Afe biara, hɛn ahyehyɛdze no tsintsim Bible nye Bible ho nwoma ahorow ɔpepem pii, na yɛkyekyɛ ma amamfo a yenntwa bo biara nnto do. Yɛsan so sisi na yesiesie Ahendzi Asa nye edwumayɛbea nkorbata ahorow. Bio so, yɛhwɛ Bethel ebusuamufo nye asɛmpatserɛwfo mpempem pii, na yɛdze atoyerɛnkyɛm ber mu mboa so ma. Ntsi, ibia ɔbɛyɛ wo nwanwa ma eebisa dɛ, ‘Wɔyɛ dɛn mbɔ tua iyinom nyinara ho kaw?’

Yɛnngyegye tithe, yenntwa tow, na yɛnngyegye kɔlɛhyɛn so. Ɔwɔ mu dɛ asɛmpakã edwuma a yɛreyɛ no ho kaw sõ dze, naaso yɛnnserɛserɛ sika. Bɔbor mfe ɔha a abɛsen kɔ nye yi na Watchtower magazine a ɔtɔ do ebien a wotsintsimii no kãa dɛ, yɛgye dzi dɛ Jehovah na ɔtaa hɛn ekyir ma ntsi “yɛnnkɛserɛserɛ nkorɔfo dɛ wɔmboa hɛn da”​—na yɛnnyɛɛ dɛm so da!​—Matthew 10:8.

Yefi hɛn pɛ mu yi ntoboa dze boa hɛn dwumadzi ahorow no. Nyimpa dodowara kyerɛ Bible nkyerɛkyerɛ edwuma a yɛreyɛ no ho enyisɔ, na woyi ntoboa dze boa. Adasefo no ankasa so fi enyigye mu dze hɔn mber, hɔn ahoɔdzen, hɔn sika nye hɔn ndzɛmba afofor boa ma wɔyɛ Nyankopɔn apɛdze wɔ wiadze nyina. (1 Mbermunsɛm 29:9) Wɔ Ahendzi Asa do nye hɛn ɔmansin nye ɔmantɔw ehyiadzi ahorow ase no, ntoboa ndaka sisi hɔ a hɔn a wɔpɛ dɛ woyi ntoboa no botum ayɛ dɛm. Anaa wobotum afa hɛn wɛbsaet, jw.org no do eyi ntoboa. Mpɛn pii no, hɔn a woyi ntoboa yi yɛ hɔn a wɔnnyɛ ahonyafo. Wɔtse dɛ okunafo hianyi no a Jesus kãa no ho asɛmpa dɛ ɔdze kɔɔbermba ebien koguu asɔrfi sikakorabea no mu no. (Luke 21:1-4) Ntsi, obiara botum ‘etsĩatsia egu ne nkyɛn’ na oeeyi ntoboa mber nyina “dɛ mbrɛ obiara esusu wɔ n’akoma mu.”​—1 Corinthfo 16:2; 2 Corinthfo 9:7.

Yɛwɔ awerɛhyɛmu dɛ Jehovah bɔkɔ do ara epusuw nyimpa a wɔpɛ dɛ wɔdze hɔn ‘ahodze hyɛ no enyimnyam’ dze taa Ahendzi edwuma no ekyir no hɔn akoma, na ama n’apɛdze aayɛ hɔ.​—Mbɛbusɛm 3:9.

• Ebɛnadze na ɔma hɛn ahyehyɛdze no yɛ soronko fi ɔsom ahorow a aka no ho?

• Ebɛnadze na wɔdze ntoboa a yefi hɛn pɛ mu yi no yɛ?