Sɛ wo ba pɛ dɛ ɔkenkan adze a, dza ɔwɔ ha yi mu hendze na ɔbɛkenkan: buukuu a wɔaprent anaa dza ɔwɔ elɛktrɔnek efir do?

 Mbabun pii bɛkenkan dza ɔwɔ elɛktrɔnek efir do. Ɔbemfo bi a wɔfrɛ no Dr. Jean M. Twenge kyerɛɛw dɛ: “Mbabun a wɔwɔ hɔ ndɛ no, ofi hɔn mbofrabermu na wɔkyerɛɛ hɔn mbrɛ wobesi akenkan adze wɔ elɛktrɔnek mfir do. Sɛ wɔpɛ dɛ wɔkenkan biribi a, dza wɔyɛ ara nye dɛ wɔbɔbɔ link bi do, ibohu ara nye dɛ adze no ebue ma wɔrekenkan. Dɛm ntsi hɔn enyi nngye ho dɛ wɔbɛkenkan buukuu a wɔaprent.” a

 Ɔnnyɛ mfom dɛ obi bɛkenkan adze wɔ elɛktrɔnek efir do. Aberantsɛ bi a wɔfrɛ no John edzi mfe 20. Ɔkaa dɛ: “Skuul a mokɔree no, nna wɔdze buukuu a ɔwɔ elɛktrɔnek efir do na wɔdze sua adze. Sɛ mepɛ dɛ muhu biribi a, nna dza ɔsɛ dɛ meyɛ ara nye dɛ mobɔbɔ adze kor no ahyɛ ɔfa a wɔdze hwehwɛ adze no, mubohu ara nye dɛ adze no ebue.”

 Nkorɔfo a wɔkenkan adze wɔ elɛktrɔnek mfir do no, wonya ndzɛmba ahorow bi wɔ do a ɔboa hɔn ma hɔn akenkan no yɛ mberɛw. No ho nhwɛdo nye dɛ, sɛ erekenkan adze, na sɛ epɛ dɛ etse kasafua bi ase, ebɔ audio bi tsie, ehwɛ video bi a ɔfa dza erekenkan no ho, anaa ekɔ intanɛt do kɛkenkan biribi fofor bi a, edze wo nsa bɔɔ do ara na woebue. Naaso osian dza yɛaka yi ntsi, ehwɛ a mfaso nnyi do dɛ ebɛkenkan mbuukuu a wɔaprent anaa?

 Nyimpa binom afamu no, ɔyɛ a wɔpɛ dɛ wɔdze mbuukuu a wɔaprent mbom bosua adze, osiandɛ ɔma wɔtse dza worusua no ase yie. Ebɛnadze ntsi a?

•   Ndzɛmba tum twetwe hɔn adwen. Aberantsɛ bi a wɔfrɛ no Nathan kaa dɛ: “Sɛ merekenkan adze wɔ mo fon do a, ɔyɛ a mɛsegye ahorow nye advert a ɔba do no tum twetwe m’adwen.”

   Akataasia bi a wɔfrɛ no Karen a oedzi mfe 20 so kaa dɛ: “Sɛ merekenkan adze wɔ mo fon anaa tablɛt do a, ɔyɛ a nna biribi yɛ me dɛ mumbue app fofor anaa mombɔ game .”

   Bible mu afotusɛm: ‘Hom mfa hom mber nyɛ ndzɛmba a no ho hia.’​—Colossaefo 4:5.

   Dwen ho hwɛ: Sɛ wo ba rusua adze wɔ elɛktrɔnek efir do a, ɔyɛ a otum hyɛ no ho do amma biribiara anntwetwe n’adwen? Sɛ wo ba no nntum nnhyɛ no ho do a, ibesi dɛn aboa no ma sɛ ɔrekenkan adze a, ɔdze n’adwen esi do?

   Dza ɔbɔboa wo: Boa wo ba no ma onhu dɛ, sɛ ɔdze no fon reyɛ homework na ɔma ndzɛmba ahorow a ɔba do no twetwe n’adwen a, ɔremma onnwie ntsɛm, na sɛ ɔba no dɛm a orinnya ber pii mmfa nnyɛ ndzɛmba afofor a ɔpɛ dɛ ɔyɛ no.

•   Ɔyɛ dzen dɛ wɔbɛtse dza wɔkenkan no ase. Buukuu bi ka dɛ: “Nhwehwɛmu ahorow a nkorɔfo ayɛ kyerɛ dɛ, sɛ obi kenkan adze wɔ buukuu a wɔaprent mu a, ɔtse ase yie paa kyɛn dɛ ɔbɛkenkan wɔ elɛktrɔnek efir do.”​—Be the Parent, Please.

