M’awofo bohun nokwar no wɔ 1920 mfe no mu, ansaana wɔrowar. Wɔwoo me afe 1939. Aber a meyɛ abofra no, nna yɛwɔ England. Nna menye m’awofo kɔ Christianfo nhyiamu, na ekyir yi medze moho hyɛɛ Theocracy Ɔsom Skuul no mu. Ndɛ na ndɛ nyina mekaa dza osii ber a meyɛɛ mo dwumadzi a odzi kan no; nna ɔsɛ dɛ migyina adakaba bi do ama meetum ehu enuanom no nyinara. Dɛm aber no, nna medzi mfe esia, na sɛ nna moto m’enyi na muhu enuanom mpanyimfo a wɔtsenatsena hɔ no a, nna m’akoma etu.

Sɛ yɛrokɔ asɛnka a, nna me papa kyerɛw dza mebɛkã no gu krataa bi do ma me. Ber a odzi kan a mankotsee mokɔbɔɔ obi n’abow mu wɔ asɛnka mu no, nna medzi mfe awɔtwe. Aber a fiewura no kenkaan krataa a okitsa me, na hɔ no ara ɔgyee “Let God Be True” nwoma no, m’enyi gyee papaapa! Medze mbirika kɔr me papa nkyɛn kɔbɔɔ no amandzɛɛ. Asɛnka edwuma no nye asafo nhyiamu maa m’enyi gyee, na okenyaan ɔpɛ a mowɔ dɛ medze me ber nyinara bɔsom Jehovah no.

Aber a me papa hyɛɛ ase dɛ ɔrekra Ɔweɔn-Aban ama me no, enyigye a nna mowɔ wɔ Bible no ho no bɛyɛɛ kɛse papaapa. Ɔweɔn-Aban biara a ɔbɛba no, nna megye ber kenkan ne nyinara. Iyi hyɛɛ ahotodo a mowɔ wɔ Jehovah mu no dzen, na ɔkaa me ma mihyiraa moho do maa no.

Afe 1950 no, hɛn ebusua no kɔr Theocracy Nkɔenyim Ehyiadzi no bi wɔ New York. Wɔ Yawda, August 3 no, nna asɛntsir a ɔda ehyiadzi no do nye “Asɛmpatserɛw Da.” Dɛm da no Onua Carey Barber a ekyir yi ɔsoom dɛ Akwankyerɛ Kuw no munyi no na ɔmaa esubɔ ho kasa no. Aber a ɔdze ne kasa no reba ewiei no, obisaa esubɔfo no esubɔ ho nsɛmbisa ebien no, nna meka ho ntsi mosoɛree gyinaa hɔ yii ano dɛ, “Nyew!” Dɛm aber no nna  medzi mfe 11 pɛ, naaso muhun dɛ metu anamɔn a no ho hia. Osiandɛ nna minnyim nsu bor ntsi, nna musuro dɛ mibesian nsu a wɔdze bɔ esu no mu. M’egya kuma kegyaa me dur nsu no ho, na ɔmaa me awerɛhyɛmu dɛ biribiara bɛyɛ yie. Ampaara ampaara, muhunii araa nye dɛ wɔabɔ me esu ewie; mese me nan annka nsu no ase mpo. Onua kor suoo mo mu dze me maa onua fofor; kor bɔɔ me esu, nna kor no so maa me do fii nsu no mu. Ofitsi dɛm da no dze besi ndɛ, Jehovah akɔ do akyerɛ me kwan.

