AYEGHLE 19
ZA 22 Édjié é tobeyang —É zakh !
Za dzam bia yem nfa minkighane minsang Jehôva mia zu ?
« Jehôva [. . .] aa kômô ki naa môr ézing a tobe ntsaman » (2 PIERRE 3:9).
É DZAM BIA YE YEN
Bi ne tobe ndzi-n’nem naa, minkighane minsang Jehôva mia zu, mia ye tobe sôsôe ya tetele.
1. Amu dzé bi ne dzô naa bia ning metam maa fônane ki metam mefe ?
BIA ning metam maa fônane ki metam mefe ! Kada môs, bia yen ane minkulane medzô me ya Bible ma dzalban. Éfônan, bia yen ane « kéza ye ôkuiñ » ye « kéza ye nkiéñ » ba sunghane édjié ye si se ngura (Dan. 11:40, atoan). Bia yen ane ba kanghle mbemba fuèñ ye Édjié Nzame aval daa be ki tare boban, ye naa, bizukh bi-bôr ba yebe fuéñ té (Esaïe 60:22 ; Mat. 24:14). Ye fe naa, bia bele abuiñ bidzi bi ya nsisim « é tam da yiène » (Mat. 24:45-47).
2. Za dzam bi ne tobe de ndzi-n’nem, ve za dzam bia yiène yebe ?
2 Jehôva a tsini naa a vole bia a tugha wokh é bura bemam ma yane bia ôsu (Mink. 4:18 ; Dan. 2:28). Bi ne tobe ndzi-n’nem naa, éyong bitsible binen bia ye sum, bia ye yem é dzam ésese bia yi nfa ye naa, bi ke ôsu ye zôme ya sôsôe ye tsini naa bia tobe élat, amben metam me ne ndzukh bia ning ma. Ve, bia yiène yebe naa, bi ne kaa yem mam mézing nfa melu ma zu. Ayeghle di été, bia ye tare yen amu dzé bia yiène songhane mam mézing bi nga dzô nfa é bura bemam ma yane bia ôsu. Éyong té bia ye yen é mam mézing bia yem nfa melu ma zu, ye aval Ésaa wèè a ne a dzôp été a ye bo mam.
É MAM BI NE KAA YEM
3. Za dzam bi nga bo bii dzô nfa é tam bôr baa ye ki fe bera bele éyong naa ba ve mebun ébe Jehôva, ye naa, amu dzé bi nga tem de ?
3 Metam ô mvus bi nga dzô naa, niène bitsible binen bia ye sum, ékoar-koat môr ézing daa ye ki fe bera tebe é ngam Jehôva, ye ning Armagedón. Bi nga dzô de amu bi nga tem naa, é kada môt ye é kada dzam é nga boban é Ndôn mendzim, é mbe éfônane ye é mam ma ye boban metam mèè. Éfônan, bi nga simane naa, aval ane Jehôva a nga fer mbéñ ye arca nge ki arche kaa naa Ndôn mendzim é sum, éde fe a ye « fer mbéñ » ye mbia émo Satan di, éyong bitsible binen bia ye sum, éé ve naa bôr befe be taa tobe nkôran (Mat. 24:37-39).
4. Amu dzé biaa yiène ki simane naa, é mam mesese me nga boban é tam Noé, ma dzalban metam mèè ? Vakh ayilgha.
4 Ye bia yiène ñong é kada dzam é nga boban é tam Ndôn mendzim ane éfônan ye é mam ma boban metam mèè ? Éyalan é ne kaa. Amu dzé ? Amu éfus ézing ya Bible daa sukh ki ôsimane té asi a. Yésu a nga vaghane « metam Noé » ye asoo déñ, ve, éé dzi ki dzô naa Ndôn mendzim é ne éfônane ye é mam ma boban metam mèè, faa ane kada môt nge ki kada dzam é nga boban tam té, é bele éfônane déñ melu mèè ; ye naa éé dzi ki dzô naa nferane mbéñ ye arca nge ki arche, é ne ngura nkulan adzô ézing. Ve, dzam té daa yili ki naa bii se ki ñong ayeghle ébe nlang Noé ye Ndôn mendzim.
5. (a) Za dzam Noé a nga bo kaa naa Ndôn mendzim é sum ? (Behébreu 11:7 ; 1 Pierre 3:20) (b) Édi da daghe ésèñ minkanghle, aval avé étéñ dèè, da fônan édi ye é tam Noé ?
