1. Ebɛnadze na obotum aboa hɛn ma hɛn enyi aagye Bible mu nkɔnhyɛ ho?

 ONUA aberantsɛ bi a wɔfrɛ no Ben kaa dɛ: “M’enyi gye ho dɛ mubosua Bible mu nkɔnhyɛ.” Ana woara so w’enyi gye ho? Anaadɛ ɔwodze etse nka dɛ Bible mu nkɔnhyɛ yɛ dzen ntsi w’enyi nngye ho papa? Bi mpo a etse nka dɛ no sua nnyɛ dɛw. Naaso sɛ isua siantsir a Jehovah maa wɔkyerɛɛw nkɔnhyɛ ahorow wɔ Bible no mu a, bi a w’enyi bɛgye ho.

2. Ebɛnadze na yebosusu ho wɔ adzesua yi mu?

² Adzesua yi mu no, yɛbɔhwɛ siantsir a ɔsɛ dɛ yesua Bible mu nkɔnhyɛ. Afei so, yɛbɔhwɛ kwan a yebotum afa do ayɛ dɛm. Bio so, yɛbɔhwɛ nkɔnhyɛ ebien bi a ɔwɔ Daniel nwoma no mu, na yaahwɛ mbrɛ sɛ yɛtse dɛm nkɔnhyɛ no ase a, ɔbɔboa hɛn ndɛ no.

3. Sɛ yebotum atse Bible mu nkɔnhyɛ ase a, ebɛnadze na ɔsɛ dɛ yɛyɛ?

³ Sɛ yebotum atse Bible mu nkɔnhyɛ ase a, gyedɛ yɛhwehwɛ mboa. Ɔwodze ma yɛnyɛ dɛm mfatoho yi. Fa no dɛ enye wo nyɛnko bi rokɔ beebi a innyim hɔ. Naaso wo nyɛnko no dze, onyim hɔ paa. Onyim beebi pɔtsee a hom wɔ, na onyim beebi a akwan a ɔdeda hɔ no mu biara so kɔ. Ekyingye biara nnyi ho dɛ w’enyi bɛgye paa dɛ wo nyɛnko no nye wo kɔree! Jehovah tse dɛ dɛm nyɛnko no, osiandɛ onyim mber pɔtsee a yɛwɔ mu nye dza obesi daakye. Dɛm ntsi sɛ yebotum atse Bible mu nkɔnhyɛ ase a, ɔsɛ dɛ yɛbrɛ hɛnho adze na yɛserɛ Jehovah dɛ ɔmboa hɛn ma yɛntse ase.​—Dan. 2:28; 2 Pet. 1:19, 20.

4. Ebɛnadze ntsi na Jehovah maa wɔkyerɛɛw nkɔnhyɛ ahorow wɔ Bible no mu? (Jeremiah 29:11) (Hwɛ mfonyin no so.)

⁴ Ɔwofo pa biara pɛ dɛ osi ne mba yie daakye. Dɛmara so na  Jehovah pɛ dɛ osi hɛn yie daakye. (Kenkan Jeremiah 29:11.) Naaso Jehovah nntse dɛ awofo a wonnyim dza obesi daakye no. Ɔnodze, onyim dza obesi daakye na dza ɔka biara so ba mu pɛpɛɛpɛ. Ɔama wɔakyerɛw nkɔnhyɛ ahorow wɔ n’Asɛm no mu mbrɛ ɔbɛyɛ a yebohu ndzɛmba etsitsir bi a obesisi ansaana woesisi. (Isa. 46:10) Bible mu nkɔnhyɛ yɛ akyɛdze a hɛn sor Egya no efi ɔdɔ mu dze ama hɛn. Naaso yebesi dɛn agye edzi paa dɛ dza Bible aka no bɛba mu ampa?

