Mmumfo no maa hɔn nsa do himii dze daa hɔn enyigye edzi ber a wɔdze amandzɛɛbɔ a ɔyɛ enyigye yi too gua no: “Yɛdze enyigye robɔ hom amandzɛɛ dɛ wɔahyɛ ase rekyerɛ Bible mu nwoma ahorow no mu bi a ɔwɔ Hebrew Kyerɛwnsɛm [Ahyɛmu Dadaw] no mu no ase akɔ mmum kasa mu. Yɛdze enyigye rekã akyerɛ hom dɛ wɔakyerɛ Genesis nwoma no ase ewie!”

Wɔdze dɛm amandzɛɛbɔ yi too gua ber a wɔmaa ɔkasa a otwa tun wɔ ɔmantɔw ehyiadzi ahorow a Jehovah Adasefo yɛe wɔ mfe 2013 mu no ase. Wɔyɛɛ dɛm ehyiadzi yi bi so wɔ America Mmum Kasa mu (ASL).

Mfe 2005 mu na Jehovah Adasefo hyɛɛ ase dɛ wɔrekyerɛ New World Translation of the Holy Scriptures no ase akɔ ASL mu, na Matthew nwoma no na wɔdze hyɛɛ ase. Obodur mfe 2010 mu no, nna wɔakyerɛ nwoma 27 a wɔtaa frɛ no Ahyɛmu Fofor no nyina ase akɔ ASL mu ewie.

Bio so, Jehovah Adasefo akyerɛ Bible no n’afã ahorow bi ase akɔ mmum kasa afofor enum mu.

Ebɛn botae ntsi na wɔyɛ edwuma a ɔtse dɛm? Jehovah Adasefo ahyɛ no nsew dɛ mmumfo piinara nnsũaa kasa a wɔdze etsintsim Bible no pɛn. Bible a wɔbɛkyerɛ ase akɔ mmum kasa mu ma no mu ada hɔ, na ntsease wɔ mu no bɔboa mmumfo piinara ma wɔaatse no mu nsɛm ase yie na wɔnye Nyankopɔn eenya anyɛnkofa a no mu yɛ dzen. Ebɛn enyisɔ na nkorɔfo akyerɛ wɔ dɛm Bible nkyerɛase yi ho?

Dɛm asɛm yi na aberantsɛ bi a ɔyɛ mmum kãe: “Ber a woyii Matthew nwoma no edzi no, metsee nkã dɛ iyi yɛ adanse a ɔkyerɛ dɛ Nyankopɔn reda no dɔ edzi akyerɛ mankasa, na Genesis nwoma no a woeyi no edzi no si m’asɛm no pi. Ɔroboa me ma meehu no yie ankasa.”

Ɔbaa bi a ɔno so yɛ mmum kãa mbrɛ ɔtse nkã ho asɛm dɛ: “Kasa no mu da hɔ, na nsɛm a ɔyɛ ahomka pii so wɔ mu! M’enyi agye Bible no ho yie. Muhu dɛ Jehovah pɛ dɛ mekenkan n’Asɛm no yie, mekan no nyiyimu nyiyimu, mbrɛ ɔbɛyɛ a mubotum enya no ho nyimdzee a ɔkɔ ekyir. Dɛm nkyerɛase a no mu da hɔ yi kã m’akoma, na ɔboa me ma mutum kã m’akoma mu nsɛm kyerɛ no wɔ mpaabɔ mu.”