Ena ika3 ni Epereli 2021, e sevutaki na New World Translation of the Holy Scriptures ena vosa vaCambodia ena kena e tabaki kei na iyaya vakalivaliva. E katoni na porokaramu ni soqo, ra qai sarava na ivavakoso kei na iwasewase lalai kece mai Cambodia. E sevutaka na iVolatabu qo o Brother Kenji Chichii, e lewe ni Komiti ni Tabana e Japani. a

Era vosa vaCambodia e rauta ni 16 na milioni na lewenivanua. E sivia e 1,100 na dautukutuku era veiqaravi ena yalava vosa vaCambodia.

E kaya o Brother Masahiro Harada, e lewe ni Komiti ni Tabana e Japani: “Keitou vakabauta ni iVolatabu qo ena vukei ira na dauwiliwili mera kila na itovo talei ni Kalou, me vaka na loloma, veinanumi kei na veivosoti. Keitou nuitaka ni na yaga vei ira levu na iVolatabu qo, mera mai qaravi Jiova qai lagiti koya.”

Ratou vakadewataka na iVolatabu qo e ono na daunivakadewa ena loma ni va na yabaki. E kaya e dua vei ratou: “E sega ni vakayagataki ena iVolatabu vou qo na vosa makawa. Ia e vakayagataki ga kina na vosa kilai rawarawa qai uqeta na lomaqu. Au lai vakasamataka kina na Same 139:17, e kaya: ‘Sa rui talei gona vei au na nomuni nanuma!’”

E kaya e dua tale na daunivakadewa: “Au nuidei nira na volekati Jiova na mataveitacini nira wilika na iVolatabu vou qo. Era na vakila kina na loloma i Jiova nira galili. Era na lomadei nira sotava na ituvaki leqataki. Era na lomavakacegu nira nuiqawaqawa. Era na vakacegui tale ga nira vakatovolei.”

Eda kila ni iVolatabu qo ena vukei ira e levu tale mera mai kila na Dauveibuli o Jiova. Mera vakalagilagi koya qai vakarokorokotaki koya ena ivakarau ga e ganiti koya.—Vakatakila 4:11.