Aber a muwiee skuul no, nna mepɛ dɛ meyɛ akwampaae edwuma no, naaso m’akyerɛkyerɛfo hyɛɛ me nkuran dɛ monkɔ skuulpɔn. Wɔdze guu mo do araa ma mokɔr skuulpɔn; naaso wɔannkyɛr biara na muhun dɛ murunntum mmfa m’adwen nnsi dza murusũa wɔ skuul no do na ber kor no ara mennyɛ dzen wɔ nokwar no mu, ntsi misii gyinae dɛ mibegyaa skuul no. Medze asɛm no too Jehovah n’enyim wɔ mpaabɔ mu na mifi obu mu kyerɛɛw krataa kɛmaa m’akyerɛkyerɛfo dɛ, sɛ adzesua afe a odzi kan no ba ewiei a mibegyaa skuul. Medze mo werɛ nyina hyɛɛ Jehovah mu na annkyɛr koraa na mehyɛɛ akwampaae edwuma no ase.

Mehyɛɛ ber nyina som edwuma no ase July 1957 wɔ Wellingborough. Mekãa kyerɛɛ enuanom a wɔwɔ London Bethel no dɛ wɔmma me ɔkwampaaefo bi a noho akokwaa a mubotum nye no abɔ mu ayɛ edwuma. Aber a wɔdze Onua Bert Vaisey maa me no, ɔkyerɛɛ me ndzɛmba pii. Nna ɔyɛ ɔsɛmpakafo a ɔyɛ nsi, na ɔboaa me ma minyaa asɛnka edwuma no ho nhyehyɛɛ pa. Hɛn asafo no, nna menye Onua Vaisey na nkyerɛbaa beesia bi a hɔn mfe akɔ enyim na yɛwɔ mu. Nna misiesie moho ma asafo nhyiamu biara, na mokɔ so a medze moho hyɛ dwumadzi no mu. Dɛm a meyɛe no maa minyaa Jehovah mu ahotodo na minyaa ho kwan a medze bɛda me gyedzi edzi.

Osiandɛ mammpen do dɛ mebɛyɛ nsordaafo edwuma ntsi, wɔdze me kɔtoo efiadze mber kakra. Woyii me ekyir no, mihyiaa ɔkwampaaefo tsitsir bi a wɔfrɛ no Barbara. Yɛwaree wɔ afe 1959 mu. Nna yɛayɛ krado dɛ beebi a wɔbɛkã dɛ yɛnkɔsom biara yɛbɔkɔ. Yedzii kan kɔsomee wɔ Lancashire a ɔwɔ England etsifi-anee afamu. Ɔno ekyir wɔ January 1961 no, wɔtoo nsa frɛɛ me dɛ monkɔ Ahendzi Som Skuul wɔ London Bethel; bosoom kor na wɔdze yɛɛ dɛm skuul yi. Aber a yewiee skuul no, wɔkãa dɛ menkɛyɛ ɔhwɛfo kwantufo; ɔyɛɛ me nwanwa papaapa! Medze adapɛn ebien gyee ntsetsee fii ɔmansin do hwɛfo bi a noho akokwaa hɔ wɔ Birmingham, na wɔmaa kwan ma Barbara bɛkaa mo ho. Iyi ekyir no, yɛsanee kɔr beebi a nna yɛwɔ no kɛhyɛɛ hɛn dwumadzi no ase wɔ Lancashire nye Cheshire mantɔw mu.

Wɔ August 1962 mu no, aber a nna yɛrekɛgye hɛn ahom kakra no, hɛn nsa kaa krataa fii Bethel. Nna dza ɔka krataa no ho nye Gilead Skuul akwambisa ho fɔɔm! Aber a yɛdze asɛm no too Jehovah n’enyim wɔ mpaabɔ mu no, menye Barbara hyehyɛɛ fɔɔm no na yɛsanee dze kɔr Bethel ntsɛmara dɛ mbrɛ nna wɔahyɛ no. Abosoom enum ekyir no, wɔtoo nsa frɛɛ hɛn dɛ yɛnkɔ Gilead wɔ Brooklyn, New York; nna yɛka adzesua  kuw a otsĩa 38 no ho. Abosoom du na wɔdze yɛɛ dɛm skuul yi na yesũaa Bible no.

