BOGOTA, Colombia—Ena dua na bose a vakayacori ena ika7 ina ika9 ni Okotova, 2016, eratou solia kina e dua na icovi vei ira na iVakadinadina e Colombia e tolu na isoqosoqo eratou qarava na vakadewa ena vosa vagalu. Era vakaicovitaki na iVakadinadina ena vuku ni veika era vakarautaka me baleti ira na galu. E se qai vakadua me bau tuvanaki e dua na bose va qori me baleti ira na dauvakadewa ena vosa vagalu, era veivuke sara tiko vakalevu vei ira na galu kei na mataboko e Colombia.

Era sureti ina bose na iVakadinadina qai soli vei ira e dua na icovi me vakacaucautaki kina “na veika totoka e vakarautaka na nodra lotu, kei na veivuke levu era cakava tiko vei ira na galu.” A veivuke ena tuvanaki ni bose o Ricardo Valencia López, e peresitedi ni nodra isoqosoqo na dauvakadewa ena vosa vagalu ni Colombia. E kaya o Ricardo nira sureti na iVakadinadina i Jiova ena vuku ni nodra veivuke ena vakadewa ena vosa vagalu. E vakarautaki vinaka na veika era tabaka, qai levu na ka era rawa ni vulica vei ira na iVakadinadina eso tale na isoqosoqo ni vakadewa ena vosa vagalu.

Era vakamacalataka ena bose na iVakadinadina eso na irogo me baleta na nodra cakacaka ni vakadewa. Era taleitaka e levu na nodra irogo na iVakadinadina, mani solia tale e dua na icovi na komiti e tuvanaka na bose me vakavinavinakataki kina na nodra irogo totoka.

A tiko tale ga ena bose o Cristian David Valencia, e kenadau ena droini, kei na katokatoni e lakovata kei na iyaloyalo. E kaya o Cristian ni kurabuitaka nona vakarautaka vakamaqosa na isoqosoqo lotu ni iVakadinadina i Jiova e dua na porokaramu ni vuli, nira sega mada ga ni saumi ena nodra cakacaka.

E kaya o Wilson Torres e dua na nodra gusunivosa na iVakadinadina i Jiova e Colombia: “A se tekivu sara mai na 2000 na neimami vukei ira na galu. Na neimami website mada ga e tiko kina e sivia na 400 na vidio e rawa nira sarava ena vosa vagalu ni Colombia na uabula, itabagone, kei na gone. Keimami na vakarautaka tiko ga va qori na itukutuku vakaivolatabu, qai sega ni saumi me vaka ga na ivola tale eso keimami tabaka.”

Era tabaka qai veisoliyaka na timi ni vakadewa ni iVakadinadina i Jiova e veiyasa i vuravura, na vidio ena 88 na vosa vagalu. Era sa vakarautaka tale ga na iVakadinadina i Jiova na porokaramu na JW Library Sign Language app, qai rawarawa na download, raici ni ka e vaqarai, kei na saravi ni vidio ena vosa vagalu ena nodra website vakadonui na jw.org.

Gusunivosa:

Veiyasa i vuravura: David A. Semonian, Valenivolavola ni iTukutuku, +1-845-524-3000

Colombia: Wilson Torres, +57-1-8911530