Matthew Asɛmpa 20:1-34
20 “Ɔsor Ahendzi no tse dɛ habanwura bi a ɔsoɛɛr anapatutuutu dɛ ɔrokɔbɔ edwumayɛfo paa ma wɔaakɔ no wenyin haban mu.
2 Aber a ɔnye edwumayɛfo no kae ma okesii dɛ da kor ɔbɛma hɔn denare kor no, ɔsomaa hɔn ma wɔkɔr no wenyin haban no mu.
3 Bɛyɛ dɔn a otsia ebiasa* so opuei, na ohun dɛ binom gyinagyina guado a wɔrennyɛ edwuma biara.
4 Ɔkaa kyerɛɛ hɔn dɛ, ‘Hom so hom nkɔ wenyin haban no mu, na mebɛma hom akatua a ɔfata.’
5 Ntsi wosii mu kɔree. Ɔsanee puee bio wɔ bɛyɛ dɔn a otsia esia* na dɔn a otsia akron* no mu kɛyɛɛ dɛmara.
6 Ewiei koraa no, opuei wɔ bɛyɛ dɔn a otsia dubiako* no mu na ohun binom so a wogyinagyina hɔ, na obisaa hɔn dɛ, ‘Ɔyɛ dɛn ntsi na hom egyinagyina ha da mu nyinara a hom rennyɛ edwuma biara yi?’
7 Woyii no ano dɛ, ‘Obiara mmbɔɔ hɛn paa ntsi a.’ Nna ɔkaa kyerɛɛ hɔn dɛ, ‘Hom so hom nkɔ wenyin haban no mu.’
8 “Odur ewimbir no, wenyin haban no wura no kaa kyerɛɛ nyia ɔhwɛ n’edwuma do no dɛ, ‘Frɛ edwumayɛfo no na tua hɔn kaw, hyɛ ase fi hɔn a wodzii ekyir no do kesi hɔn a wodzii kan bae no do.’
9 Hɔn a wɔfaa hɔn dɔn a otsia dubiako no bae no, hɔn mu biara nyaa denare kor.
10 Ntsi aber a hɔn a wodzii kan bɔɔ hɔn paa no bae no, nna hɔn adwen yɛ hɔn dɛ wobenya kɛse, naaso denare kor no ara na wɔdze maa hɔn so.
11 Na hɔn nsa kaa dza fiewura no dze maa hɔn no, wɔkasakasaa ho.
12 Na wɔkaa dɛ, ‘Edwumayɛfo a wɔbaa ekyir no yɛɛ edwuma dɔnhwer kor pɛ; naaso hɛn a yeegyina ewia mu ayɛ edwuma da mu no nyinara no, ama yɛnye hɔn agye akatua kor!
13 Ɔkaa kyerɛɛ hɔn mu kor dɛ, ‘Me gyafo, mennyɛɛ wo bɔn biara. Nkyɛ mekaa kyerɛɛ wo dɛ mebɛma wo denare kor no, egyee too mu bi a?
14 Gye wodze na kɔ. Dza medze ama wo no, ɔno ara na mepɛ dɛ medze ma obi a ɔbaa ekyir no so.
15 Mankasa me ndzɛmba a mowɔ no, minnyi hokwan dɛ medze yɛ dza mepɛ anaa? Anaadɛ papa* a mereyɛ no na ɔyɛ wo yaw?’*
16 Dɛmara na hɔn a wɔaka ekyir no bedzi kan, na hɔn a woedzi kan no aka ekyir.”
17 Afei aber a wɔrofow akɔ Jerusalem no, Jesus frɛɛ esuafo 12 no gyinaa nkyɛn na ɔkaa kyerɛɛ hɔn wɔ kwan no do dɛ:
18 “Hwɛ, yɛrofow akɔ Jerusalem, na wobeyi nyimpa Ba no ahyɛ asɔfo mpanyimfo nye akyerɛwfo no nsa. Na woeebu no fɔ dɛ wonku no.