Nnyɛ Nyankopɔn n’Asɛm nye n’ahyehyɛdze no nko na yesũaa ho adze wɔ Gilead, na mbom yesũaa hɛn wiadze nyina enuayɛkuw no so ho adze. Dɛm aber no, nna yɛda ho ara wɔ hɛn mfe 20 mu. Yesũaa ndzɛmba pii fii hɔn a yɛnye hɔn kɔr skuul no hɔ. Da biara, nna minya ho kwan nye Onua Fred Rusk a ɔyɛ hɛn akyerɛkyerɛfo no mu kor bɔ mu yɛ edwuma. Adze kor a nna ɔtaa twe adwen si do nye dɛ edze afotu bɛma wɔ tsenenee mu, kyerɛ dɛ, ebɔhwɛ ehu dɛ afotu biara a edze bɛma no gyina Kyerɛwnsɛm no do pintsinn. Enuanom a hɔnho akokwaa a wɔbɛmaa ɔkasa ber a nna skuul no rokɔ do no mu bi nye Nathan Knorr, Frederick Franz, nye Karl Klein. Dɛ esuafo no, yesũaa pii fii ahobrɛadze ho nhwɛdo a Onua A. H. Macmillan yɛe no mu. Wɔ ɔkasa a ɔmae mu no, ɔmaa yenyaa ntseasee a ɔkɔ ekyir wɔ akwankyerɛ a Jehovah dze mae wɔ nsɔhwɛ ber no mu, ofi afe 1914 kesi afe 1919 n’ahyɛse no!

Aber a nna skuul no reba n’ewiei no, Onua Knorr kãa kyerɛɛ emi na Barbara dɛ yɛbɔkɔ akɔsom wɔ Burundi a ɔwɔ Africa. Hɔ no ara na yɛdze mbirika kɔr nwomakorabea a ɔwɔ Bethel hɔ no na yekeyii Yearbook hwɛɛ dɛ adawurbɔfo dodow ahen na wɔwɔ Burundi dɛm aber no. Dza ɔyɛɛ hɛn nwanwa nye dɛ, yeennhu ɔman no ho nkontaabu biara wɔ nwoma no mu! Asɛm no ara nye dɛ, nna yɛrekɛyɛ asɛnka edwuma no wɔ ɔman bi a ɔwɔ Africa a wɔnnkãa asɛmpa no wɔ hɔ da; nna yennyim hɔ. Hɔ no ara na hɛn yamu hyee hɛn! Naaso mpaa a yɛbɔe no maa yenyaa akomatɔyamu.

Wɔ hɛn dwumadzi fofor yi mu no, nna biribiara yɛ fofor ma hɛn koraa​—wimu tsebea, amambra, nye kasa a wɔkã no. Afei dze nna ɔsɛ dɛ yɛyer hɛnho sũa French kasa. Afei so, nna beebi a yɛbɛtsena so ayɛ asɛm. Yekodur ɔman no mu nda ebien ekyir no, enuanom a yɛnye hɔn kɔr Gilead no mu kor a wɔfrɛ no Harry Arnott bɛseraa hɛn. Nna ɔresan akɔ Zambia, beebi a ɔsom no. Ɔboaa hɛn ma yenyaa dan a yɛbɛtsena mu na dɛm fie no bɛyɛɛ hɛn asɛmpatserɛwfo fie a odzi kan. Annkyɛr koraa na yehyiaa ɔsoɛrtsia fii etumfo a nna wonnyim Jehovah Adasefo dwumadzi ho hwee koraa no hɔ. Aber a yɛhyɛɛ ase dɛ yerinya enyigye wɔ hɛn dwumadzi no mu no, etumfo no kãa kyerɛɛ hɛn dɛ, sɛ yennyi tum krataa a odzi mũ a wɔdze yɛ edwuma a, yerunntum nntsena ɔman no mu. Awerɛhosɛm nye dɛ, nna ɔsɛ dɛ yetu fi ɔman no mu kɔ ɔman fofor mu. Nna ɔsɛ dɛ yɛkɔ Uganda.

