Mme Ntiense Jehovah ifan̄ ke afo ọdiọn̄ọ? Ekeme ndidi ndusụk nnyịn idi mbọhọidụn̄ fo, inam utom ye afo, m̀mê idu ke ukem ubet ukpepn̄kpọ ye afo. Mîdịghe ekeme ndidi ima inyene nneme Bible ye afo. Edi nnyịn idedi mmanie, n̄ko, ntak emi nnyịn isinemede se inịmde ke akpanikọ ye mme owo an̄wan̄wa?

Nnyịn idi mme owo nte afo. Nnyịn ito nsio nsio ebiet, inyụn̄ idu ke nsio nsio idaha ke uwem. Ndusụk nnyịn ikesika ido ukpono efen, ke adan̄aemi ndusụk mîkenịmke ke Abasi odu. Edi mbemiso ikakabarede idi Mme Ntiense, kpukpru nnyịn ima ida ini itịm idụn̄ọde se Bible ekpepde. (Utom 17:11) Nnyịn ima inyịme ke se ikekpepde edi akpanikọ, inyụn̄ imek ke idem nnyịn ndituak ibuot nnọ Jehovah Abasi.

Nnyịn imọbọ ufọn ito se ikpepde ke Bible. Nnyịn imesisobo mfịna inyụn̄ inyene mmeme nte kpukpru owo eken ẹnyenede. Edi sia nnyịn idomode ndida mme edumbet Bible nsịn ke edinam kpukpru usen, uwem nnyịn enen̄ede okpụhọde. (Psalm 128:1, 2) Ntak kiet edi oro nnyịn isinemede nti n̄kpọ oro ikpepde ke Bible ye mbon en̄wen.

Nnyịn ida nti edu idu uwem. Nti edu oro Bible ekpepde mi ẹnam ikop inemesịt inyụn̄ ikpono mme owo, adianade ye mme utọ edu nte edinam akpanikọ ye mfọnido. Mmọ ẹtịp ẹsịn ke ndinam ẹnyene nti owo emi ẹdude uwem oro enyenede ufọn, mmọ ẹsịn udọn̄ ẹnọ mme ubon ndidiana kiet nnyụn̄ ndu eti uwem. Sia nnyịn inịmde ke “Abasi inamke asari,” se inịmde ke akpanikọ anam idiana kiet nte ubon ke ofụri ererimbot, ndien ebiet emi itode ye ukara ikemeke ndibahade nnyịn. Okposụkedi emi nnyịn idide mme owo nte kpukpru owo eken, nnyịn idi ata san̄asan̄a mme owo.—Utom 4:13; 10:34, 35.

• Nso ke Mme Ntiense Jehovah ẹda ẹbiet mme owo eken?

• Nti edu ewe ke Mme Ntiense ẹnyene ke mmọ ndikpep Bible?