5 Éyong Noé a nga wokh é fuéñ mbame Jehôva, a nga lere naa a bele mebun éyong a nga long arca nge ki arche (A lang Behébreu 11:7 ; 1 Pierre 3:20). Aval dèè fe, é bôr ba wokh mbemba fuéñ ye Édjié Nzame, ba yiène dzale é mam ba yeghe (Bisè mintôl 3:17-20). Pedro nge ki Pierre a nga luè Noé naa « nkare fuéñ ye sôsôe » (2 Pierre 2:5). Ve, aval ane bi va yen de ayeghle ô mvus, biaa yem ki nge Noé a nga bo ngura aval minkanghle naa a mane kobe ye é bôr besese be mbe béé ning a si, kaa naa Ndôn mendzim é bo. Ému wi, bia dzeng naa bi kanghle bôr besese a si va mbemba fuéñ ye Édjié Nzame, bia bo fe ésèñ té ye ayông. Ve, amben mengu’u mesese bia ve ésèñ té, bii se ki mane kanghle môr asese mbemba fuéñ kaa naa amangha é so. Amu dzé ?
6-7. Amu dzé bi ne dzô naa môr asese aa ye ki mane wokh é mbemba fuèñ bia kanghle kaa naa amangha é kuiñ ? Vakh ayilgha.
6 Tamane fas é dzam Yésu a nga dzô nfa é vôm éséñ minkanghle dèè da ye ke kuiñ. A nga dzô naa, mbemba fuéñ té da ye tobe nkanghlane « si se ngura akal meyong mesese » (Mat. 24:14). Nkulane adzô té, ô nga dzalbaneyang ému a lôr melu mvus. Bi nga kanghleyang mbemba fuèñ ye Édjié Nzame a lôr 1 000 minkobe, ye naa, ngalane é nden wèè jw.org, môra ngap ye é bôr be too si se ngura be ntoo wokh fuéñ té.
7 Ve, Yésu a nga dzô fe beyeghe béñ naa « baa ye ki mane tubane bekisoan besese », nge ki naa, baa ye ki mane kanghle môr ase, kaa naa a zu kikh boan be bôr nsang (Mat. 10:23 ; 25:31-33). Bifiè Yésu bité, bi ne fe bebela metam mèè. Ému, baakuru be bôr ba ning mevôm ba kîlî éséñ minkanghle dèè. Ya fe naa, mintet mi boan mia byale é kada ébuk da lôt. Bia ve mengu’u mese mèè naa bi kanghle mbemba fuèñ ébe « bôr be ye meyong, memvong ye minkobe misese » (Mel. 14:6). Ve, bebela a ne naa, biaa ye ki mane kanghle mbemba fuéñ ébe é kada môr a ning a si va kaa naa amangha é so.
8. Za minsili bi ne sili nfa minkighane minsang Jehôva mia zu ? (A daghe fe évaghle).
8 Nfa é mam bi tareya yen, bi ne sili minsili mi : Za dzam da yane é bôr béé bele ki maa naa ba wokh mbemba fuèñ kaa naa bitsible binen bi sum ? Za aval nsang Jehôva ba é Moan wèñ, éñi a nga kee ayem ya kikh minsang, ba ye de bo ? (Jean 5:19, 22, 27 ; Bisè mintôl 17:31) Nten ye nlô-adzô wi, wa dzô naa, Jehôva « aa kômô ki naa môr ézing a tobe ntsaman. » Ndaane de, a kômô naa « besese be dzôban » (2 Pierre 3:9 ; 1 Tim. 2:4). Bebela a ne naa, bia yiène yebe naa, Jehôva aa be ki bia dzô é dzam a ye bo naa a yalane nsili té. Édi é ne été é ne naa, déé se ki sibamekôm naa a dzô bia é dzam a bo nge ki édi a ye bo.
Aval avé Jehôva a ye belane é bôr béé dzi ki bele maa ya bèè mbemba fuèñ kaa naa bitsible binen bi sum ? (A daghe abong 8) c
9. Za dzam Jehôva a kulaneya bia a Bible été ?
9 Jehôva a kulaneya bia é mam mézing a ye bo a Bible été. Éfônan, Biblia a dzô bia naa, Jehôva a ye ve naa, « bikoar-koat » bi-bôr béé dzi ki bele tam ya yebe mbemba fuèñ, ye tsen bining bieba be bera so éning (Bisè mintôl 24:15 ; Luc 23:42, 43). Dzam té da so bura minsili mife.