 Osiandɛ nna yennyi tum krataa a yɛdze botu kwan akɔ Uganda ntsi, nna yesuro, naaso yɛdze hɛnho too Jehovah do. Onua bi a ofi Canada a nna ɔrosom wɔ beebi a mboa ho hia kɛse wɔ Uganda no bɔɔ mbɔdzen kyerɛkyerɛɛ hɛn tsebea no mu kyerɛɛ ɔbarimba bi. Nna dɛm ɔbarimba no yɛ hɔn a wɔhwɛ akwantu ho nsɛm do no mu kor, na wɔpeen do dɛ wɔbɛma hɛn abosoom kakra ma yɛdze ayɛ tum krataa a ɔbɛma hɛn kwan ma yeetum atsena ɔman no mu. Dza osii no maa yehun dɛ nna Jehovah roboa hɛn papaapa.

Dɛ mbrɛ nna ndzɛmba tse wɔ Uganda no yɛ soronko koraa fi mbrɛ nna ndzɛmba tse wɔ Burundi no ho. Uganda dze, nna wɔkã Ahendzi ho asɛm no wɔ hɔ dada, naaso nna Adasefo 28 pɛ na wɔwɔ ɔman mũ no nyina mu. Yehyiaa nkorɔfo a nna wɔkã Borɔfo kasa wɔ hɛn asaasesin no mu. Annkyɛr na yebohun dɛ, sɛ yebotum aboa nyimpa a hɔn enyi gye asɛm no ho no ma woeenya nkɔenyim a, annyɛ yie koraa no ɔsɛ dɛ yesũa kasa a wɔkã wɔ ɔman no mu no kor. Yɛhyɛɛ ase dɛ yɛrekã asɛmpa no wɔ Uganda hɔn ahenkurow Kampala mu, nna kasa a wɔkã wɔ hɔ paara nye Luganda. Ntsi yesii gyinae dɛ yebosũa dɛm kasa no. Ɔgyee hɛn mfe pii ana hɛn ano rokokwaa dɛm kasa no ho, naaso iyi boaa hɛn ma yetumii yɛɛ hɛn asɛnka edwuma no yie! Ɔmaa yebohun dza ɔsɛ dɛ yɛyɛ dze boa hɛn Bible esuafo no ma wɔtse nsɛm ase yie. Nna iyi boa hɛn Bible esuafo no so ma wofi hɔn akoma mu kã mbrɛ wosi tse nka wɔ dza worusũa no ho kyerɛ hɛn.

Nna ho kwan a yɛwɔ dɛ yɛbɔhwehwɛ nyimpa ahobrɛadzefo a hɔn enyi gye nokwar no ho no ma hɛn enyi gye. Naaso aber a yenyaa ho kwan dɛ yɛnkɔsom dɛ ahwɛfo akwantufo wɔ ɔman no mu no, hɛn enyigye no yɛɛ kɛse, osiandɛ nna yɛnnhwɛ kwan koraa. Kenya Bethel no maa hɛn akwankyerɛ dɛ, yɛnkɔhwehwɛ mbea ahorow a akwampaaefo etsitsir ho behia paara wɔ ɔman no mu. Mpɛn pii no, nna yehyia nyimpa a wɔda ahɔhoyɛ soronko edzi kyerɛ hɛn; ɔwɔ mu mpo dɛ nna dɛm nkorɔfo yi nnhyiaa Jehovah Adasefo da. Nna wɔgye hɛn fɛw do na wɔyɛ edziban ma hɛn mpo.

Akwantu fofor bi so yii ne tsir. Mokɔfoow keteke twaa nda ebien kwan fii Kampala kɔr Kenya po do hɛn gyinabea a ɔwɔ Mombasa no. Afei, mekɛfaa po do hɛn toaa akwantu no do kɔr Seychelles. Ɔyɛ nsupɔw nketsenketse bi a ɔwɔ India Po no do na wɔka hɔn bɔ mu frɛ hɔn dɛm. Ekyir yi, ofi afe 1965 kesi afe 1972 no, nna aber biara a mobɔkɔ Seychelles no menye Barbara kɔ. Dɛm aber no, nna adawurbɔfo beenu pɛ na wɔwɔ hɔ, naaso ekyir yi hɔn dodow no kɔr enyim ma wɔbɛyɛɛ kuw na ewiei koraa no wɔbɛdaan asafo. Mututuu akwan kɔr mbea afofor so tse dɛ Eritrea, Ethiopia, nye Sudan kɛseraseraa enuanom a wɔwɔ hɔ no.

