Era vakavinavinakataka na dau tokoni ira na didivara na nodra vakarautaka na tacida e Sauca Aferika na vidio ni vosa vagalu ni Sauca Aferika (SASL). Ena ika15 ni Noveba 2021, a sevutaki na ivola vakaivolatabu na Kalatia kei na Efeso ena vosa vagalu ni Sauca Aferika. Kena ibalebale, e tini kece na ivola vakaivolatabu sa sevutaki ena vosa vagalu ni Sauca Aferika. E tuvanaki tiko me sevutaki e va tale na ivola vakaivolatabu ena Epereli 2022. Ena biu na ivola kece qo ena jw.org, kei na JW Library Sign Language.

O Minna Steyn e dauveivakavulici qai vukevuke ni iliuliu e Western Cape, e kaya me baleti ira na tacida: “Au dau taleitaka meu saravi ira na iVakadinadina i Jiova era vakadewa ena vosa vagalu. Au vakavinavinakataki ira gona kei na nodra isoqosoqo ena vinaka ni ivakatagedegede ni nodra vakadewa ena vosa vagalu.”

O Bongani Makama e peresitedi ni isoqosoqo na Federation of the Disabled mai Eswatini, e kaya: “Keimami vakavinavinakataki ira na iVakadinadina i Jiova nira vakarautaka eso na ivukevuke vei ira na didivara.” E tomana: “Era vinakata [na didivara] na iVolatabu ena nodra vosa ga. Keimami vakavinavinakataki kemuni kina na iVakadinadina i Jiova nomuni vakarautaka na iVolatabu vei ira na didivara era tiko ena yalava. Keimami sa waraka tu ga qo me vakarautaki mai na ivola vakaivolatabu taucoko ena vosa vagalu.”

E rauta ni 450,000 na lewenivanua era vakayagataka na vosa vagalu ni Sauca Aferika. Era le 283 na dautukutuku didivara e Sauca Aferika. Na nodra sasaga vagumatua na tacida era mai ‘kila kina na ka dina na tamata kece ga,’ wili kina o ira na didivara ena yalava e qarava na valenivolavola ni tabana e Sauca Aferika.—1 Timoci 2:4.