Inikiet ke isua, Mme Ntiense Jehovah ye ediwak miliọn mbon emi mmọ ẹsikotde ẹsisop idem ọtọkiet eti n̄kpa Jesus, nte enye ọkọdọhọde. (Luke 22:19) Edinam emi esinam ikụt ufọn n̄kpọ oro Jesus akanamde, ini enye akakpade ke ibuot nnyịn. Edinam emi esinam ikụt n̄ko ufọn emi n̄kpa Jesus anamde ọnọ nnyịn idahaemi ye se enye edinamde ke ini iso.​—John 3:16.

 Ekpedi ama odụk Editi n̄kpa Jesus isua emi m̀mê ukûdụkke, didie ke ekeme ndidia ufọn n̄kpa oro? Jesus ọkọdọhọ inam akpan n̄kpọ iba emi:

1.  1. Kpep n̄kpọ ban̄a Abasi ye Jesus. Ini Jesus ọkọbọn̄de akam ọnọ Ete esie ke heaven, enye ọkọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.”​—John 17:3.

2.  2. Nanam se ekpepde. Jesus ama enen̄ede etịn̄ ke ọfọn nnyịn inanam se enye ekpepde nnyịn. Ke uwụtn̄kpọ, enye akada ọwọrọetop Ukwọrọikọ Esie ke Obot ekesịn ke ufọk ke nditoro owo ekededi oro “okopde ikọ [esie] onyụn̄ anamde mmọ.” (Luke 6:46-48) Isan̄ en̄wen enye ama ọdọhọ ete: “Edieke mbufo ẹfiọkde mme n̄kpọ emi, mbufo ẹyekop inemesịt edieke ẹnamde mmọ.”​—John 13:17.

 Ndi ayama ndikpep n̄kpọ en̄wen mban̄a Abasi ye Jesus? Ndi akpama ẹn̄wam fi ananam mme n̄kpọ oro ekpepde? Se ndusụk n̄kpọ oro ẹkemede ndin̄wam fi mi.

 Ukpepn̄kpọ Bible mfọn oro isinịmde ye mme owo an̄wam mmọ ẹdiọn̄ọ se Bible ekpepde ẹnyụn̄ ẹnanam se enye etịn̄de.

•   Ka ikpehe emi ẹwetde Tie ye Owo Emi Ọdiọn̄ọde Bible Kpep Bible man okụt nte isikpepde owo Bible.

•   Se vidio Nte Isikpepde Owo Bible man okụt nte nnyịn Mme Ntiense Jehovah isikpepde owo Bible.

 Mme Ntiense Jehovah ẹsisop idem ikaba ke urua ke Ufọkmbono Obio Ubọn̄ man ẹkpono Abasi. Mmọ ẹsikpep, ẹnyụn̄ ẹneme nte ẹkpenamde se Bible ekpepde ke mme mbono esop emi.

 Owo ekededi ekeme ndidụk idịghe Mme Ntiense Jehovah ikpọn̄ ẹsidụk. Emekeme ndikodụk ke Ufọkmbono Obio Ubọn̄ mîdịghe ada Intanet odụk, etiene ebiet emi odude.

•   Se vidio Nso ke Ẹsinam ke Ufọkmbono Obio Ubọn̄?, man atabi ese nte mbono esop nnyịn esitiede.

•   Ka ikpehe emi ẹwetde Mbono Esop Mme Ntiense Jehovah, man okụt ebiet isinịmde mme mbono esop nnyịn.

 Ediwak ibuotikọ ye mme vidio oro ẹdọn̄de ke ikpehe Intanet emi ẹkeme ndin̄wam fi ekpep n̄kpọ en̄wen aban̄a Jesus ye ufọn oro n̄kpa esie anamde ọnọ nnyịn.

 Ke uwụtn̄kpọ, man okụt nte n̄kpa owo kiet anamde ẹkeme ndinyan̄a ediwak miliọn owo, kot ibuotikọ emi, “Didie ke Jesus Anyan̄a Ubonowo?” ye “Ntak Emi Jesus Ọkọbọde Ufen Onyụn̄ Akpade?” mîdịghe se vidio Ntak Emi Jesus Akakpade?