Uganda amambu no sesae, osiandɛ nsordaafo kuw bi bɔɔ pɔw tuu aban no gui. Basabasayɛ a ɔkɔr do mfe pii no maa muhun dɛ nyansa wɔ mu papaapa dɛ yɛdze afotu a ɔnye dɛ, “Hom ndan dza ɔyɛ Caesar dze mma Caesar” no bɛyɛ edwuma. (Mark 12:17) Mber bi mu, wɔhyɛɛ mbra dɛ ahɔho a wɔwɔ ɔman no mu nyinara nkɛkyerɛw hɔn edzin wɔ poris steehyɛn a ɔbɛn beebi a wɔtse no. Ntsɛmara na yɛkɛkyerɛɛw hɛn edzin. Nda kakraabi ekyir no, aber a menye asɛmpatserɛwnyi bi dze kaar nam Kampala kurow mu no, sum ase aporisifo gyinaa hɛn. Hɛn akoma tui papa! Wɔbɔɔ hɛn sombo dɛ yɛyɛ akwanserafo na wɔdze hɛn kɔr poris steehyɛn kɛse a ɔwɔ hɔ no. Hɔ na yɛkyerɛɛ mu kyerɛɛ hɔn dɛ yɛyɛ asɛmpatserɛwfo a yɛmmpɛ hɛnho asɛm. Yɛkãa hɛn anomu asɛm nyina dɛ yeedzi kan akɛkyerɛw hɛn edzin wɔ poris steehyɛn, naaso nna ne nyina gu hɔn asowa ekyir. Ntsi wɔmaa porisinyi kor a okitsa akodze nye hɛn kɔr poris steehyɛn a ɔbɛn beebi a yɛtse no.  Yedur hɔ no, saana porisinyi a ɔtse pon ho no ahyɛ hɛn nsew dɛ yeedzi kan abɛkyerɛw hɛn edzin. Ntsi ɔkãa kyerɛɛ porisinyi a ɔnye hɛn kɔree no dɛ ongyaa hɛn ma yɛnkɔ. Hɛn enyi gyee papa!

Dɛm mber no mu no, nna ɔtaa ba dɛ nsordaafo si ban wɔ kwan mu, na sɛ ɔba no dɛ yehyia hɔn, nkanka hɔn a wɔanom nsa abobow no a, nna hɛn nson gu gya mu dɛmara. Naaso, aber biara a yebehyia hɔn no, nna yɛbɔ mpaa; ebɔhwɛ na wɔama hɛn kwan ma yeetwa mu kɔ. Sɛ ɔba no dɛm a, nna hɛn akoma atɔ hɛn yamu. Awerɛhosɛm nye dɛ, wɔ afe 1973 mu no, wɔhyɛɛ dɛ asɛmpatserɛwfo a wɔyɛ ahɔho nyina mfi Uganda.

Ɔbaa no dɛm no, wɔsesaa hɛn dwumadzi bio; dɛm aber yi dze wɔdze hɛn kɔr Côte d’Ivoire a ɔwɔ Africa Anee afamu. Nna iyi hwehwɛ dɛ yɛyɛ nsesa ahorow. Nna ɔsɛ dɛ yesũa hɔn amambra, yɛsan kã French na yesũa mbrɛ yebesi nye asɛmpatserɛwfo a ɔsor ɔman a obiara fi mu no atsena! Ha so, yehun dɛ Jehovah rekyerɛ hɛn kwan, osiandɛ nyimpa akomapafo a wɔwɔ asaasesin no mu a wɔbrɛ hɔnho adze no gyee asɛmpa no ntsɛmdo. Menye me yer nyina hun dɛ ahotodo a yenyae wɔ Jehovah mu no maa ɔkyerɛɛ hɛn kwan.

