Matthew Asɛmpa 23:1-39
23 Afei Jesus kaa kyerɛɛ nyimpadɔm no nye n’esuafo no dɛ:
2 “Akyerɛwfo no na Phariseefo no, hɔnara wɔse wɔtsena Moses n’egua do.
3 Dɛm ntsi dza wɔbɛka akyerɛ hom biara, hom ndzi do na hom nyɛ. Naaso hɔn ndzeyɛɛ dze mma hom nnyɛ bi, osiandɛ dza wɔka no wɔmmfa nnyɛ edwuma.
4 Wɔkyekyer ndzesoa a no mu yɛ dur to nkorɔfo hɔn kɔn ho, naaso hɔnankasa dze, wɔmmpɛ dɛ wɔdze hɔn nsatseaba mpo ka.
5 Hɔn ndwuma nyinara wɔyɛ ama nyimpa eehu. Adze a wɔdze kyerɛwnsɛm hyɛ mu dze bɔ hɔnho ban no, wɔyɛ no akɛse, na wɔyɛ hɔn atar n’ano ndwow atsentsen.
6 Wɔkɔ aponto ase a, wɔpɛ beebi a mpanyimfo tsena. Na sɛ wɔkɔ nhyiamudan mu so a, wɔpɛ ngua a ɔwɔ enyim.*
7 Wɔpɛ dɛ nkorɔfo dze nkyia soronko bi ma hɔn wɔ guado, na wɔpɛ dɛ nkorɔfo frɛ hɔn Rabbi.*
8 Naaso hom dze, mma wɔmmfrɛ hom Rabbi, osiandɛ ɔbaako na ɔyɛ hom Kyerɛkyerɛnyi, na hom nyinara yɛ enuanom.
9 Bio so, mma hom mmfrɛ obiara dɛ hom egya wɔ asaase do, osiandɛ ɔbaako na ɔyɛ hom Egya, ɔno nye Ɔsorsornyi no.
10 Afei so onnyi dɛ wɔfrɛ hom akandzifo, osiandɛ ɔbaako na ɔyɛ hom kandzifo, ɔno nye Christ no.
11 Mbom ɔsɛ dɛ obi a ɔyɛ kɛse wɔ hom mu no yɛ hom somfo.
12 Obiara a ɔma noho do no wɔbɛbrɛ no adze, na obiara a ɔbrɛ noho adze no wɔbɛma no do.
13 “Hom akyerɛwfo nye Phariseefo nyaatwemfo,* hom ndue! Osiandɛ hom tow ɔsor Ahendzi no n’abow mu. Hom a hom nnkɔ mu, hɔn a wɔrokɔ mu no so a, hom mma hɔn kwan ma wɔnnkɔ mu.
14— —
15 “Hom akyerɛwfo nye Phariseefo nyaatwemfo, hom ndue! Osiandɛ hom twa kwan fa epo nye asaase do kɛsakyer nyimpa kor ma ɔnye hom bɔsom. Na sɛ ɔba a, hom ma ɔbɛyɛ obi a ɔsɛ dɛ ɔkɔ Gehenna, na no bɔn bɛyɛ homdze no mbɔho ebien.
16 “Akwankyerɛfo enyifurafo, hom ndue. Hom ka dɛ, ‘Sɛ obi dze asɔrfie no ka ntam a, ɔnnyɛ hwee; naaso sɛ obi dze sika kɔkɔɔ a ɔwɔ asɔrfie hɔ no ka ntam dze a, ɔnodze ɔsɛ dɛ odzi ntam a ɔaka no do.’
17 Nkwaseafo nye enyifurafo! Dza ɔwɔ hen na no ho hia paa, sika kɔkɔɔ no, anaa asɔrfie no a wɔama sika kɔkɔɔ no ho atsew no?
18 Bio so hom ka dɛ, ‘Sɛ obi dze afɔrmbukyia no ka ntam a, ɔnnyɛ hwee. Naaso obiara a ɔdze afɔrbɔdze* a ɔda afɔrmbukyia no do bɛka ntam no dze, ɔsɛ dɛ odzi ntam a ɔaka no do.’
19 Enyifurafo! Hendze na no ho hia paa, afɔrbɔdze no anaa afɔrmbukyia a ɔma afɔrbɔdze no ho tsew no?
20 Dɛm ntsi obiara a ɔdze afɔrmbukyia no bɛka ntam no, ɔdze afɔrmbukyia no na dza ɔwɔ do nyinara aka ntam.
21 Na obiara a ɔdze asɔrfie no bɛka ntam no, ɔdze asɔrfie no nye Obi a ɔtse mu no aka ntam.
22 Na obiara so a ɔdze ɔsor bɛka ntam no, ɔdze Nyankopɔn n’ahengua no nye Obi a ɔtsena do no aka ntam.
23 “Hom akyerɛwfo nye Phariseefo nyaatwemfo, hom ndue! Osiandɛ hom yi mint, dill na kumin ho ebupɛn du, naaso Mbra no mu nsɛm a no ho hia paa tse dɛ atsɛntsenenee, ehumbɔbɔr na nokwardzi dze, hom mmbu no hwee. Ohia dɛ hom yi ebupɛn du no, naaso ɔno nnkyerɛ dɛ ɔsɛ dɛ hom bu hom enyi gu ndzɛmba a no ho hia paa no do.