5. Sɛ eyɛ ɔbabun a, ebɛnadze na ibotum esua efi Max n’asɛm no mu?

⁵ Nyimpa a wɔmmfa Nyankopɔn ne mbra nnyɛ hwee no na woetwa hɛn mbofra a wɔkɔ skuul no ho ehyia. Mbrɛ dɛm nkorɔfo yi si bɔ hɔn bra nye nsɛm a wɔka no botum ama hɛn mbofra no adwen mu ayɛ hɔn naa wɔ dza wɔgye dzi no ho. Hom mma yensusu onua bi a wɔfrɛ no Max n’asɛm no ho nhwɛ. Ɔkaa dɛ: “Aber a meyɛ aberantsɛba no, m’adwen mu yɛɛ me naa wɔ nokwar a nna m’awofo dze rekyerɛkyerɛ me no ho. Afei so, nna m’adwen nnsi me pi dɛ Nyankopɔn na ɔmaa wɔkyerɛɛw Bible no.” Ebɛnadze na n’awofo yɛe wɔ ho? Max kaa dɛ: “Nna asɛm yi haw m’awofo paa naaso wonyaa moho abotar.” Awofo no dze Bible no boaa hɔn ba no ma onyaa nsɛm a nna ɔhaw no no ho mbuae. Max nankasa so yɛɛ biribi dze boaa noho. Ɔkaa dɛ: “Mankasa megyee ber suaa Bible mu nkɔnhyɛ, na menye enuanom mbabun a wɔwɔ asafo no mu no bɔɔ dza musuae no ho nkɔmbɔ.” Ebɛnadze na ofii dza ɔyɛe no mu bae? Max toaa do dɛ: “Aber a meyɛɛ dɛm no, mebɛgyee too mu dɛ Nyankopɔn na ɔmaa wɔkyerɛɛw Bible no!”

6. Sɛ w’adwen mu yɛ wo naa a, ebɛnadze na ɔsɛ dɛ eyɛ, na ebɛnadze ntsi a?

⁶ Dɛ mbrɛ ɔtoo Max no, sɛ woara so w’adwen mu yɛ wo naa wɔ dza Bible no ka no ho a, mma mma ɔnnhaw wo. Naaso ɔsɛ dɛ eyɛ ho biribi. Yebotum dze adwen mu naayɛ atoto nkandar ho. Sɛ biribi a ɔsom bo we nkandar na wɔannyɛ ho hwee a, nkakrankakra ɔbɛsɛɛ koraa. Sɛ yebotum eyi adwen mu naayɛ a ɔtse dɛ “nkandar” no efi hɛn gyedzi ho a, ɔsɛ dɛ yebisa hɛnho dɛ, ‘Dza Bible no ka fa daakye ho no, megye dzi anaa?’ Sɛ enngye nndzi a, nna ɔno ɔsɛ dɛ isua Bible mu nkɔnhyɛ ahorow a aba mu dada no ho adze. Ibesi dɛn ayɛ dɛm?

7. Ebɛn nhwɛdo na Daniel yɛe a obotum aboa hɛn ma yeehu kwan a yɛbɛfa do esua Bible mu nkɔnhyɛ? (Daniel 12:10) (Hwɛ mfonyin no so.)

⁷ Nhwɛdo pa a Daniel yɛe no botum aboa hɛn ma yeehu kwan a yɛbɛfa do esua Bible mu nkɔnhyɛ. Ɔdze adwen pa suaa nkɔnhyɛsɛm no, osiandɛ nna ɔpɛ dɛ ohu nokwar no. Afei so, nna Daniel brɛ noho adze, osiandɛ nna onyim dɛ hɔn a wonyim Jehovah na wɔdze ne mbra bɔ hɔn bra no, ɔbɛma woenya ntseasee. (Dan. 2:27, 28; kenkan Daniel 12:10.) Daniel hwehwɛɛ Jehovah no hɔ mboa dze kyerɛɛ dɛ ɔbrɛ noho adze. (Dan. 2:18) Adze fofor so a Daniel yɛe nye dɛ ɔyɛɛ nhwehwɛmu kɔr ekyir. Ɔyɛɛ Kyerɛwnsɛm a nna ɔwɔ n’aber do no mu nhwehwɛmu kɔr ekyir. (Jer. 25:11, 12; Dan. 9:2) Ebɛnadze na ibotum ayɛ dze esuasua Daniel?

