Akana ikọt Jehovah ẹka iso ẹkpep Ikọ Abasi ke mme mbono esop, edi utọ n̄kpọ emi ekedi edue-ukot-akpa-itọn̄ ini oro. Ke mme isua oro ẹketrede utom nnyịn, ẹma ẹmụm ediwak nditọete ẹnyụn̄ ẹbiere n̄kpọkọbi ẹnọ mmọ ediwak ini.

Juanita Borges ọdọhọ ete: “Ini n̄kodụkde esop ke 1953, mma ndiọn̄ọ ke sia ndide Ntiense Jehovah ke ẹkeme ndimụm mi ini ekededi. Se ikonyụn̄ itịbede edi oro. Ke ini n̄kakade ndise Sista Eneida Suárez ke November 1958, ndedịbe bodisi ẹma ẹdidori nnyịn ikọ ẹte ke inịm mbono esop. Ẹma ẹbiere n̄kpọkọbi ọfiọn̄ ita ẹnọ nnyịn mbiba, ẹnyụn̄ ẹdọhọ ikpe pesos 100, emi ekedide ata ediwak okụk ini oro.”

Ukara ẹma ẹtịme nte ẹkekeme man nditọete idinịm mbono esop, edi mmọ ẹkesụk ẹnenịm. Edi akana mmọ “ẹnyene mbufiọk nte urụkikọt ẹnyụn̄ ẹnana ndudue nte ibiom.” (Matt. 10:16) Andrea Almánzar ọdọhọ ete:  “Ikesika ebiet emi ẹnịmde mbono esop ke nsio nsio ini. Nnyịn ikesisọpke ikpọn̄ do sia mme owo ẹkesinyọn̄ nsio nsio mbak owo ẹdidiọn̄ọ se ikanamde.”

Jeremías Glass, emi akamanade ke ini León ete esie osụk odude ke ufọk-n̄kpọkọbi, akana baptism ke 1957 ke ini edide isua itiaba. Enye eti nte ẹkesidịbede ke ufọk mmọ ẹnịm mbono esop ye se mmọ ẹkesinamde man owo ididiọn̄ọ se ikade iso do. Jeremías ọdọhọ ete: “Ẹma ẹwet nọmba ke ekpri nsọsọn̄ babru ẹnọ kpukpru owo man owo kiet kiet ọdiọn̄ọ ini emi enye edinyọn̄de. Mbono esop ama asuana, ete mi ọyọdọhọ n̄kada ke enyịnusụn̄ nse nọmba owo kiet kiet, nnam mmọ ẹsan̄a iba iba ẹwọrọ, ẹnyụn̄ ẹsan̄a nsio nsio usụn̄ ẹnyọn̄.”

N̄kpọ en̄wen emi ẹkenamde ekedi ndinam n̄kpọ ke ini emi owo mîdisọpke imụm owo. Ke uwụtn̄kpọ, Pablo González ekekpep Mercedes García, eyen eyeneka esie n̄kpọ. Eka Mercedes ama akpa ọkpọn̄ enye ye n̄kpri nditọeka esie owo usụkkiet ke ini enye ekedide isua itiaba. Ini emi ete esie okodu ufọk-n̄kpọkọbi. Mercedes akana baptism ke 1959 ke ini enye ekedide isua usụkkiet. Ẹkenọ utịn̄ikọ baptism oro ke n̄kanika ebe ita okoneyo man owo idimụm mmọ. Ẹkenam emi ke ufọk eyenete, ekem ẹka ẹkenịm enye baptism ke Akpa Ozama emi okodude ke ibuot obio. Mercedes ọdọhọ ete: “Ima itọn̄ọ isan̄ unyọn̄ ke n̄kanika ebe ition usiere. Ini oro ke mme owo ẹketọn̄ọ ndidemede idap.”