Ena ika6 ni Okotova 2022, me sa ika100 ni yabaki ni kena tauyavu na valenivolavola ni tabana e Kirisi.

Ena 1905, e vunautaki e Kirisi na itukutuku vinaka, ra qai gugumatua na tacida na vunau. Ena 1922, e vakarautaka o Brother Joseph F. Rutherford na imatai ni valenivolavola ni tabana e Aceni. E lesi o Brother Athanassios Karanassios me mata ni valenivolavola ni tabana. Ena 1963, e tekivu tabaki na ivola vakaivolatabu. Oti e rua na yabaki, e biuta na matanitu e dua na lawa e vakatabui kina na vunau. E mani vesu o Brother Karanassios ena 1939. E vakatabui me tabaki na noda ivola, qai vica na vula na kena vesu tu na valenivolavola ni tabana. Toso na gauna, e vakaitavi o Kirisi ena iKarua ni iValu Levu. E vakaroti me muri na lawa ni mataivalu, e lai vakatabui kina na noda ivola vakaivolatabu, e sogo tale ga na itikotiko e Peceli.

Oti na ivalu ena 1945, sa vakatarai tale na cakacaka, e tuvanaki tale ga me tomani tale na cakacaka vakavunau. Oti e rua na yabaki, e sikovi ira na tacida e Kirisi o Brother Nathan H. Knorr, qai tuvanaka me caka na valenivolavola ni tabana vou e Tenedou Street, e Aceni. E vakalougatataka o Jiova na sasaga qori. Me yacova mai na 1951, sa 3,368 na levu ni dautukutuku e Kirisi. Ena loma ga ni dua na yabaki, e tubu ena 26 na pasede na iwiliwili ni dautukutuku.

Ena Okotova 1954, e vakatatabutaki na itikotiko vou e Peceli e Kartali Street, e Aceni. Dina ni yaco tiko na veivakacacani, e vuavuaivinaka tu ga na cakacaka vakavunau. Ena 1967, e vuaviritaka na matanitu o Kirisi na kena mataivalu. E vakatabui tale na soqoni, kei na cakacaka vakavunau.

Ena gauna qori rau veiqaravi tiko e Peceli o Brother Michalis Kaminaris, kei watina o Eleftheria. E kaya o Brother Kaminaris: “E sega ni vakatarai me tabaki na noda ivola e Peceli ena gauna ni vakatatabu. Sa qai caka qori e neirau vale ena taudaku ni siti o Aceni. E dau taipataka o Eleftheria ena misini na ulutaga ni Vale ni Vakatawa. Oti ena biuta e tini na draunipepa ena misini, sa na qai tabaka vakaukaua me rawa ni tabaki mai na matanivola. Au sa qai kumuni ira na draunipepa, qai vakabiri ira vata. Keirau na cakava tiko qori mai na yakavi me yacova na bogi levu. Keirau kurabuitaka ni sega ni bau kidava na ovisa e tiko ena tabavale e ra na ka keirau cakava tiko.”

Dina ni yaco tu na vakatatabu, e tubu tiko ga na iwiliwili ni dautukutuku. Ena 1974, ni sa vakatarai tale na cakacaka, e vinakati me tara e dua tale na valenivolavola ni tabana levu. Ena vica tale na yabaki e tarava, e tubu tiko ga na iwiliwili ni dautukutuku e Kirisi. E vinakati gona me vakalevutaki na valenivolavola ni tabana. Ena ika18 ni Noveba 2018, e vakatabui na valenivolavola ni tabana e tiko e Drapetsona, e Piraeus. Gauna qo era sa veiqaravi tiko e Kirisi e 27,752 na dautukutuku.

E yaco e levu na vakatatabu, ivalu, kei na veivakacacani e Kirisi. Ia na tubu e laurai kina ena 100 na yabaki sa oti, e vakadinadinataka ni sega ni dua na ka ena tarova nona ‘vakatotolotaka o Jiova na cakacaka ena kena gauna.’—Aisea 60:22.