E tuvanaka na Komiti ni Tabana e Malawi na kena kaburaki ena tivi kei na retio na soqoni. Era sarava rawa kina na tacida wili kina o ira na lewenivanua. Era tiko e Malawi e sivia na 100,000 na iVakadinadina i Jiova, ia e tukuna mai na tabana ni kakaburaki nira na rawa ni sarava na porokaramu ni soqoni ena tivi ena veimuanimacawa e 2 na milioni, ena retio era na rawa ni rogoca e walu na milioni.

Me vakataki ira ga na vo ni tacida ena so tale na vanua, era sega ni sota vata ena Vale ni Soqoni na tacida e Malawi ena vuku ni vakatatabu ni matedewa. Levu vei ira na tacida e tiko na nodra tivi se retio. Era na rawa gona ni rogoca se sarava na soqoni ke sega mada na nodra internet se mera qiri ena vidio.

E kaburaki na soqoni ena vosa vakaChichewa, qori na vosa e vakayagataki vakalevu e Malawi. E vakadewataki tale ga na porokaramu ena vosa vagalu vakaMalawi. Me ikuri ni ivunau soqovi levu, e saravi tale ga na noda vidio kei na wili iVolatabu veiuqeti. Ni dau mai cava e dua na porokaramu, era dau uqeti na lewenivanua mera rai ina jw.org mera kila kina eso tale na itukutuku ena levu na vosa.

Na veika e saravi se rogoci qori e kauta tani sara ga na nodra dau raicalataki na iVakadinadina i Jiova. E vola e dua na turaga: “Ena vica na macawa qo au sa rogoca e vica na nomudou ivunau ena retio. E vakaceguya sara ga na neimami dau lomatarotarotaka tu eso na ka lasu e dau tukuni tu me baleti kemuni. E duatani na nomuni ivunau mai na vo ni lotu, ni uqeta sara ga na lomada!” E sa vulica tiko na turaga qori kei na nona vuvale na iVolatabu kei ira na iVakadinadina i Jiova.

Qo na ka e vakamacalataka o Augustine Semo ena Tabana ni iTukutuku e Malawi: “E yaga vakalevu vei keimami na ituvatuva qo ni keimami sega ni calata kina na soqoni. Era sa mai kila tale ga kina e levu na lewenivanua na veika eda vakabauta ena iVolatabu. Keimami nuitaka me keimami sotavi ira e levu na ka vou ena Vale ni Soqoni ni sa na vinaka tale kina na ituvaki e Malawi.”

Eda marau nida kila nira vakani tiko ga vakayalo na tacida e Malawi ena gauna dredre qo. Eda vakavinavinakataka kina vakalevu na ‘dauveiqaravi yalodina’ ni raica meda vakani kece vakayalo.—Maciu 24:45.