Naaso awerɛfir mu ara ɔbɛdaa edzi dɛ Barbara enya kokoram. Yetutuu akwan kɔr amanandze mbrɛ ɔbɛyɛ a obenya ayarsa, naaso ne nyina ennkesi hwee, ntsi wɔ afe 1983 mu no yehun dɛ yerunntum nnkɔ do nnsom wɔ Africa. Iyi maa hɛn abaw mu bui papaapa!

Yɛkɔsomee wɔ London Bethel; yɛwɔ hɔ no Barbara ne yarba no mu yɛɛ dzen na ekyir yi owui. Enuanom a wɔwɔ Bethel no boaa me papaapa. Awarfo bi boaa me ma meyɛɛ nsakyer mbrɛ ɔbɛyɛ a mubotum akɔ do dze moho ato Jehovah do. Ekyir yi, mihyiaa akyerɛbaa bi a nna ofi fie bɛyɛ edwuma wɔ Bethel; nna ɔasom dɛ ɔkwampaaefo tsitsir pɛn na ɔdɔ a ɔwɔ ma Jehovah no da no edzi dɛ noho akokwaa. Mowaar Ann wɔ afe 1989 mu, na ofi dɛm aber no reba no yɛakɔ do asom wɔ London Bethel.

Ofi afe 1995 kesi afe 2018 no, minyaa ho kwan soom dɛ wiadze nyina edwumayɛbea tsir ananmusinyi (mber bi a etwa mu no nna wɔfrɛ no zone overseer); mututuu akwan kɔr aman bɛyɛ 60 do. Ɔman biara a mokɔr mu no, muhun dɛ Jehovah hwɛ no nkorɔfo ɔmmfa ho dza ɔbɔto hɔn biara.

Wɔ afe 2017 mu no, me nserahwɛ no dze me kopuee Africa bio. Aber a menye Ann kɔr Burundi na yehun nkɔenyim a woenya no ɔyɛɛ hɛn nwanwa na hɛn enyi gyee papaapa! Beebi a nna meyɛ efiefi asɛnka edwuma no wɔ afe 1964 mu tɔnn no, ndɛ kɔhwɛ, woesi Bethel wɔ hɔ a ɔhwɛ adawurbɔfo bɔbor 15,500 a wɔwɔ ɔman no mu no do.

Aber a me nsa kaa nhyehyɛɛ a wɔayɛ ama me nserahwɛ no wɔ afe 2018 mu no, m’enyi gyee papaapa. Nna Côte d’Ivoire ka aman a mobɔkɔ akɛsera hɔn no ho. Aber a yedur hɔn kuropɔn Abidjan no, nna ɔtse dɛ mbrɛ maba fie. Yɛkɔsoɛe wɔ Bethel, na aber a mohwɛɛ krataa a enuanom a wɔyɛ edwuma wɔ hɔ no hɔn fon nɔmba wɔ do no, muhun dɛ onua a ɔwɔ dan a ɔtoa hɛn do no mu no ne dzin dze Sossou. Mekaa dɛ ber a nna mosom wɔ Abidjan no, nna ɔsom dɛ kurow do hwɛfo. Naaso saana ɔnnyɛ ɔno bi a na mbom ne ba a.

Jehovah edzi no bɔhyɛ do. Nsɛndzendzen a mafa mu no ama mehu dɛ sɛ yɛdze hɛnho to Jehovah do a, ɔbɛkyerɛ hɛn kwan ampa. Seseiara dze yeesi hɛn bo dɛ yɛbɔkɔ do asom Jehovah ekesi dɛ ɔbɛkyerɛ hɛn kwan akɔ no wiadze fofor no mu.​—Mbɛ. 4:18.