8. Ebɛn adwen na binom dze sua Bible mu nkɔnhyɛ, na hɛn so ɛ?

 ⁸ Ebɛn adwen na edze rusua Bible mu nkɔnhyɛ? Ana epɛ paa dɛ ihu Bible mu nokwar ntsi na irusua? Sɛ dɛm na ɔtse a, nna ɔno Jehovah bɔboa wo ma aatse ase. (John 4:23, 24; 14:16, 17) Naaso binom wɔ hɔ a, adwen fofor koraa na wɔdze sua Bible mu nkɔnhyɛ. Hɔn adwen nye dɛ, bi a wobenya biribi egyina do aka dɛ nnyɛ Nyankopɔn na ɔmaa wɔkyerɛɛw Bible no. Wosusu dɛ, sɛ wonya ara nya biribi gyina do a, afei dze hɔnankasa botum akyerɛ dza ɔyɛ papa na bɔn. Naaso hɛn dze, ɔsɛ dɛ yɛdze adwen pa sua Bible mu nkɔnhyɛ. Ɔno da nkyɛn a, suban tsitsir bi so botum aboa hɛn ma yaatse Bible mu nkɔnhyɛ ase.

9. Sɛ yɛpɛ dɛ yɛtse Bible mu nkɔnhyɛ ase a, ebɛn su na yehia? Kyerɛkyerɛ mu.

⁹ Brɛ woho adze. Jehovah aka dɛ ɔbɔboa hɔn a wɔbrɛ hɔnho adze no. (Jas. 4:6) Ntsi sɛ yɛpɛ dɛ yɛtse Bible mu nkɔnhyɛ ase a, ɔsɛ dɛ yɛbrɛ hɛnho adze na yɛserɛ no dɛ ɔmboa hɛn. Afei so, akowaa nokwafo no a Jehovah nam no do ma hɛn edziban wɔ ber a ɔsɛ mu no, ɔsɛ dɛ yɛbrɛ hɛnho adze na yɛgye to mu dɛ yehia hɔn so hɔn mboa. (Luke 12:42) Yenyim dɛ Jehovah nnyɛ sakasaka Nyankopɔn, ntsi ntseasee wɔ mu dɛ ɔnam kwan kor pɛ do boa hɛn ma yɛtse nokwasɛm a ɔwɔ Bible mu no ase.​—1 Cor. 14:33; Eph. 4:4-6.

10. Ebɛnadze na isua fi Esther n’asɛm no mu?

¹⁰ Yɛ nhwehwɛmu kɔ ekyir. Fa nkɔnhyɛ a w’enyiwa gye ho hyɛ ase. Dɛm na akyerɛbaa bi a wɔfrɛ no Esther yɛe. Nna n’enyiwa gye nkɔnhyɛ a ɔfa Messiah no ne mbae no ho. Ɔkaa dɛ: “Aber a midzii mfe 15 no, mehyɛɛ ase dɛ morohwehwɛ adanse a ɔkyerɛ dɛ wɔhyɛɛ dɛm nkɔm ahorow no ansaana Jesus reba.” Osuaa Po A Ewu Nwoma Mbobɔwee no ho adze, na dza ohunii no maa ɔbɛgyee nkɔnhyɛ a ɔfa Messiah no ne mbae no ho no dzii paa. Ɔdze kaa ho dɛ: “Nwoma no mu bi wɔ hɔ a, wɔkyerɛwee ana Christ reba, ntsi ɔnyɛ dɛn ara a, nkɔnhyɛ a ɔwɔ mu no fi Nyankopɔn hɔ.” Esther kaa dɛ: “Nna ɔsɛ dɛ mekenkan nsɛm no mpɛn pii ansaana matse ase.” Naaso n’enyi agye paa dɛ ɔyeer noho yɛɛ dɛm. Aber a Esther yɛɛ Bible mu nkɔnhyɛ ahorow bi mu nhwehwɛmu kɔr ekyir no, ɔkaa dɛ, “Afei dze, mehu paa dɛ dza Bible no ka biara yɛ nokwar!”

