21 TISEBA, 2018
SRI LANKA
iMatai ni Soqo Lavotaki e Sri Lanka
Era gole yani e vica vata na udolu na iVakadinadina i Jiova mai na vitu na matanitu mera tomani ira na mataveitacini e Sri Lanka ena imatai ni nodra soqo lavotaki. Na kena usutu “Mo Yaloqaqa”! E vakayacori ena ika6 ina ika8 ni Julai, 2018 ena koroturaga e Colombo, ena vanua ni qito na Sugathadasa National Sports Complex. Era tiko kina e le 14,121, qai levu na veika totoka era marautaka. Kena ivakaraitaki, e vunau e dua na lewe ni iLawalawa Dauvakatulewa, levu era papitaiso, ra qai veivakacegui na mataveitacini e kea vei ira e rauta ni le 3,500 na vulagi.
Tekivu na vakavakarau ena Seviteba 2017, ni kacivaki ena veivavakoso e Sri Lanka ni na vakayacori tiko ena yabaki qo na soqo lavotaki. Ni vakayacori tiko na tuvatuvanaki, e vinakati me samaki qai vakavinakataki eso na vanua. Qori na kena boro, kau tani na benu, vakavinakataki na idabedabe, botani na qara era kune e gaunisala. Ni se vo e tolu na macawa me vakayacori kina na soqo era yaco yani e vica vata na drau na iVakadinadina i Jiova, mera veivuke sara ga ena vakavakarau. E kaya e dua na yadra ni ka era cakava na mataveitacini ena dua ga na gauna lekaleka, ena taura toka e va na yabaki mera cakava na cakacaka e kea.
Era vakasarasarataki tale ga na vulagi ena vica na vanua, e vakarautaki tale ga eso na ka ni veivakamarautaki me baleta nodra itovo vakavanua e Sri Lanka. Guiguilecavi dredre na meke kei na lagasere e vakayacori ena kena yakavibogi, okati kina nodra lagata eso na sere ni isoqosoqo.
E kaya o Ashley Ferdinands, na mata ni valenivolavola ni tabana e Sri Lanka: “Dua na iloloma vinaka vei ira na mataveitacini e ke na soqo lavotaki qo, e ka dokai tale ga na neimami veivakamarautaki vei ira na vulagi. Keimami vakavinavinaka vei ira kece na bole mera veivuke ena kena tuvanaki vinaka na soqo. Ia me vakavinavinakataki ga kina na Tamada o koya e ivurevure ni iloloma kei na isolisoli uasivi kece.”—Jemesa 1:17.
Wasei vakava na vosa e vakayagataki ena vanua ni soqo—vakaValagi (laurai toka qo), vakaSinhala, vosa vaGalu ni Sri Lanka, kei na vosa vakaTamil.
E tinia na vunau e veisiga o Brother Anthony Morris, e lewe ni iLawalawa Dauvakatulewa.
Era papitaiso e le 273.
E sureti yani na tabana ni itukutuku mera veivosaki kei ira na tacida ena valenivolavola ni tabana. E sivia na 40 na dauvolaitukutuku era gole yani, ra vakasarasarataki tale ga.
Vakatarogi tiko e dua na tacida e lesi me mata ni noda soqo, vei rau na vakailesilesi ni siteseni ni kaburaki tukutuku e Sri Lanka.
Sivia na 700 na mataveitacini era gole yani e Colombo ena Janueri 2018, mera vakavulici ena kena vakarautaki na soqo.
Era vakavinakataka tiko na idabedabe na bolecakacaka ena vanua ni soqo.
Tuvanaki e dua na porokaramu e vakatokai “Meda Veikilai” ena vica vata na vale ni soqoni e Colombo, e kena inaki mera veikilai vinaka kina na mataveitacini e kea vaka kina o ira na gole yani.
Levu na ka ni veivakamarautaki e Sri Lanka e vakaraitaki, me vaka na meke vakaTamil qo.
Era lagata eso na gone iVakadinadina i Jiova na sere: “Veivakamasuti o Jiova: ‘Mo Vuku na Luvequ.’”
Era taleitaka mera kila na icakacaka ni ti.
Era vakaraitaka toka qo na vulagi na nodra vakavinavinaka vei ira na mataveitacini e kea.
Rawa ni o Wilika Tale ga
ITUKUTUKU VOU
iMatai ni Soqo Lavotaki e Georgia
E imatai tale ga ni gauna me vakayacori kina e Georgia e dua na soqo ni kana magiti vakayalo. E laurai kina nodra veikauaitaki na mataveitacini, ra qai vakaraitaka tale ga na nodra itovo vakavanua, kei na kedra volaitukutuku makawa.
ITUKUTUKU VOU
Era Veikauaitaki Qai Duavata na iVakadinadina i Jiova ena Soqo Lavotaki e Ukraine
Era veikidavaki na tacida e Lviv mai Ukraine vei ira na vica vata na udolu na vulagi era gole ena soqo lavotaki qori. Era marautaka na vulagi na nodra itovo ni vanua kei na veivakasarasarataki.