Aka ber tsiabaa ma Jesus ewu no, ɔkãa dɛ: “Na Ahenman ho asɛmpa yi, wɔbɛkã wɔ wiadze nyina dze edzi amanaman nyina dase; na nkyii ewiei no bɛba.” (Matthew 24:14) Naaso wɔbɛyɛ dɛn mbɔ ayɛ dɛm asɛmpakã edwuma yi wɔ wiadze nyina? Gyedɛ wodzi nhwɛdo a Jesus yɛe aber a nna ɔwɔ asaase do no ekyir.​—Luke 8:1.

Yɛbɔ mbɔdzen dɛ yɛbɛkã asɛmpa no akyerɛ nkorɔfo wɔ hɔn efie mu. Jesus tsetsee n’esuafo no ma wɔkãa asɛmpa no wɔ efiefi. (Matthew 10:11-13; Ndwuma 5:42; 20:20) Wɔkyerɛɛ afeha a odzi kan asɛmpakafo no nsaasesin anaa mbea pɔtsẽe bi a nna ɔsɛ dɛ wɔkã asɛmpa no. (Matthew 10:5, 6) Ndɛ so, yɛayɛ nhyehyɛɛ pa a yɛdze yɛ hɛn asɛmpakã edwuma no, na wɔama asafo biara asaasesin a wɔyɛ mu edwuma. Iyi boa hɛn ma yɛkã asɛmpa no kyerɛ nyimpa dodowara dze dzi ahyɛdze a Jesus dze mae dɛ “yɛnkã nkyerɛ ɔman no, na yendzi dase” no do.​—Ndwuma 10:42.

Yɛbɔ mbɔdzen dɛ yɛbɛkã asɛmpa no akyerɛ nkorɔfo wɔ beebiara a yebohu hɔn no. Jesus san yɛɛ nhwɛdo maa hɛn dze nam asɛmpa no a ɔkãa kyerɛɛ nkorɔfo wɔ baguamu no, tse dɛ mpoano, anaa amansuon bura ho. (Mark 4:1; John 4:5-15) Hɛn so, yɛnye nkorɔfo bɔ Bible mu nkɔmbɔ wɔ beebiara a yebotum​—kwan ho, ndwuma ahorow mu, beebi a nyimpa gye hɔn ahom, anaa telefon do. Sɛ yenya hokwan a ɔfata so a, yedzi hɛn efipamfo, edwumamufo, skuulfo nye ebusuafo dase. Dɛm mbɔdzembɔ ahorow yi ama nyimpa ɔpepem pii a wɔwɔ wiadze mfɛndzanan no atse “nkwagye” ho asɛmpa no.​—Ndwom 96:2.

Woananom na ehwɛ a ibotum akã Nyankopɔn Ahendzi no ho asɛmpa nye dza asɛmpa no bɛyɛ ama hɔn daakye no akyerɛ hɔn? Mma mmfa enyidado nkrasɛm yi nnhyɛ woho. Enye hɔn nkyɛ no ntsɛmara!

• Ebɛn “asɛmpa” na ɔsɛ dɛ yɛkã no?

• Jehovah Adasefo reyɛ dɛn esũasũa ɔkwan a Jesus faa do kãa asɛmpa no?