10. Za minsili mife bi bele ?
10 Ye é bôr besese ba ye wu é tam bitsible binen, ba ye tobe ntsamane mbèmbèè, kaa ôyane naa be ne wôme ? Bible a tugha lere naa, é bôr besese be tele Jehôva ye nsama bangele béñ é ngam ayat, kaa naa ba kômô tsen, ba ye tobe ntsaman Armagedón, kaa naa be ne bera wôme (2 Beth. 1:6-10). Ve, é bôr bevoo ki ? Éfônan, bevoo be ne wu é tam bitsible binen amu ba koan, nge ki naa be ntoo min’nôm. A ne fe bo naa, bevoo ba wu accidente nge ki accident, éba bevoo naa, môr nfe éñe a va wiñ be (Eccl. 9:11 ; Zach. 14:13). Ye bôr bézing be ye nsama té be ne bo « bikoar-koat » bi-bôr ba ye wôme nféféñ éning ? Éyalane é ne naa, biaa yem ki de.
É DZAM BIA YEM
11. Za dzam ba ye daghe éyong ba ye kikh bôr nsang Armagedón ?
11 Bia yem abuiñ mam nfa é bura bemam ma zu. Éfônan, bia yem naa, Armagedón, ba ye kikh bôr nsang ye aval be nga ñong é bobeñang Christ (Mat. 25:40). É bôr ba ye lere naa, ba sukh minwoane Christ asi, ba ye be ñong ane mintôma. Bia yem fe naa, bobeñang bézing Christ ba ye bo a si va kaa naa bitsible binen bi sum, ye naa, baa ye ki kee be a dzôp été kaa naa Armagedón a sum. Nté bobeñang Christ bézing be ngen a si va, é ne kuiñ naa, é bôr be bele mbemba étéñ n’nem, be bera bele tam ye a sukh ésèñ ba bo asi (Mat. 25:31, 32 ; Mel. 12:17). Amu dzé mam meté me ne éban ?
12-13. Aval avé bôr bézing be ne ñong mam éyong ba ye yen ntsamane « Babilonia ônen » ? (A daghe fe évaghle).
12 Amben éyong bitsible binen bia ye sum, é ne kuiñ naa, é bôr ba yen ane ba tsam « Babilonia n’nen » be simane naa, a ke kuè Bengaa Jehôva be sohang ba tsiè dzam té ayap. Ye é ne kuiñ naa, é bôr bézing ba ye yen ane Babilonia n’nen a tobe ntsaman é tam bitsible binen be sughlane ve mebun meba ébe Jehôva ? (Mel. 17:5 ; Ézéch. 33:33).
13 Asughlane té da ye fônan é dzam é nga kuiñ Egipto melu Moisés. Simghane naa « mura nsama bôr be too nfulan » be nga tông Israel éyong be nga kôre Egipto. É ne kuiñ naa, bôr bézing be ye été, be nga sum bele mebun ébe ñe éyong be nga wokh mbame Moisés a nga ve be ngalane bibubua awôm a nga bo (Akô. 12:38). Nge aval dzam té é boban niène ba ye mane tsam Babilonia n’nen, ye bia ye wokh n’nem mintèñ naa bôr bézing be va zu kôane bia ôyôm tam kaa naa amangha é kuiñ ? Kaa dzôm ! Bia kômô bo ane Ésaa wèè a ne a dzôp été, « é Nzame a ne mvam ye n’nem mintèñ, kaa ébubu a wokh ôlun ye ndzalane ye édzing é ne mbèmbèè ya bebela b (Akô. 34:6).
É bôr bézing ba ye yen ane « Babilonia nge ki Babylone n’nen » a tobe ntsaman, be ne simane naa Bengaa Jehôva be nga so ba kobe mam meté ayap (A daghe mebong 12-13) d
14-15. Ye éning é ne mbèmbèè bôr da zu, da daghe é tam a nga wu nge ki é vôm a mbe a too ? Vakh ayilgha (Bya 33:4, 5).
14 Biyong bizing, bobedzang nge ki bekal bèè ba dzô nfa môr ye é nda-bôr deba aa sèhane ki Jehôva naa : « Da ye dang bo mbeng, nge a wu kaa naa bitsible binen bi sum, amu aval té a bele ôyane naa a ye wôme. ») Baa dzô ki de ya mbia ôsiman. Ve, éning é ne mbèmbèè môt, daa daghe ki é tam a wu. Jehôva a ne Nkikh minsang a ne kaa ékop ; a ye kikh minsang mi ne sôsôe ya tetele (A lang Bya 33:4, 5). Bi ne tobe ndzi n’nem naa, « Nkikh minsang ye si se ngura » a ye bo é dzam é ne sôsôe (Atar. 18:25).
