Ena ika7 ni Me 2023, e vakayacori e Argentina na imatai ni soqo ni tabacakacaka ena vosa vakaWichi. Era marautaka nira rogoca na porokaramu ni soqo e kena ulutaga “iTokani Era Guta na Vakacegu.” E caka ena Vale ni Soqoni ena siti o Tartagal ena yasana o Salta. Era sema tale ga ena soqo qo na tacida, kei na so tale mai na tolu na vanua e Argentina. Era tiko ena soqo qo na le 169, qai papitaiso e le rua.

Era vakaitikotiko e levu na matatamata na Wichi ena vuaira kei Argentina kei na ceva kei Bolivia. Ni oti e tini vakacaca na yabaki, e tauyavu e rua na ivavakoso, tolu na iwasewase lalai kei na ono na iwasewase vou. Era veiqaravi tiko kina e 45 na dautukutuku kei ira eso tale na tacida era vulica na vosa vakaWichi.

E levu era gole mai ena soqo era vakaitikotiko vakayawa. E dua na tacida itabaqase o Paulino, e vakaitikotiko ena rauta na 455 na kilomita mai Tartagal. E vodo basi me 12 na aua me yaco yani ena Vale ni Soqoni. Ni oti na soqo e kaya: “Au sega ni vakamacalataka rawa na levu ni noqu vakavinavinakataki Jiova, kei ira na tacida ena kena vakarautaki na soqo ena noqu vosa ni sucu.”

Eso e se qai imatai ni gauna mera gole ena Vale ni Soqoni mera tiko ena soqo ni tabacakacaka. O Delia e vosa vakaWichi, e tekivu vulica na iVolatabu ena gauna ni matedewa na COVID-19. E taubale me dua na aua kei rau na luvena lalai me yaco ena Vale ni Soqoni. E marautaka vakalevu o Delia me sota ena imatai ni gauna kei na tacida yalewa e vakavulici koya ena iVolatabu!

Na levu ni marau era vakila na tacida era tiko ena imatai ni soqo ni tabacakacaka ena vosa vakaWichi, e dusia ni o Jiova e “mareqeti” ira na yalodina vua.—Same 4:3.