24 Akwankyerɛfo enyifurafo, sɛ hom ronom biribi a, hom sɔn do yi ntonton fi mu, naaso hom men efupɔnkɔ!
25 “Hom akyerɛwfo nye Phariseefo nyaatwemfo, hom ndue! Osiandɛ hom twutwuw kɔɔpow na prɛtse ho, naaso no mu dze, edzifodzepɛ* na akɔndɔ bɔn ara nko twom.
26 Phariseenyi nyifuranyi, dzi kan twutwuw kɔɔpow no nye prɛtse no mu na ɔbɛma no ho so efir.
27 “Hom akyerɛwfo nye Phariseefo nyaatwemfo, hom ndue! Osiandɛ hom tse dɛ nda a woetwuw ho fitaa, ehwɛ ho a ɔyɛ fɛw, naaso no mu dze ewufo hɔn mbiew nye ndzɛmba a no ho nntsew nyinara bi ahyɛ mu ma.
28 Dɛm na hom tse ampa. Nyimpa enyiwa do no hom yɛ homho dɛ atseneneefo, naaso hom mu dze, ndzebɔnyɛ na nyaatwem ahyɛ hom ma.
29 “Hom akyerɛwfo nye Phariseefo nyaatwemfo, hom ndue! Osiandɛ hom tow nkɔnhyɛfo hɔn nda do, na hom dze ndzɛmba siesie atseneneefo so hɔn nda* ma ɔyɛ kamakama.
30 Na hom ka dɛ, ‘Sɛ yɛtsenaa ase wɔ hɛn egyanom aber do a, nkyɛ yɛrennka hɔn ho ma wɔnnka nkɔnhyɛfo no hɔn bɔgyaa nngu.’
31 Ntsi hom dzi dase tsia homho dɛ hom yɛ hɔn a wokunkum nkɔnhyɛfo no hɔn mba.
32 Sɛ dɛm dze a, ɔno adze a hom egyanom dze susuu adze no, hom nhyɛ no ma ɛ.
33 “Mbowatsena, nhurutsia mba, hom bɛyɛ dɛn eguan Gehenna atsɛmbu?
34 Dɛm ntsi morosoma nkɔnhyɛfo, nye enyansafo nye hɔn a wɔbɛkyerɛkyerɛ hom wɔ bagua mu aba hom nkyɛn. Hom boku hɔn mu binom na hom aabɔ hɔn asɛndua mu, na hom bɔbɔ hɔn mu binom mbaa wɔ hom nhyiamudan mu, na hom aatan hɔn enyi efi kurow kor mu akɔ kurow fofor mu.
35 Iyi na ɔbɛma atseneneefo hɔn bɔgyaa a woehue egu asaase do nyinara no ebogu hom tsir do, ofitsi ɔtseneneenyi Abel no bɔgyaa do kesi Barakiah ne ba Zechariah no bɔgyaa do. Ɔno na hom kum no wɔ asɔrdan no nye afɔrmbukyia no ntamu.
36 Nokwar mese hom dɛ, iyinom nyinara bɛba dɛm ebusuasantsen yi do.
37 “Ao Jerusalem, Jerusalem, ɔwo a ikum nkɔnhyɛfo no na isiiw hɔn a wɔsomaa hɔn baa wo nkyɛn no abo. Nkyɛ mepɛ dɛ moboaboa wo mba ano dɛ mbrɛ akokɔ baatan boaboa ne mba ano hyɛ ne ntsaban ase no. Naaso mayɛ biara, ammpen.
38 Hwɛ, woegya hom fie ahyɛ hom nsa.*
39 Na mereka akyerɛ hom dɛ, ofitsi ndɛ rokɔ hom runnhu me bio kesi dɛ hom bɛka dɛ, ‘Nhyira nye nyia ɔba wɔ Jehovah ne dzin mu!’”
Ase Hɔ Nsɛm
^ Anaa “beebi a ɔyɛ papa.”
^ Anaa “Kyerɛkyerɛnyi.”
^ Anaa “ndabrabafo.”
^ Anaa “akyɛdze.”
^ Anaa “epoobɔ.”
^ Anaa “nkaa nda.”
^ Obotum so akyerɛ, “woegya hom fie ato hɔ a obiara nntse mu.”