   Adze kor a ɔma ɔba no dɛm nye dɛ, hɔn a wɔkenkan adze wɔ elɛktrɔnek efir do no kenkan adze no ara kɛkɛ; wɔnngye ber nndwendwen dza wɔkenkan no ho. Papa bi a wɔfrɛ no Nicholas Carr kaa dɛ: “Intanɛt dze sɛ ekɔ do a, biribiara a w’enyiwa bɔbɔ do biara, ɔyɛ a epɛ dɛ edze w’enyi fa do ntsɛntsɛm ama etum akɔ fofor do.” b

   Ɔwɔ mu ɔtɔfabi na sɛ erekenkan adze a, oye dɛ edze w’enyi bɛfa do. Naaso ɔkyerɛwfo Carr kaa dɛ ɔhaw a ɔwɔ mu nye dɛ, ɔtse dɛ mbrɛ “seseiara dɛm kwan yi do na hɛn mu pii fa do kenkan adze.” Osian iyi ntsi, annhwɛ a sɛ wo ba rekenkan adze a, ɔdze n’enyi bɛfa do ara kɛkɛ na iyi remma ɔnntse dza ɔrekenkan no ase yie.

   Bible mu afotusɛm: “Dza enya nyinara ekyir, nya ntseasee.”​—Mbɛbusɛm 4:7.

   Dwen ho hwɛ: Sɛ wo ba dze buukuu a wɔaprent anaa elɛktrɔnek efir na ɔdze sua adze a, ibesi dɛn aboa no ma oeetum ayɛ dza orusua no ho nhwehwɛmu akɔ ekyir?

   Dza ɔbɔboa wo: Da ntseasee edzi. Sɛ obi si gyinae dɛ ɔbɛkenkan buukuu a wɔaprent anaa ɔbɛkenkan dza ɔwɔ elɛktrɔnek efir do a, mfom biara nnyi ho, no mu biara ye. Ɔwɔ mu, mbuukuu ahorow a ɔwɔ elɛktrɔnek mfir do no, ndzɛmba ahorow bi ka ho a otum boa ma obi a ɔrekenkan adze no tse dza ɔrekenkan no ase yie. Dɛm ntsi, sɛ enye wo ba rususu mfaso nye ɔhaw ahorow a ɔwɔ mbuukuu a wɔaprent nye mbuukuu a ɔwɔ elɛktrɔnek mfir do no ho a, ɔyɛ a da ntseasee edzi. Afei so kaa dɛ, ɔsor abofra biara na dza ɔbɔboa no.

•   Ɔyɛ dzen dɛ wɔbɛkae dza woesua no. Ɔbemfo bi a wɔfrɛ no Ferris Jabr dze buukuu a wɔaprent a wɔkenkan totoo buukuu a wɔkenkan no wɔ elɛktrɔnek efir do ho. Ɔkaa dɛ, sɛ obi kenkan adze wɔ elɛktrɔnek efir do a, “ɔma n’adwen no brɛ . . . na mpɛn pii no ɔma ɔyɛ dzen ma no dɛ ɔbɛkae dza ɔakenkan no.”​—Scientific American.

   Sɛ obi rekenkan buukuu bi a wɔaprent, na sɛ ohu asɛm bi a n’enyi gye ho a, beebi a asɛm no wɔ wɔ buukuu no mu no, otum twa ho mfonyin wɔ n’adwen mu. Dɛm ntsi ekyir yi, sɛ ɔrohwehwɛ beebi a asɛm no wɔ a, ɔma ɔkae no ntsɛm.

   Afei so, nkorɔfo a wɔyɛ nhwehwɛmu ebohu dɛ hɔn a wɔtaa kenkan buukuu a wɔaprent no, ɔyɛ a wɔtaa kae dza wɔakenkan no. Sɛ obi kenkan buukuu a wɔaprent a, ɔbɛyɛ dɛ otum boa no ma osua adze yie, na ɔno na otum boa no ma ɔkae dza oesua no.

   Bible mu afotusɛm: “Fa nyansa mapa na adwenmutsewee sie.”​—Mbɛbusɛm 3:21.

   Dwen ho hwɛ: Sɛ wo ba kenkan adze anaa osua adze a, ɔyɛ dzen ma no dɛ ɔbɛtse ase anaa ɔbɛkae anaa? Sɛ dɛm a, ibesi dɛn aboa wo ba ma oeetu mpon wɔ kwan a ɔfa do sua adze no mu? Ehwɛ a dza ɔbɔboa wo ba no nye dɛ ɔdze mbuukuu a wɔaprent bosua adze?

   Dza ɔbɔboa wo: Ma wo ba no mbɔdzembɔ nhia wo nkyɛn adze a ɔpɛ dɛ ɔdze sua adze. Ɔyɛ a binom ka dɛ, sɛ wɔdze buukuu a ɔwɔ elɛktrɔnek efir do sua adze a ɔma wɔtse ase yie, naaso ebɔhwɛ mu no nna dza wɔreka no nnyɛ nokwar.