ABER a Jehovah Adasefo beenu bi reyɛ efiefi asɛnka no, wɔkɔbɔɔ fie bi n’abow mu. Ɔbarimba bi a ɔahaw bobuee abow no; na nna ahoma bi sensɛn ntwerba bi do wɔ n’ekyir.

Aber a ɔbarimba no maa Adasefo no hɛn dan no mu no, wobisaa no siantsir a ahoma no wɔ hɔ. Ɔbarimba no kãa dɛ nkyɛ ɔrebɛhyɛ noho akɔmfõ, naaso aber a wɔbɔɔ abow no mu no, nna osii gyinae dɛ obobue abow no dza otwa tun. Adasefo no nye no susũu nsɛm ho, na wokegyaa no maa ɔkɔɔ datser hɔ ma ɔboaa no.

Dɛm asɛm yi puei wɔ Belgium dawurbɔ krataa bi mu. Naaso, nnyɛ iyi nkotsẽe nye ber a Jehovah Adasefo aboa ma wɔagye obi efi ahokum mu. Hwɛ nsɛm a ɔtsetse dɛm a woesisi wɔ wiadze n’afã ahorow no mu bi.

Ɔbaa bi a ofi Greece kyerɛɛw dɛ: “Mo hokafo nye me dzii no wenwennwen ma minyaa adwenmuhaw. Midzii yaw ara ma misii gyinae dɛ muboku moho. Dɛm adwen a ɔnye dɛ muboku moho kɛkɛ no maa minyaa ahotɔ​—nna mepɛ dɛ misiw ayawdzi no ano.”

Naaso, ɔbaa yi kɔhwehwɛɛ mboa fii adatserfo hɔ. Annkyɛr biara na ɔnye Adasefo no dzii nkitaho, ɔhyɛɛ ase nye hɔn sũaa Bible no, na ɔhyɛɛ ase so kɔɔ nhyiamu ahorow. Ɔkyerɛɛw dɛ: “Enuanom yi ada ɔdɔ a pɛsankonya nnyi mu edzi akyerɛ me, biribi a mapɛ mfe pii nye yi no. Menya anyɛnkofo mapã a mubotum agye hɔn edzi. Mo bo atɔ me yamu, m’enyi agye, na mennda ho nndwen daakye no ho bio.”

Ɔdasefo bi a ɔwɔ England kyerɛw dɛ: “Ɔbaa bi a minyim no frɛɛ me a nna ɔahaw paa, na ɔkãa dɛ oboku noho dɛm anafua no. Menye no susũu asɛm bi a ɔwɔ May 2008 Awake! no mu a nna ɔkasa tsia ahokum no ho, na memaa no Kyerɛwnsɛm mu awerɛkyekyer. Ɔmmfa ho ne haw ahorow nyinara ekyir no, ɔmmpɛ dɛ oboku noho bio.”

Wɔ Ghana no, Jehovah Adasefo no mu kor a wɔfrɛ no Michael hyɛɛ ase dɛ ɔnye ɔbaa bi a ɔtɔn adze wɔ n’edwuma mu robɔ nkɔmbɔ. Dakor bi, Michael hun dɛ ɔbaa no abotow paa, ntsi obisaa no siantsir.

Ɔbaa no kãa dɛ ɔpɛ dɛ okũ noho, osiandɛ no kun apow no na ɔakɛfa basia fofor. Michael kyekyee no werɛ, na ɔmaa no mbuukuu ebien bi a ɔkyerɛkyerɛ Kyerɛwnsɛm no mu. Dɛm nsɛm yi a onyae no maa okwetsiir dɛ oboku noho. Ɔbaa no toaa do sũaa Bible no, na sesei ɔabɛyɛ Jehovah Adasefo no mu kor.

Dawurbɔ krataa bi a ɔwɔ United States bɔɔ amandzɛɛ dɛ, nna Ɔdasefo aberantsɛ bi reyɛ asɛnka edwuma no, na ohun kaar bi a osi hɔ naaso ne gya no si do.

Aberantsɛ no kãa dɛ; “Muhun dɛ tube bi hyɛ kaar no n’adwɔs paep no ano. Tube no n’ano kor so hyɛ kaar no no ntokura mu, na wɔatetar ɔkwan a ɔda ho no nyinara.

“Aber a meyɛɛ ntsɛm bɛɛn kaar no ho no, mohwɛɛ ntokura no mu na muhun basia bi a ɔhyɛ kaar no mu rusũ, na wusiw a ofi kaar no mu no ayɛ no ho nyinara mã kumbɔɔ. Metsẽaa mu dɛ ‘Ebɛnadze na ereyɛ no?’

“Aber a meyɛɛ dɛ murubue kaar n’abow no, muhun mbofra baasa bi a wɔtse kaar no n’ekyir. Mubuee abow no, na basia no kãa dɛ: ‘Ɔsɛ dɛ mokɔ! Ɔsɛ dɛ mokɔ! Ɔsɛ dɛ menye me mba no kɔ.’

“Mekãa dɛ, ‘Meserɛ wo mma nnyɛ dɛm, nnyɛ iyi nye wo haw n’ano edur!’

“Obuaa dɛ: ‘Ɔsɛ dɛ mokɔ hɛben. Ɔsɛ dɛ menye me mba no kɔ.’

“Aber a ogu do rusũ no, mubuu nkotodwe​—afei nna mara so murusũ. Mesan kãa dɛ, ‘Meserɛ wo mma nnyɛ dɛm.’ Afei mehɛɛn kaar no mu, medze me nsa too no kɔn mu, na motwẽe no fir kaar no mu bɔkɔɔ.

“Afei ɔtsẽaa mu dɛ, ‘Yi me mba no ma me!’

“Wɔtsentseen hɔn nsa dɛ wɔrosɔ mo mu. Nna wɔyɛ mbasiamba beenu a kor edzi mfe enum na kor so edzi mfe anan, nye banyimba a oedzi mfe ebien. Nna wɔtse kaar n’ekyir dzinn a wonnyim dɛ nkyɛ ɔrennkyɛr na wɔadan ewufo.

“Aber a miyii hɔn baanan no nyinara no, muduum kaar ne gya no. Afei hɛn beenum no nyinara tsenaa bamba bi do wɔ famu hɔ, na mekãa dɛ, ‘Kã w’asɛm kyerɛ me.’”

Jehovah Adasefo bu nkwa dɛ ɔyɛ akyɛdze a ɔsom bo a ofi hɛn Bɔadze no hɔ. Wɔ wiadze beebiara no, wɔbɔ mbɔdzen dɛ wɔbɛkyekye hɔn a wɔahwer hɔn adɔfo wɔ ahokum mu no werɛ, na wɔboa hɔn so a wɔpɛ dɛ woku hɔnho no.