Oho, biribiara nnyi Bible no anaa abakɔsɛm nwoma mu a ɔkyerɛ dɛ nna wɔyɛ biribi a ɔtse dɛm.

Mbrɛ Bible nkyerɛase piinara akyerɛ dɛm kyerɛwsɛm yi ase no ama binom enya adwen dɛ, wɔ Paul n’aber do no, nna wotum bɔ binom esu ma ewufo. Dɛ nhwɛdo no, nkyerɛase bi kã dɛ: “Ɔnntse dɛm a, hɔn a wonuma hɔn ma ewufo no wɔbɛyɛ dɛn?”

Naaso, hwɛ nsɛm a Bible ho abemfo beenu bi kãe. Dr. Gregory Lockwood kãa dɛ, dɛm asɛm a ɔnye dɛ nna “binom gyina ewufo ananmu ma wonuma hɔn ma ewufo” no dze, “wonnyae nnhun enuma biara wɔ abakɔsɛm nwoma anaa Bible no mu a ɔnye no dzi nsɛ.” Dɛmara so na Ɔbemfo Gordon D. Fee kyerɛɛw dɛ: “Dɛm enuma yi, no ho nhwɛdo biara nnyi abakɔsɛm nwoma anaa Bible no mu. Sɛ biribi dɛm kɔr do dze a, nna ɔnodze wɔnnkãa ho asɛm biara wɔ Ahyɛmu Fofor no mu; adanse biara nnyi hɔ a ɔkyerɛ dɛ nna Christianfo a wodzi kan no yɛ biribi a ɔtse dɛm, na biribiara so nnyi hɔ a ɔkyerɛ dɛ asɔr ahorow a wodzii hɔn ekyir bae no so yɛɛ biribi dɛm.”

Bible no kã dɛ, nna ɔsɛ dɛ Jesus n’ekyirdzifo no ‘yɛ amanaman nyina n’esuafo, na wonuma hɔn, na wɔkyerɛkyerɛ hɔn ma wodzi dza ɔahyɛ hɔn no nyina do.’ (Matt. 28:19, 20) Ntsi ansaana wobotum enuma obi ma ɔaabɛyɛ Jesus no suanyi no, ohia dɛ odzi kan sũa Jehovah nye ne Ba no ho adze, ɔgye hɔn dzi, na odzi hɔn asɛm do. Obi a oewu ma ɔhyɛ adakamaa mu dze, orunntum nntu dɛm anamɔn ahorow yi, na Christiannyi a ɔtse ase so runntum nnyɛ dɛm mma no.​—Ɔsɛnk. 9:5, 10; John 4:1; 1 Cor. 1:14-16.

Ɔnodze, nna ebɛn asɛm paara na Paul rekã?

Nna Corinthfo binom kã dɛ ewufo rinnya owusoɛr biara. (1 Cor. 15:12) Paul bɔɔ dɛm nkyerɛkyerɛ yi gui dɛ ɔyɛ ator. Ɔkãa nankasa no ho asɛm dɛ ‘owu daa.’ Nna iyi nnkyerɛ dɛ owui ankasa osiandɛ nna ɔda ho tse ase. Mbom no, nna ɔrekã dɛ da biara nna ohyia tsebea a ɔdze no nkwa to esian mu, naaso ne nyina ekyir no, nna ɔwɔ awerɛhyɛmu dɛ sɛ owu mpo a, tse dɛ Jesus no, ɔno so wobenyan no dɛ sunsum abɔdze ma ɔaakɔ sor.​—1 Cor. 15:30-32, 42-44.

Nna ɔsɛ dɛ Corinthfo no tse ase dɛ, sɛ wɔdze sunsum sera Christiannyi bi a, dza ɔkyerɛ nye dɛ obehyia nsɔhwɛ da biara da, na afei so ohia dɛ owu ansaana woetum enyan no ma ɔaakɔ sor. Sɛ ‘wonuma obi hyɛ Christ Jesus mu’ a, ɔkyerɛ dɛ ‘woenuma no ahyɛ Christ no wu mu.’ (Rom. 6:3) Iyi kyerɛ dɛ, sɛ wonuma obi wɔ dɛm kwan yi do a, tse dɛ Jesus no, dɛm nyimpa no behyia nsɔhwɛ na afei oeewu ansaana woenyan no ma ɔaakɔ sor.

Aber a wonumaa Jesus wɔ nsu mu no, bɔbor mfe ebien ekyir no, ɔkãa kyerɛɛ n’asomafo no mu beenu dɛ: “Enuma a wɔdze numa me no, wɔdze bonuma hom.” (Mark 10:38, 39) Aber a Jesus kãa dɛm asɛm yi no, nna worunnuma no wɔ nsu mu. Mbom nna ɔrepɛ akyerɛ dɛ n’emudzi mu a okura no bɔkɔ ekowie owu mu. Paul kyerɛɛw dɛ, hɔn a wɔasera hɔn no ‘nye no hu amandze ama wɔaahyɛ wɔnye no enyimnyam.’ (Rom. 8:16, 17; 2 Cor. 4:17) Iyi kyerɛ dɛ no ho hia dɛ hɔn so wowu ana woeenyan hɔn akɔ sor.

Iyi ntsi, yebotum akyerɛ Paul n’asɛm a ɔkãe no ase yie dɛ: “Ɔnntse dɛm a, hɔn a wonuma hɔn kɔ owu mu no, wɔbɛyɛ dɛn? Sɛ ewufo nnyan koraa a, ɔyɛ dɛn na wonuma hɔn kɔ owu mu?”