Ɔsomafo Paul kyerɛɛw krataa kɛmaa Christianfo a wɔwɔ Thessalonica no, na ɔkaa dɛ: “Sɛ obi enntsie hɛn asɛm a ɔwɔ nwoma yi mu no a, hom nhyɛ no nsew.” (2 Thess. 3:14) Mber bi a abɛsen kɔ no, yɛkaa dɛ asafo mu mpanyimfo na ɔsɛ dɛ wɔhyɛ nyimpa a ɔtse dɛm no nsew. Afei so, yɛkaa dɛ sɛ obi kɔ do bu n’enyi gu Bible mu afotusɛm do aber mpo a asafo mu mpanyimfo dze afotu pii ama no wɔ ho a, mpanyimfo no botum ama ɔkasa bi a ɔfa dɛm suban no ho dze abɔ asafo no kɔkɔ. Ɔno ekyir no, enuanom nye no rommbɔ mu nnyɛ ndzɛmba bi anaa wɔnye no rommbɔ mu nngye hɔn enyi.

Naaso, yeebohu dɛ ohia dɛ yɛyɛ nsesa wɔ dɛm nkyerɛkyerɛmu no mu. Ɔda edzi dɛ, dza nna Paul reka no yɛ biribi a ɔsɛ dɛ Christiannyi biara si ho gyinae. Ntsi onnhia dɛ mpanyimfo no ma ɔkasa dze bɔ asafo no kɔkɔ wɔ dɛm onua no ho. Ebɛnadze ntsi a? Hom mma yensusu Paul n’asɛm no ho nkɔ ekyir kakra.

Nna Paul ahyɛ no nsew dɛ enuanom binom a wɔwɔ dɛm asafo no mu no ‘nenam basabasa.’ Otuu hɔn fo, naaso wɔammfa annyɛ edwuma. Nna oedzi kan aka akyerɛ hɔn dɛ: ‘Sɛ obi mmpɛ dɛ ɔyɛ edwuma a, mma onndzidzi.’ Nna binom botum ayɛ edwuma ahwɛ hɔnho paa, naaso akwadwer ntsi, nna wɔmmpɛ dɛ wɔyɛ edwuma. Afei so, nna wonndzi hɔn fie asɛm. Ntsi, nna Christianfo no bɛyɛ hɔn adze dɛn wɔ hɔn a wɔnenam basabasa yi ho?—2 Thess. 3:​6, 10-12.

Paul kaa dɛ: ‘Wɔnhyɛ dɛm nyimpa no nsew.’ Greek kasafua a wɔdze dzii dwuma wɔ ha no, dza ɔkyerɛ nye dɛ ebɛhyɛ nyimpa a ɔtse dɛm no nsew na aahwɛ woho yie wɔ no ho mbrɛ ɔbɛyɛ a irunnsuasua no suban bɔn no. Paul ammfa afotu yi amma mpanyimfo no nkotsee, mbom ɔdze maa asafo no mufo no nyina. (2 Thess. 1:1; 3:6) Iyi kyerɛ dɛ sɛ nna Christiannyi bi hu dɛ no nua Christiannyi bi mmfa Bible mu afotu mmbɔ ne bra a, nna obotum esi gyinae dɛ ‘ɔbɔtwe noho efi’ onua a ɔtse dɛm no ho.

Dza iyi kyerɛ nye dɛ wɔnye dɛm onua no dzii no dɛ obi a woeyi no efi asafo no mu anaa? Ɔnntse dɛm koraa. Osiandɛ Paul sanee kaa dɛ: ‘Hom nkɔ do ntu no fo dɛ onua.’ Ntsi nna wɔnye obi a wɔahyɛ no nsew no kɔ asɛnka na ɔba asafo nhyiamu so a, wɔnye no bɔ. Naaso sɛ nna enuanom rihyia mu ayɛ biribi anaa wɔregye hɔn enyi a, nna wɔronnto nsa mmfrɛ no. Ebɛnadze ntsi a? Paul kaa dɛ: “Na n’enyi nto.” Sɛ enuanom no hyɛ Christiannyi a ɔtse dɛm no nsew a, nna ɔbɛma n’enyi ato na ɔaayɛ nsesa.—2 Thess. 3:​14, 15.

Christianfo a wɔwɔ hɔ ndɛ no besi dɛn dze dɛm afotu yi ayɛ edwuma? Odzi kan, ɔsɛ dɛ yehu paa dɛ dza nyimpa no reyɛ no kyerɛ dɛ ‘ɔnenam basabasa’ dɛ mbrɛ Paul kae no. Ɔnnyɛ hɔn a ɔsor dza wɔpɛ anaa osian hɔn tsibowa ntsi wɔrennye hɛn nnsi gyinae kor no na nna Paul reka hɔn ho asɛm. Dɛmara so na ɔnnyɛ hɔn a wɔayɛ biribi ma wɔahaw hɛn no ho asɛm na Paul reka. Mbom, dza nna Paul reka no fa hɔn a wɔahyɛ da ara dɛ wɔremmfa Nyankopɔn n’Asɛm mmbɔ hɔn bra no ho.

Ntsi ndɛ, sɛ yehu dɛ Christiannyi bi reda suban bɔn a bi edzi a, hɛn mu biara botum esi gyinae dɛ ɔnye no rommbɔ mu nnyɛ ndzɛmba bi anaa ɔnye no rommbɔ mu nngye n’enyi. Osiandɛ iyi yɛ ankorankor gyinaesi ntsi, sɛ yeyi hɛn ebusuafo si nkyɛn a, yɛrennye obiara nnka ho asɛm. Naaso yebotum nye nyimpa a ɔtse dɛm no akɔ asɛnka, na sɛ ɔba asafo nhyiamu so a, yebotum nye no abɔ. Sɛ nyimpa no sesa no suban a, yɛnye no bɛsan abɔ mu ayɛ ndzɛmba ahorow bi a nna nkan no yɛnye no yɛ no.