11. Sɛ yehu mbrɛ Bible mu nkɔnhyɛ si ba mu no a, ɔboa hɛn dɛn?

¹¹ Sɛ yehu mbrɛ Bible mu nkɔnhyɛ ahorow bi esi aba mu no a, ɔma ahotodo a yɛwɔ wɔ Jehovah nye akwankyerɛ a ɔdze ma hɛn no mu no yɛ kɛse. Afei so, ɔmmfa ho ɔhaw biara a yerihyia no, Bible mu nkɔnhyɛ boa hɛn ma yɛdze enyigye hwɛ daakye papabi kwan. Dze besi ha yi, hom mma yɛnhwɛ nkɔnhyɛ ebien bi a ɔwɔ Daniel nwoma no mu a orinya ne mbamu. Sɛ yɛtse dɛm nkɔnhyɛ no ase a, ɔbɔboa hɛn ma yeesisi gyinae pa.

12. Ohonyi no n’anansa a ɔyɛ ‘dadze a wɔdze afora awendɛtse’ no gyina hɔ ma ebɛnadze? (Daniel 2:41-43)

¹² Kenkan Daniel 2:41-43. Daa a Ɔhen Nebuchadnezzar soe a Daniel kyerɛɛ ase no mu no, nna ohonyi no n’anansa no yɛ ‘dadze a wɔdze  afora awendɛtse.’ Sɛ yɛdze nkɔnhyɛ yi toto nkɔnhyɛ afofor a ɔwɔ Daniel na Nyikyerɛ nwoma no mu no ho a, yebotum aka dɛ anansa no gyina hɔ ma Anglo-America aban a odzi wiadze nyinara do tum ndɛ no. Daniel kaa dɛm aban yi ho asɛm dɛ, “ahendzi no mu fa bɛyɛ dzen, na fa so bɛyɛ mberɛw.” Ebɛnadze ntsi na ahendzi yi ne fa bɛyɛ mberɛw? Siantsir no nye dɛ, awendɛtse a ogyina hɔn ma adasa asefo no mma dɛm aban yi kwan ma ɔnnda no ho edzi dɛ dadze. b

13. Ebɛn nokwasɛm etsitsir na nkɔnhyɛ a yɛaka ho asɛm yi ma yehu?

¹³ Yebotum esua nokwasɛm etsitsir bi efi ohonyi no ho nkyerɛkyerɛmu a Daniel dze mae no mu, nkanka ohonyi no n’anansa no. Odzi kan, Anglo-America Wiadze Tumdzi no ayɛ ndzɛmba ahorow bi dze akyerɛ dɛ ɔwɔ tum paa. Dɛ nhwɛdo no, aman a wodzii konyim wɔ Wiadze Ko I nye Wiadze Ko II no nyina mu no, nna Britain na America a wɔka bɔ mu yɛ Anglo-America no dzi akotsen wɔ mu paa. Naaso amamfo a odzi hɔn do tum no ama aban yi no tumdzi no ayɛ mberɛw, na ɔbɔkɔ do ayɛ mberɛw. Siantsir nye dɛ, amamfo no nye hɔnho ko, na wɔyɛ ɔyɛkyerɛ tsia aban no. Otsia ebien, sɛ Nyankopɔn n’Ahendzi no ba dɛ ɔrebɛsɛɛ nyimpa ahendzi nyina a, Anglo-America Wiadze Tumdzi no na ɔbɛba abɔto no dɛ oridzi tum. Ɔwɔ mu dɛ ɔtɔ da a aman ahorow bi soɛr tsia Anglo-America Wiadze Tumdzi no dze, naaso wonnkotum edzi no do konyim da. Siantsir a yɛreka dɛm nye dɛ, ɔbo no a ogyina hɔ ma Nyankopɔn n’Ahendzi no bobubu ohonyi no n’anansa a ogyina hɔ ma Anglo-America aban no.​—Dan. 2:34, 35, 44, 45.

14. Nkɔnhyɛ a ɔfa ohonyi no n’anansa a ɔyɛ dadze na dɛtse no ho no, sɛ yɛtse ase a, ebɛn kwan do na ɔbɔboa hɛn ma yeesisi gyinae pa?

