Ena ika7 ni Maji 2022, me sa ika75 ni yabaki na kena vakalawataki na nodra cakacaka na tacida e Niusiladi. Ena ika7 ni Maji 1947, ratou gole ena palimedi e Niusiladi, o Brother Nathan H. Knorr, Brother Milton Henschel, kei Brother Charles Clayton na imatai ni daukaulotu e Niusiladi e vuli mai Kiliati. Era vakadonuya kina na vakailesilesi vakamatanitu me vakalawataki na noda cakacaka. Nikua, e vuavuaivinaka nodra cakacaka vakaitalatala e 14,500 na dautukutuku ena vanua qori.

Ena 1898, sa vunautaki e Niusiladi na itukutuku vinaka. Tekivu mai na gauna qori, e tubu tiko ga na kedra iwiliwili na dautukutuku. Dua na ka na nodra cudru na lotu Katolika ni sa kilai na ka dina vakaivolatabu ena noda ivola. Era mani uqeti ira na lewenivanua mera vakacacani keda. Ena ika24 ni Okotova 1940, e vakatabuya na matanitu na noda cakacaka. Ia ena ika8 ni Me 1941, e veisautaka qori na palimedi, qai vakatara vei ira na tacida mera soqoni, qai vakaitavi ena cakacaka vakaitalatala. Ia mera vakayagataka ga na iVolatabu, sega ni ivola vakaivolatabu. Ena ika29 ni Maji 1945, e bokoci na vakatatabu qai tubu tale na iwiliwili ni dautukutuku. Oti e rua na yabaki, sa ra le 659 na tacida era vunautaka tiko na itukutuku vinaka. Qori e iwiliwili levu duadua ni dautukutuku.

Ena 1947, a sikovi Niusiladi o Brother Knorr. Qori sara ga na gauna a gole kina ena palimedi e Niusiladi.

Oti na kena vakadonui vakalawa na noda cakacaka, e tauyavutaki sara e dua na valenivolavola ni tabana e Wellington. Me rawa ni tuvanaka na noda cakacaka vakaitalatala. E mani lesi o Brother Robert Lazenby me liutaka na cakacaka ena yalava ni valenivolavola ni tabana.

Sa tu na valenivolavola ni tabana vou, qai tubu tiko ga na iwiliwili ni dautukutuku e Niusiladi. E vola kina o Brother Knorr: “Era yalorawarawa na mataveitacini mera tokona na itavi e qarava na valenivolavola ni tabana, ra qai muria na kena veidusimaki.”

Ena ika8 ina ika9 ni Maji 1947, rau vunau o Brother Knorr kei Brother Henschel ena dua na soqo lavotaki e caka e Wellington Town Hall. E qai vakayacori na soqoni ena yakavi ena dua na koronivuli voleka. Era tiko kina e rauta nira le 500 na tacida.

Gauna qori se yabaki 17 kina o Sister Beryl Todd. E kaya: “Qo na imatai ni soqo levu duadua meu tiko kina, e marautaki tale ga ni tiko kina o Brother Knorr.” Ena soqo vata qori e papitaiso kina o Clyde Canty, toso na gauna e qai lesi me kodineita ni valenivolavola ni tabana e Niusiladi.

Ena ika10 ni Maji 1947, era soqoni tale e Okaladi e voleka ni le 300 na tacida mera rogoca nodratou vunau o Brother Knorr, Brother Henschel kei Brother Lazenby. E kaya o Brother Knorr me baleta na noda cakacaka e Niusiladi: “Au vakadeitaka ni na vuavuaivinaka na noda cakacaka, ena tubu tale ga na iwiliwili ni dautukutuku.”

E yaco dina na ka e tukuna qori o Brother Knorr. Oti tale e walu na yabaki, e vakasakiti na tubu ni dautukutuku e Niusiladi. Me yacova mai na 1955, sa 2,519 na iwiliwili ni dautukutuku. Ena 1989, sa 10,000 na levu ni dautukutuku e Niusiladi.

Eda vakavinavinakataki Jiova ni vukei ratou na tacida me vakalawataki na noda cakacaka e Niusiladi.—Filipai 1:7.