Ofitsi November 13 kesi 16, 2014 no, wɔyɛɛ Toronto Amanaman Ntamu Buukuu-Yikyerɛ Dwumadzi (Toronto International Book Fair) no wɔ Metro Toronto Convention Centre hɔ, na wɔdaa nwoma nye elɛktrɔnik efir ahorow edzi. Wɔ ndaanan yi ntamu no, nyimpa bɔbor 20,000 na wɔkɔr dwumadzi yi ase.

Jehovah Adasefo kã hɔn a wɔbɛdaa hɔn nwoma nye dza ɔkã ho edzi no ho. Wɔbɔɔ pata fɛɛfɛw bi a nna bɔhwɛadzefo no ankasa botum dze elɛctrɔnik mfir a wɔada no edzi no edzi dwuma. Wɔyɛɛ kiosk ahorow a wɔdze elɛktrɔnik mfir a wɔfrɛ no tablet esisi mu, na iyi kyerɛɛ mbrɛ wɔdze jw.org dzi dwuma.

Mpanyimfo a nna wɔrohwɛ dwumadzi yi do no mu kor kãa dɛ: “Hom wɛbsaet yi yɛ abaɛfor papaapa. Mususu dɛ ɔsɛ dɛ nyimpa afofor a wɔrebɛda hɔn ndzɛmba edzi no sũasua dza hom ayɛ yi.” Ahɔho no kãa dɛ wɔdze nyimdzee kɛse na wɔdze yɛɛ hɛn wɛbsaet no, obua nsɛmbisa ahorow a no ho hia paa no, na ɔyɛ mberɛw so dɛ yɛdze bɛyɛ edwuma. Nna ɔyɛ hɔn enyisɔ so dɛ wɛbsaet yi boa nkorɔfo ma wotum dzi hɔn haw nye dadwen ahorow ho dwuma.

Aber a nna Adasefo etuhoakyɛfo a wɔrohwɛ hɛn pata no nye bɔhwɛadzefo no ridzi nkɔmbɔ no, wobohun dɛ hɔn mu pii wɔ hɔ a sɛ nnyɛ dwumadzi yi ase a nkyɛ wɔnntsee jw.org wɛbsaet no ho asɛm da. Ɔtse dɛ dza ɔhɔho biara gyee krataasin a obotum dze ahwehwɛ Adasefo no anaa Hemfa Na Yebenya Asetsena Mu Nsɛmbisa a Ohia no Ho Mbuae? krataaba no. Hɔn mu pii kãa dɛ wɔbɛsan akɔ wɛbsaet hɔ bio, na binom so kãa dɛ Jehovah Adasefo mbɔhwehwɛ hɔn wɔ hɔn efie.

Nna Fida yɛ “Mbofra Da” (Children’s Day) wɔ buukuu-yikyerɛ dwumadzi no ase, ntsi hɛn etuhoakyɛfo no yii video ahorow a wɔdorɔw a wɔada no edzi wɔ jw.org wɛbsaet do no. Sɛ skuulfo mbofra nye hɔn akyerɛkyerɛfo du hɔ pɛr, nna woegyina hɔ ahwɛ bi.

Ɔbarimba bi a ofi Chicago a ɔyɛ edwuma wɔ edwumakuw bi a wotsintsim Bible mu no enyi sɔɔ mbrɛ New World Translation of the Holy Scriptures no si yɛ papa no. Nna ɔpɛ dɛ ɔnye hɔn a wotsintsimii no dzi nkitaho, ntsi wɔmaa no krataasin a ɔdze bɔhwehwɛ hɔn.

Wɔ kasa bɔbor 700 a ibenya nsɛm wɔ mu wɔ hɛn wɛbsaet no do no, ahɔho no hwɛɛ no mu 16​—Amharic, Bengali, Borɔfo, Chinese, French, Greek, Gujarati, Hindi, Korean, Portuguese, Spanish, Swedish, Tamil, Tigrinya, Urdu, nye Vietnamese kasa.

Ɔdasefo kor a ɔmaa ahɔho no akɔaba baa hɛn pata no ho no bohun dɛ, saana nsosoree kɛse wɔ mu dɛ yɛbɛkã hɛn wɛbsaet no ho asɛm akyerɛ afofor nye dɛ yɛdze bɛkyerɛ hɔn ankasa. Ɔkãa dɛ, “Yenyaa ho kwan soronko dze daa hɛn wɛbsaet no edzi.”