19 Na wobeyi no ahyɛ amanaman mufo nsa, afei wobedzi no ho fɛw na wɔaahwe no na wɔaabɔ no asɛndua mu; na da a otsia ebiasa no wobenyan no.”
20 Nna Zebedee ne mba no hɔn maame nye ne mba no baa ne nkyɛn, na ɔkotoow no na ɔdze adzeserɛdze bi too n’enyim.
21 Jesus bisaa no dɛ: “Ebɛnadze na epɛ?” Oyii no ano dɛ: “Ka ma me mba beenu yi, kor ntsena wo nsa nyimfa na kor so ntsena wo nsa bankum wɔ w’Ahendzi no mu.”
22 Jesus kaa dɛ: “Hom nnyim dza hom ribisa no. Kɔɔpow a morobɔnom ano no, hom botum anom ano a?” Woyii no ano dɛ: “Yebotum.”
23 Ɔkaa kyerɛɛ hɔn dɛ: “Mo kɔɔpow no dze hom bɔnom ano, naaso me nsa nyimfa na me nsa bankum tsena dze ɔnnyɛ medze dɛ medze bɛma hom, mbom ɔwɔ hɔ ma hɔn a m’Egya esiesie ama hɔn no.”
24 Aber a esuafo du a wɔaka no tsee no, hɔn bo fuuw enuanom beenu no.
25 Ntsi Jesus frɛɛ hɔn baa ne nkyɛn na ɔkaa kyerɛɛ hɔn dɛ: “Hom nyim dɛ ahemfo a wɔwɔ amanaman no mu no, wodzi hɔn nkorɔfo do tum dɛ ewuranom, na etsitsir no dze hɔn tum hyɛ hɔn do.
26 Naaso hom dze, ɔnnsɛ dɛ hom yɛ dɛm. Na mbom obiara a ɔpɛ dɛ ɔyɛ kɛse wɔ hom mu no, ɔsɛ dɛ ɔsom hom.
27 Na obiara a ɔpɛ dɛ odzi kan wɔ hom mu no, ɔnyɛ hom akowaa.
28 Dɛ mbrɛ nyimpa Ba no bɛyɛe no, ɔammba dɛ wɔnsom no, mbom ɔbɔsomee na ɔdze no nkwa* aayɛ werdam* dze agye nyimpa beberee.”
29 Aber a worifi Jericho no, nyimpadɔm pii tui dzii n’ekyir.
30 Na hwɛ, enyifurafo beenu bi a wɔtse kwan nkyɛn tsee dɛ Jesus rutwa mu no, wɔkekaa mu dɛ: “Ewuradze, David ne Ba, hu hɛn mbɔbɔr!”
31 Nna nyimpadɔm no tseatseaa hɔn dɛ wɔnka hɔn ano nto mu; naaso afei koraa na wɔkekaa mu kɛse dɛ: “Ewuradze, David ne Ba, hu hɛn mbɔbɔr!”
32 Ntsi Jesus gyinae, na ɔfrɛɛ hɔn, na obisaa hɔn dɛ: “Ebɛnadze na hom pɛ dɛ meyɛ ma hom?”
33 Wɔkaa kyerɛɛ no dɛ: “Ewuradze, ma yenhu adze.”
34 Ɔyɛɛ Jesus mbɔbɔr, ntsi ɔdze ne nsa kaa hɔn enyiwa, na amonmu hɔ ara wohun adze, na wodzii n’ekyir.
Ase Hɔ Nsɛm
^ Kyerɛ dɛ, bɛyɛ anapa 9:00.
^ Kyerɛ dɛ, bɛyɛ ewiaber 12:00.
^ Kyerɛ dɛ, bɛyɛ ewiaber 3:00.
^ Kyerɛ dɛ, bɛyɛ ewimbir 5:00.
^ Anaa “ayamuyie.”
^ Greek, “Anaadɛ papa a mereyɛ no ntsi, w’enyiwa dzi bɔn ekyir.”
^ Anaa “ne kra.”
^ Anaa “agyedze.”