¹⁴ Ana egye dzi paa dɛ Daniel no nkɔnhyɛ a ɔfa ohonyi no n’anansa a ɔyɛ dadze na dɛtse a woedzi afora no ho no yɛ nokwar? Sɛ dɛm a, ɔbɛka gyinae a isisi wɔ w’asetsena mu no. Erennsɛɛ wo ber nnhwehwɛ asetsena mu ndzɛmba pii wɔ wiadze a ɔregye nda ewu yi mu. (Luke 12:16-21; 1 John 2:15-17) Sɛ yɛtse nkɔnhyɛ yi ase a, ɔbɔboa hɛn ma yeehu dɛ no ho hia dɛ yɛyer hɛnho wɔ asɛnka nye ɔkyerɛkyerɛ edwuma no mu. (Matt. 6:33; 28:18-20) Seseiara a yeesusu nkɔnhyɛ yi ho kakra yi, ibotum ebisa woho dɛ, ‘Ana gyinae a misisi no kyerɛ dɛ megye dzi paa dɛ ɔrennkyɛr na Nyankopɔn n’Ahendzi no abɛsɛɛ nyimpa aban nyinara?’

15. Ndɛ, woananom nye ‘etsifi afamu hen’ no na ‘anaafo afamu hen’ no? (Daniel 11:40)

¹⁵ Kenkan Daniel 11:40. Daniel tsir 11 no ka ahemfo beenu anaa aban ebien bi a wɔnye hɔnho dzi esi dze hwehwɛ wiadze tumdzi no ho asɛm. Sɛ yɛdze nkɔnhyɛ yi toto nkɔnhyɛ afofor a ɔwɔ Bible mu no ho a, yebotum aka dɛ Russia na aman a wɔka no ho no nye ‘etsifi afamu hen’ no, nna Anglo-America Wiadze Tumdzi no so nye ‘anaafo afamu hen’ no. c

16. Ebɛn ɔhaw na Nyankopɔn n’asomfo a wɔtse aman a ‘etsifi afamu hen’ no dzi do tum no rihyia?

¹⁶ Nyankopɔn n’asomfo a wɔtse aman a ‘etsifi afamu hen’ no dzi do tum no rihyia ɔsoɛrtsia a no mu yɛ dzen wɔ ɔhen yi ne nsa ano. Ndɛ, hɛn nuanom binom wɔ hɔ a osian hɔn gyedzi ntsi wɔbor hɔn na wɔdze hɔn gu efiadze. Ɔhaw a ‘etsifi afamu hen’ no dze ba hɛn nuanom do no mma hɔn gyedzi nnhinhim, mbom ɔma hɔn gyedzi kɔ do yɛ dzen. Ebɛnadze ntsi a? Osiandɛ enuanom yi nyim dɛ ɔsoɛrtsia a Nyankopɔn no nkorɔfo hyia no ma nkɔnhyɛ bi a ɔwɔ Daniel  nwoma no mu nya ne mbamu. d (Dan. 11:41) Sɛ yɛtse ase dɛm a, ɔbɔboa hɛn ma yeekura hɛn enyidado mu pintsinn, na yaakɔ do edzi Jehovah nokwar.

17. Ebɛn ɔhaw na Nyankopɔn n’asomfo a wɔtse aman a ‘anaafo afamu hen’ no dzi do tum no ehyia?

¹⁷ Mber bi a woetwa mu no, ‘anaafo afamu hen’ no so soɛree tsiaa Jehovah n’asomfo. Dɛ nhwɛdo no, aber a Wiadze Ko I nye Wiadze Ko II rokɔ do no, osiandɛ enuanom ammfa hɔnho annhyɛ akodzi no mu ntsi, wɔdze hɔn pii koguu efiadze. Afei so, woyii Adasefo mba a nna wɔkɔ skuul no mu binom edzi osiandɛ woennkyia frankaa ntsi. Naaso ndaansa yi dze, ɔhaw a Jehovah n’asomfo a wɔtse aman a ɔhen yi dzi do tum no hyia no nntse dɛ nkan no dze no, na iyi so ma ɔyɛ dzen ma hɔn dɛ wɔdze hɔn akoma nyinara bɛtaa Nyankopɔn n’Ahendzi no ekyir. Dɛ nhwɛdo no, sɛ abatow ber so a, annhwɛ a Jehovah no somfo bi n’adwen bɛyɛ no dɛ amanyɛkuw bi ye sen fofor, anaa nyimpa bi a oegyina dɛ wɔntow aba mma no no fata  kyɛn hɔn a wɔaka no. Bi a ɔronnkɔtow aba no bi dze, naaso ebɔhwɛ no, nna n’adwen na n’akoma dzi ɔfa bi ekyir. Iyi ma yehu dɛ, no ho hia paa dɛ yɛdze hɛn ndzeyɛɛ nye dza yɛdwen ho nyinara kyerɛ dɛ yenngyina ɔfa bi ekyir!​—John 15:18, 19; 18:36.

