Ɔtɔ da a, ɔyɛ dzen ma wo dɛ ibohu dza ɔyɛ nokwar nye dza ɔnnyɛ nokwar anaa? Ndaansa yi, sɛ nkorɔfo bɛgye biribi edzi a, wogyina mbrɛ wosi tse nka nye ndzɛmba a wonyim do na ɔnnyɛ dɛ wɔbɛma nokwar no akyerɛ hɔn kwan. Iyi ntsi, wɔ wiadze yi mu beebiara no nyimpa piinara ka dɛ nokwar asa.

 Nkorɔfo hyɛɛ ase kaa dɛm asɛm yi no, ɔnnyɛ ndɛ. Mfe 2,000 a abɛsen kɔ no, Roman Ambrado Pontius Pilate bisaa Jesus dɛ: “Nokwar nye ebɛnadze?” (John 18:38) Ɔwɔ mu dɛ Pilate anntweɔn ma Jesus amma no mbuae dze, naaso nna n’asɛmbisa no ho hia paa. Mbuae a Bible no dze ma wɔ dɛm asɛm yi ho no bɛma w’akoma atɔ wo yamu, na obotum aboa wo so ma ehu mbrɛ ibesi ayɛ w’adze wɔ wiadze a no mu nyimpa pii hɔn adwen etu afora yi mu.

Nokwar wɔ hɔ anaa?

 Nyew. Bible no dze kasafua “nokwar” gyina hɔ ma asɛm biara a ɔwɔ ngyinado, na ɔsan ma yehu dɛ biribi ho tsew. Bible no ka dɛ, Jehovah a Nyankopɔn nye nokwar farbaa, ɔno ntsi na wɔfrɛ no “nokwar Nyankopɔn” no. (Ndwom 31:5) Nsɛm a ɔwɔ Bible no mu no yɛ nokwasɛm a ofi Nyankopɔn hɔ, na wɔdze dɛm nokwasɛm yi toto kan ho, osiandɛ ɔkyerɛ hɛn kwan wɔ wiadze a nyimpa piinara hɔn adwen etu afora na wonnhu dza wɔnnyɛ yi mu.​—Ndwom 43:3; John 17:17.

Ebɛyɛ dɛn ehu nokwar no?

 Nyankopɔn mmpɛ dɛ yɛgye nsɛm a ofi Bible no mu no tomu osiandɛ ofi Bible no mu ara kɛkɛ ntsi. Mbom no, nokwasɛm a ɔwɔ Bible no mu no, ɔhyɛ hɛn nkuran dɛ yensusu ho yie ansaana yɛagye edzi na nnyɛ dɛ yɛbɛgye atomu osiandɛ dɛm na yɛtse nka ntsi. (Romefo 12:1) Ɔpɛ dɛ yɛdze hɛn ‘adwen nyina’ dɔ no, na yesua no ho adze. Afei so ɔhyɛ hɛn nkuran dɛ hɛnankasa mbɔ mbɔdzen nnyɛ nokwar no mu nhwehwɛmu na ama yɛatse dza yerusua efi Bible no mu no ase.​—Matthew 22:37, 38; Andw 17:11.

Woana na ɔdze ator bae?

 Bible ka dɛ, Nyankopɔn ne tamfo Satan Abɔnsam na odzii kan dzii ator. Na ɔno na Bible no frɛ no ‘ator egya’ no. (John 8:44) Ɔkaa nsɛm a ɔnnyɛ nokwar faa Nyankopɔn ho kyerɛɛ nyimpa a wodzi kan no. (Genesis 3:1-6, 13, 17-19; 5:5) Ofitsi dɛm aber no, Satan akɔ do ara aka atorsɛm afa Nyankopɔn ho.​—Nyikyerɛ 12:9.

Ebɛnadze ntsi na ndɛ ator ebu do dɛm?

 Bible no frɛ aber a yɛwɔ mu yi dɛ “nda a odzi ekyir,” na mbrɛ Satan redaadaa nkorɔfo no akɔ enyim sen aber biara a abɛsen kɔ. Mpɛn pii na nkorɔfo dzi ator dze daadaa nkorɔfo mbrɛ ɔbɛyɛ a wobenya biribi efi hɔn hɔ. (2 Timothy 3:1, 13) Ndɛ, ndaadaa ebu do wɔ asɔr pii no ara mu. Bible no hyɛɛ ho nkɔm dɛ hɛn aber yi mu no, nkorɔfo ‘bɛpɛ akyerɛkyerɛfo a wɔbɛka nsɛm a ɔbɛyɛ hɔn asowa mu dɛw’, na ‘worinntsie nokwar no bio.’​—2 Timothy 4:3, 4.

Ebɛnadze ntsi na nokwar ho hia?

 Nokwardzi na ɔma anyɛnkofa bi tum gyina. Sɛ nokwardzi nnyi anyɛnkofa anaa ebusuabɔ bi ntamu a, dɛm ebusuabɔ no sɛɛ. Bible no ka dɛ, Nyankopɔn pɛ dɛ yɛsom no nokwar mu. Ɔka dɛ: ‘Ɔsɛ dɛ hɔn a wɔsom Nyankopɔn no som no sunsum nye nokwar mu.’ (John 4:24) Sɛ epɛ dɛ ihu mbrɛ Bible no botum aboa wo ma ehu nkyerɛkyerɛ a ɔyɛ ator na atwe woho efi ho a, kenkan nsɛm a ɔba toatoa do a wɔato dzin “Atorsɛm A Ɔmma Nyimpa Nntum Mmbɛn Nyankopɔn.”

Ebɛnadze ntsi na Nyankopɔn pɛ dɛ muhu nokwar no?

 Nyankopɔn pɛ dɛ inya nkwa, na ɔsɛ dɛ isua noho adze ana enya nkwa. (1 Timothy 2:4) Sɛ ihu dza Nyankopɔn pɛ nye dza ɔmmpɛ na edze dza ɔpɛ no yɛ edwuma a, ɔbɛfa wo nyɛnko. (Ndwom 15:1, 2) Mbrɛ ɔbɛyɛ na nyimpa ehu nokwar no, Nyankopɔn somaa Jesus baa asaase yi do. Nyankopɔn pɛ dɛ yetsie Jesus ne nkyerɛkyerɛ.​—Matthew 17:5; John 18:37.

Nyankopɔn beyi ator efi hɔ anaa?

 Nyew. Nyankopɔn kyir hɔn a wɔdaadaa nkorɔfo mbrɛ ɔbɛyɛ a wobenya biribi efi hɔn hɔ no. Wɔahyɛ bɔ dɛ ɔbɛsɛɛ hɔn a wɔayɛ hɔn adwen dɛ ator ara na wobedzi no nyina efi asaase yi do. (Ndwom 5:6) Sɛ Nyankopɔn yɛ dɛm a, ɔbɛma dɛm asɛm yi so aba mu: ‘Ano a ɔka nokwar no betsim hɔ daa.’​—Mbɛbusɛm 12:19.