Ena Janueri 2024 sa ika75 ni yabaki na kena tabaki na Vale ni Vakatawa ena vosa vakaZulu. Ena 1949, e tabaki na imatai ni Vale ni Vakatawa ena vosa vakaZulu ena valenivolavola ni tabana e Sauca Aferika ni vakayagataki na misini makawa ni tabaivola. Toso na gauna, e volia na valenivolavola ni tabana eso tale na misini vou ni tabaivola, qori e vakatotolotaka qai tabaka vakavinaka na mekesini.

Dua na dredre e vakilai ya na kena qarai na vanua mera tiko kina na timi ni vakadewa ena vosa vakaZulu. Na lawa ni veivakaduiduitaki e Sauca Aferika e vakatabuya mera tiko vata ena dua na vale na yago loaloa, kei na yago vulavula. Era mani vakaicili na daunivakadewa yago loaloa ena taudaku kei Peceli. E vinakati vakalevu kina na gauna ena vuku ni nodra veitosoyaki, e saulevu, e yaco tale ga kina eso na leqa. Kena ivakaraitaki, ena 1981 era tiko vata ena dua na rumu e le 20 na daunivakadewa ena vosa vakaZulu. Dua vei ira e vosota na ituvaki qori o Brother Alfred Phatswana me rauta ni rua na yabaki. Nikua, sa lewena tiko na Komiti ni Tabana e Sauca Aferika, e kaya: “E sega ni rawarawa dina na ituvaki ya. Ia keimami marau ni keimami sa tiko ena dua na vale me keimami tokona na cakacaka ni vakadewa. Na neimami saga tale ga me savasava na vanua keimami tiko kina, qori e ivakadinadina vei ira keimami tiko veitikivi.”

Eda marau ena gauna qo nira sa rawa ni tiko vata, ra cakacaka vata tale ga na tacida ena valenivolavola ni vakadewa tu yawa e Durban, e Sauca Aferika. E sivia ni le 28,000 na dautukutuku ena 584 na ivavakoso vosa vakaZulu sa yaga tiko vei ira na Vale ni Vakatawa, kei na ivola vakaivolatabu ena nodra vosa ga.

E vakalougatataka tiko o Jiova na kena vakadewataki ena vosa vakaZulu na Vale ni Vakatawa kei na so tale na ivola vakaivolatabu, me rawa kina vei ira e levu mera mai “gunuva wale na wai ni bula.”​—Vakatakila 22:17.