18. Ɔsɛ dɛ yɛyɛ hɛn adze dɛn wɔ dza ɔkɔ do wɔ ‘etsifi afamu hen’ no nye ‘anaafo afamu hen’ no ntamu no ho? (Hwɛ mfonyin no so.)

¹⁸ Hɔn a wɔnngye Bible mu nkɔnhyɛ nndzi no, sɛ wohu dɛ ‘etsifi afamu hen’ no nye ‘anaafo afamu hen’ no ‘rifimfen’ anaa ridzi esi a, obotum ahaw hɔn paa. (Dan. 11:40) Dɛm ahemfo beenu yi mu biara wɔ nuclear akodze pii a sɛ wɔtow a obotum asɛɛ abɔdze a nkwa wɔ mu a wɔwɔ asaase do nyina. Naaso yenyim dɛ Jehovah renntsena hɔ ma biribi a ɔtse dɛm nnsi da. (Isa. 45:18) Dɛm ntsi yɛmma dza ɔkɔ do wɔ ‘etsifi afamu hen’ no nye ‘anaafo afamu hen’ no ntamu no nnhaw hɛn koraa, mbom ɔhyɛ hɛn gyedzi dzen paa. Ɔma yehu dɛ ewiei no abɛn pɛɛ.

19. Ebɛnadze na ɔsɛ dɛ yehu fa Bible mu nkɔnhyɛ ho?

¹⁹ Yennyim ɔkwan a Bible nkɔnhyɛ ahorow bi bɛfa do aba mu. Nkɔnhyɛnyi Daniel mpo anntse dza ɔkyerɛwee no nyinara ase. (Dan. 12:8, 9) Naaso sɛ yennyim ɔkwan a Bible nkɔnhyɛ bi bɛfa do aba mu mpo a, ɔno nnkyerɛ dɛ nkɔnhyɛ no remmba mu. Yebotum enya awerɛhyɛmu dɛ sɛ ber so dɛ nkɔnhyɛ bi ba mu a, Jehovah bɛma yɛatse ase dɛ mbrɛ ɔyɛe wɔ tsetse mber mu no.​—Amos 3:7.

20. Ebɛn Bible mu nkɔnhyɛ na yɛhwɛ kwan dɛ ɔrennkyɛr obesisi, na ebɛnadze na ɔsɛ dɛ yɛkɔ do yɛ?

²⁰ Amanaman no bɛpaa mu aka “asomdwee nye ahotɔ” ho asɛm. (1 Thess. 5:3) Afei, wiadze etumfo no bɔtow ahyɛ ator som do na wɔasɛɛ no korakora. (Nyi. 17:16, 17) Ɔno ekyir no wɔbɔtow ahyɛ Nyankopɔn n’asomfo so do. (Ezek. 38:18, 19) Dɛm nsɛm a obesisi yi na ɔdze hɛn bɔkɔ ekowie ɔko a otwa tun a ɔno nye Har-Magedon. (Nyi. 16:14, 16) Yebotum enya awerɛhyɛmu dɛ ɔrennkyɛr koraa na dɛm nsɛm yi esisi. Kesi dɛ dɛm aber no bɛba no, hom mma Bible mu nkɔnhyɛ ho nhia hɛn na yɛmboa afofor so ma wonhu dɛ Bible mu nkɔnhyɛ ho hia. Hom mma yɛnyɛ dɛm mfa nkyerɛ dɛ hɛn enyi sɔ dza hɛn sor Egya Jehovah ayɛ ama hɛn no.