Wobotum ebisa siantsir a yɛtse ase no ho asɛm wɔ akwan ahorow pii do. Bi nye dɛ, Ebɛnadze ntsi na yɛwɔ ha? anaa Ebɛn siantsir papa bi ntsi na yɛtse ase? Bible no ma yehu dɛ siantsir a yɛtse ase nye dɛ yɛbɛfa Nyankopɔn nyɛnko. Susu dɛm nokwasɛm etsitsir a Bible no da no edzi no mu bi ho hwɛ.

•   Nyankopɔn nye hɛn Bɔfo. Bible no ka dɛ: “Nyankopɔn: ɔno na ɔayɛ hɛn, na yɛyɛ nedze.”​—Ndwom 100:3; Nyikyerɛ 4:11.

•   Nyankopɔn nyim siantsir a ɔabɔ biribiara, na hɛn so yɛka ho.​—Isaiah 45:18.

•   Nyankopɔn bɔɔ hɛn wɔ kwan bi do a, ɔma yɛhwehwɛ dɛ aber nyina yɛnye ne ntamu bɛyɛ papa. Na dza ɔka iyi ho nye dɛ yɛbɔhwehwɛ siantsir a yɛtse ase. (Matthew 5:3) Ɔpɛ dɛ yehu dɛm siantsir no.​—Ndwom 145:16.

•   Sɛ yebohu siantsir a Nyankopɔn bɔɔ hɛn a, ɔsɛ dɛ yɛfa no nyɛnko. Ɔwɔ mu dɛ ɔyɛ dzen ma binom dɛ wɔbɛfa Nyankopɔn nyɛnko dze, naaso Bible no hyɛ hɛn nkuran dɛ: “Hom ntwe mpin Nyankopɔn na ɔbɔtwe epin hom.”​—James 4:8; 2:23.

•   Sɛ yebotum abɛyɛ Nyankopɔn ne nyɛnko a, ɔsɛ dɛ hɛn abrabɔ nye siantsir a ɔbɔɔ hɛn no hyia. Bible no ma yehu dɛm siantsir no wɔ Ɔsɛnkafo 12:13. Hɔ ka dɛ: “Suro Nyankopɔn, na dzi ne mbransɛm do; na iyiara nye nyimpa no dwuma nyina.”

•   Daakye yɛbɛtse siantsir a Nyankopɔn bɔɔ hɛn no ase yie aber a oeyi amandzehu nyina efi hɔ, na ɔdze onnyiewiei nkwa ama n’anyɛnkofo, kyerɛ nyimpa a wɔsom no no.​—Ndwom 37:10, 11.