Wɔ Amazon kwaabibir no finimfin no, ibohu Jehovah Adasefo Ehyiadzi Asa fofor fɛfɛɛfɛw bi dɛ osi hɔ. Wɔ Brazil no, kurow bi a wɔfrɛ no Manaus n’etsifi afamu no, asaase bi wɔ hɔ a ne kɛse yɛ acre 128 (hectare 52), na dɛm asaase yi ne fã kɛsenara yɛ kwaaber nko. Hɔ no, ekoo, ɔnwam nye nnoma afofor pii a hɔn ho yɛ fɛw yie sũ fi ndua akɛse tse dɛ dza wɔfrɛ no cupuaçu, Brazilfo diibɔɔl nye dza ɔkekã ho no do. Ebɛnadze ntsi na ɔsɛ dɛ wosi Ehyiadzi Asa wɔ dɛm bea yi?

Manaus kurow no​—a ofi Amazon Esutsen n’ano rokɔ hɔ no tsentsen yɛ kilomita 1,450 (akwansin 900) no​—kitsa nyimpadodow ɔpepem ebien wɔ kurow no mu. Hɔn a wɔdze Ehyiadzi Asa yi bedzi dwuma nye Adasefo bɛyɛ 7,000 a wofifi Manaus nye nkurow a ɔbembɛn no, hɔn a wɔtsetse Amazon Esutsen ho, nye hɔn a wɔtsetse esutsen nkakraba a ɔbɔbɔ Amazon mu no ho no. Kurow a ɔwɔ ekyir paa nye São Gabriel da Cachoeira, ofi hɔ kɔ Manaus no yɛ bɔbor kilomita 800 (akwansin 500), na ɔda Manaus n’anee afamu. Adasefo no mu binom dze hɛmba twa ndaansa kwan ana woeetum akɔ ehyiadzi wɔ dɛm Ehyiadzi Asa yi do!

Nna ɔyɛ edwuma kɛse paa dɛ wobesi Ehyiadzi Asa no wɔ Amazon mantɔw no finimfin hɔ. Nna ɔsɛ dɛ wɔdze adansi ho ndzɛmba kɔnteena 13 mona fi Santos habɔ a ɔwɔ São Paulo no; na wɔdze kɛfa Brazil mpoano; na afei obopue Amazon Esutsen no do, ansaana oeedu adansibea hɔ.

Dɛm asa fofor yi yɛ Ehyiadzi Asa a ɔtɔ do 27 a woesi no wɔ Brazil, na nyimpadodow 1,956 na wɔkɔr nhyiamu a wɔyɛɛ no Kwesida, May 4, 2014 dze hyiraa do no bi. Nyimpa dodowara ho sɛpɛɛw hɔn osiandɛ nna iyi nye hɔn da a odzi kan a wɔrokɔ nhyiamu bi wɔ Ehyiadzi Asa do.

Nnyɛ dɛ nna tse nko na etsiefo no tum tse ɔkasafo no nsɛm, na mbom nna wohu no so. Nna iyi yɛ nsakyer kɛse paa osiandɛ mber a abɛsen kɔ no, sɛ wɔyɛ ehyiadzi ahorow wɔ baguamu a, nna ɔyɛ dzen dɛ etsiefo no bohu bamba no do, na akantam woeehu ɔkasafo no. Ɔdasefo bi kãa dɛ, “Makɔ ehyiadzi mfe pii, naaso munntumii nnhwɛɛ Bible drama da; tse nko na nna metse.” Seseiara dze, obiara botum ehu bamba no do.