levu. Niu raici ira na tacida era veisautaka nodra vakabauta kei na nodra itovo ena gauna ra mai kilai Jiova kina, qori e dua na ka e vaqaqacotaka vakalevu noqu vakabauta. E vinakati vakalevu meda dau veivuke ena ivavakoso. Eda cakacaka vata kei ira na tacida era sa mai noda itokani.” (Marika 10:29, 30) E kaya o Gloria: “Levu na tacida yalewa era tiko ena yalava qo era vosota na veivakacacani mai vei ira era sega ni qaravi Jiova. E tarai au dina niu raica na nodra lomani Jiova.”

 Levu tale na ka e rawa nira vulica o ira era toki ena vanua e vinakati kina na veivuke, rairai qori e dua na ka era sega ni vulica ena vanua era susu kina. Kena ivakaraitaki, era dau marautaka mera cakava e levu na ka vei Jiova ke mani dredre mada ga. E kaya o Stefano: “Ena noqu vanua, au dau vunau ena intercom, e lekaleka tale ga na ka au tukuna. Ia era taleitaka e Albania mera vosa vakabalavu, vakabibi nira gunu kofi tiko. Me vaka niu dau mamadua, gauna au sotava kina qori, au madua qai sega ni kila na ka meu tukuna. Ia toso na gauna, au vulica meu kauaitaki ira na tamata. Qo au sa taleitaka sara na veivosaki kei ira, au marautaka tale ga noqu cakacaka vakavunau.”

 O Leah kei William rau tiko e Merika, rau mani toki i Albania. E kaya o Leah: “Levu na ka keirau mai vulica e ke, e veisautaka tale ga neirau ivakarau ni rai kei na bula. Keirau vulica kina e levu na ka me baleta na veikauaitaki, veidokai kei na veitokani! Keirau vulica tale ga na iwalewale vou me keirau vunau kina, vakamacalataka na iVolatabu, qai vakaraitaka na neirau rai.” E kaya o William: “Levu era gade mai Albania era dau taleitaka na rairai vinaka ni matasawa. Au taleitaka meu taubaletaka na ulunivanua na Albanian Alps. Ia au taleitaki ira sara vakalevu na lewenivanua e ke! Levu na koro ena yalava keirau tiko kina era sa rogoca vakalailai na itukutuku vinaka ena vunau lavotaki. Eso na gauna ni keirau gole kina, keirau na tu mai kea me dua taucoko na siga me keirau lai veitalanoa tu ga kei na so na vuvale.”

 Dua na marau levu era dau vakila o ira era veivuke e vanuatani, ya nodra raica sara ga na sala era ciqoma kina na tamata na itukutuku vinaka. (1 Cesalonaika 2:19, 20) Qori sara ga na ka e vakila o Laura e dua na tacida goneyalewa a toki i Albania. E kaya: “Au veiqaravi tu i Fier. Ena loma ga ni rua veimama na yabaki, era vakadonui e 120 na dautukutuku vou mera cakacaka vakavunau! Le 16 vei ira qori au vakavulica ena iVolatabu!” E kaya tale ga o Sandra e dua na tacida yalewa: “Au vunau vua e dua na yalewa e cakacaka tiko ena makete. A papitaiso sara, oti e mani lesu i nona koro. Na otioti ni gauna keirau veivosaki kina sa 15 na nona vuli iVolatabu!”

 Eso na tacida era toki e Albania ena vica na yabaki sa oti era se tiko ga e kea, ra qai marautaka vakalevu na nodra veiqaravi. Eso na gauna era dau kurabuitaka nira rogoca nira sa tiko ena dina o ira era vunau kina ena veigauna sa oti. (Dauvunau 11:6) E kaya o Christopher sa cavuti oti mai: “Gauna au toki kina i Albania au sotava vakacalaka e dua na tagane, yaco sara me vuli iVolatabu. E tarai au dina ni se nanuma vinaka tu na imatai ni gauna keirau veitalanotaka kina na iVolatabu. Gauna qo, rau sa papitaiso vakaveiwatini.” E kaya o Federica sa cavuti oti mai: “A gole mai vei au e dua na tacida yalewa ena dua na ivavakoso qai tarogi au keu se kilai koya tiko. E kaya niu a vunau vua ena ciwa na yabaki sa oti. Au qai toki ena dua tale na tauni, ia e tomana tiko ga nona vuli iVolatabu lai papitaiso sara. Au nanuma ni na sega ni vuavuaivinaka na imatai ni neirau yabaki e Albania. E cala sara ga na noqu rai!”

 Era marautaka vakalevu na tacida era toki i Albania se Kosovo na sala e vakalougatataka kina o Jiova na nodra sasaga, e vakainaki tale ga na nodra bula. Oti e vica vata na yabaki nona veiqaravi tu e Albania o Eliseo, e kaya: “Me vaka nida tamata ga, e rawarawa meda vakacalai meda nanuma ni na taqomaki keda na veika ni vuravura qo. Ia e sega ni dina qori. Na ivakavuvuli ga i Jiova ena vukei keda me vakainaki noda bula, me dei tale ga. Qori sara ga na ka au vulica ena noqu veiqaravi e vanuatani. Au vakila kina ni tiko na kequ yaga, au lomani tale ga. Era tu tale ga na noqu itokani dina e tautauvata na neimami isausau.” Qori tale ga na ka e kaya o Sandra: “Niu toki ena vanua e vinakati vakalevu kina na veivuke, au vakadeitaka kina ni o Jiova e solia vei au na gauna qo meu cakava kina na ka au vinakata dede tu mai, ya meu daukaulotu. Au sega vakadua ni veivutunitaka noqu toki i Albania. Au sa qai marau ga vakalevu.”