Sɛ ekɔ wiadze yi mu beebiara a, amanyɛsɛm ntsi nyimpa pii mu apaapaa. Edwumakuw bi a wɔfrɛ no Pew Research Center yɛɛ nhwehwɛmu bi wɔ aman ahorow 19 mu wɔ afe 2022 mu. Sɛ iyi nyimpa a wɔnye hɔn twetwee nkɔmbɔ no mu 100 biara si hɔ a, hɔn mu 65 na wɔkaa dɛ “hɔn a ɔsor amanyɛkuw a wɔwɔ mu wɔ hɔn man mu no enyi nnhyia koraa anaa mpo dɛ wentwiwentwi wɔ hɔn ntamu.”

 Ana woara so ahyɛ no nsew dɛ mbrɛ amanyɛsɛm dze mpaapaamu reba nkorɔfo mu no, yɛ ara na ɔreyɛ kɛse wɔ beebi a ewɔ no? Ebɛnadze ntsi na wɔaba no dɛm? Aso n’ano edur wɔ hɔ a? Hwɛ dza Bible no ka.

 Bible no frɛ mber a yɛwɔ mu yi “nda a odzi ekyir.” Na ɔkae too hɔ dɛ, wɔ mber a ɔtse dɛm mu no, nyimpa bɛda suban ahorow bi a ɔdze mpaapaamu bɛba edzi.

•   ‘Nda a odzi ekyir no mu no awerɛhow ber bɛba. Na nyimpa bɛyɛ ahopɛfo nye hɔn a wonntum nnye hɔn nnyɛ apam.’​—2 Timothy 3:1-3.

 Ɔwɔ mu dɛ aban mpanyimfo na nyimpa pii reyɛ dza wobotum biara dɛ wɔbɛma ndzɛmba akɔ yie dze, naaso wɔdze bɔ do a ɔmmbɔ. Osiandɛ hɔn adwen nnhyia wɔ ndzɛmba ho ntsi, ɔyɛ dzen ma hɔn dɛ wɔbɔbɔ mu edzi ɔhaw bi ho dwuma, na ɔtɔ da mpo a wonntum mmbɔ mu nnyɛ edwuma koraa. Iyi ntsi ndzɛmba nnkɔ yie. Na iyi ma yehu dɛ asɛm bi a Bible no kae too hɔ dadaada no yɛ nokwar. Ɔkaa dɛ:

•   “Nyimpa dzi ne nyɛnko no do tum dze ma noara no mbusu.”​—Ɔsɛnkafo 8:9.

 Naaso enyigyesɛm nye dɛ, Bible no ma yehu dɛm ɔhaw yi n’ano edur. Ɔno nye dɛ, aban bi reba, na ɔpanyin a ɔda ano no beyi ndzɛmba a ndɛ ɔhaw adasamba no nyinara efi hɔ.

 Bible no ma yehu dɛ, ɔkandzifo a ɔfata paa a obotum eyi ɔhaw a yerihyia nyina efi hɔ nye Jesus Christ. Jesus wɔ tum a ɔdze bɛma asomdwee na koryɛ aba adasamba mu, na ɔpɛ paa so dɛ ɔyɛ dɛm.

•   ‘N’aber do no atseneneefo bɛyɛ prɔmprɔm; na asomdwee pii bɛba.’​—Ndwom 72:7.

•   “Amanaman nyinara bɔsom no.”​—Ndwom 72:11.

 Dza ɔma yɛka dɛ Jesus yɛ ɔkandzifo a ɔfata nye dɛ ɔdwen nyimpa ho, na ɔpɛ dɛ ɔboa hɔn. Hɔn a ɔpɛ dɛ ɔboa hɔn paa nye hɔn a wɔnye hɔn nndzi no yie no.

•   ‘Sɛ ohianyi su a, ɔbɛgye no do; na bɔbɔnyi na obi a onnyi boafo no so. Obohu ɔbrɛfo na ohianyi mbɔbɔr, na ɔbɛgye ehiafo nkwa. Ɔbɛgye hɔn efi nhyɛdo na etsirmɔdzensɛm mu.’​—Ndwom 72:12-14.

 Nyankopɔn n’Ahendzi no yɛ aban a ɔwɔ sor, na Jesus na ɔyɛ do hen. Ibotum esua Ahendzi yi ho adze pii na ehu dza ɔbɛyɛ ama wo daakye, nye dza ibotum ayɛ dze akyerɛ dɛ etaa ekyir.

•   Hwɛ video a wɔato dzin Nyankopɔn N’ahendzi No, Ɔyɛ Ebɛnadze?

•   Kenkan asɛm a wɔato dzin “God’s Kingdom​—A Government With No Corruption.”