15 Da yiène fe naa bi dzô naa, éning é ne mbèmbèè môr, daa daghe ki é vôm a ning. Bii se ki vaghle tem naa, Jehôva a ñong é baakuru be-bôr be too mesi béé dzi ki bele tam ya bèè mbemba fuèñ ye Édjié dèñ ane « bikela » (Mat. 25:46). Nkikh minsang ye si se ngura, a dang bis bôr beté a lôr bia. Biaa yem ki aval Jehôva a ye wulu mam é tam bitsible binen. Éyong ézing, bôr bézing be ye été, ba ye bele tam ya yeghe a yem Jehôva, a ve mebun meba ébe ñe, ye tebe é ngam dèñ, éyong a ye fubu émièn asu meyong mesese (Ézéch. 38:16).
Niène bitsible binen bia ye sum, [. . .] ye é ne kuiñ naa, éyong é bôr bézing ba ye yen mam meté be tsen min’nem miaba ?
16. Za dzam bi yegheyang nfa Jehôva ? (A daghe fe évaghle).
16 Ngalane ayeghe Bible dèè, bi nga yeghe naa, Jehôva a bira yen éning moan môr mura dzam. A nga ve éning é Moan wèñ naa bia bese bi bele maa ya ning mbèmbèè (Jean 3:16). Bia besese bi nga wôran é môra édzing Jehôva (Esaïe 49:15). A yem kada môr ye ébe bia ye éyôla déñ. A yem bia aval da ve naa, amben bia wu, a ne bia bera vele, amu a siman é boan bemam mesese ma tsinane bia, ye mesimane mesese bii mbe bi bele ! (Mat. 10:29-31). Bi bele mbemba mekalgha ya tobe ndzi-n’nem naa, ndzidzing Ésaa wèè a ne a dzôp été, a ye kikh kada môr nsang aval da yiène, ya sôsôe ya mvam (Jacq. 2:13).
Bi ne tobe ndzi-n’nem naa Jehôva a ye kikh kada môr nsang aval da yiène, ya sôsôe ye fe mvam (A daghe abong 16)
17. Za dzam bia ye yen ayeghle da zu ?
17 Éndagha, bi nga tugheya wokh naa ésèñ minkanghle dèè é ne é dzam bia yiène bo ye avôô. Amu dzé bi ne de dzô ? Ye naa, za dzam da tsini bia naa bi ke ôsu ya kanghle mbemba fuèñ ye ayông ? Bia ye tugha yalane minsili mité ayeghle da zu.
ZA 76 Dzôghe ma ane wa woran
a Naa mi yen amu dzé bi nga bo mintsenan mité, daghane nlô-adzô « A Jehová le gusta enseñar de forma sencilla nge ki Tu as trouvé bon d’agir ainsi » a La Atalaya, 15 de marzo de 2015 págs. 7-11 nge ki La Tour de Garde, 15 mars 2015 p. 7-11.
b Niène Babylone n’nen a ye tobe ntsaman, bebo bisèñ Jehôva ba ye tebe meboblan été, éyong Gog ya Magog a ye lumane be. É bôr besese ba ye tebe é ngam Nzame niène ba ye mane tsam Babylone n’nen, baa fe ba ye tebe meboblan été.
c AYILGHA YE FÔRÔ : Bitéñ bilal bia lere amu dzé bôr bézing baa be ki wokh é mbemba fuèñ bia kanghle si se ngura : (1) Minenga a ning é si n’yebe ô tele ôsu wa ve naa a taa wokh mbemba fuéñ, (2) minlughane mia ning é si mam me politik ma kîlî mbemba fuèñ ye lere naa é ne mbia dzam, ye (3) môr a ning é vôm ô ne édedèè ôyap ye ndzukh a ke kanghle.
d AYILGHA YE FÔRÔ : Étong minenga é nga takh nfa ya nsisim, a kikh naa a bulan a bebela été, éyong a siman é dzam a nga yeghe nfa ntsamane « Babylone n’nen. » A tsenang ôsimane wéñ ye bulan ébe bebyèñ béñ be ne bekristen. Nge aval mam meté me boban, bia kômô vu é fulu mvam ye n’nem éngôngoo ndzidzing Ésaa wèè a ne a dzôp été, ye vakh amu mbo minsem a bereya so.
