KE Jesus ama ọkọkwọrọ ikọ isua ita ye ubak ke isọn̄, enye ama ọfiọk ke uwem imọ ọmọn̄ ọsọp esịm utịt ke isọn̄. Mme adaiso Ido Ukpono Mme Jew ẹma ẹdụk odu ẹyom ndiwot enye, edi mmọ ẹkekere ke otuowo ẹmọn̄ ẹsịn ndutịme, sia mme owo ẹkedade Jesus nte prọfet. Edi Satan ọdọn̄ kiet ke otu mme apostle Jesus 12—Judas Iscariot—ete ada Jesus ọnọ. Mme adaiso ido ukpono oro ẹma ẹdọhọ ke iyọnọ Judas okụk silver 30 man enye ada Jesus ọnọ mmimọ iwot.

Ke okoneyo oro ẹkeyomde ndiwot Jesus, enye ama osop idem ye mme apostle esie man enịm Passover. Ke enye ama akanam Judas ọwọrọ, enye ama ọtọn̄ọ obufa n̄kpọ, oro edi, Udia Mbubreyo Ọbọn̄. Enye ama emen uyo, ọbọn̄ akam, onyụn̄ edeme ọnọ mme apostle esie 11 oro ẹkesụhọde onyụn̄ ọdọhọ mmọ ete: “Emi ada aban̄a ikpọkidem mi eke ẹdinọde kaban̄a mbufo. Ẹka iso ẹnam emi nditi mi.” Enye onyụn̄ anam kpasụk ntre ye wine, onyụn̄ ọdọhọ ete: “Cup emi ada aban̄a obufa ediomi eke ebede ke iyịp mi.”—Luke 22:19, 20.

Jesus ama enyene ediwak n̄kpọ ndisian mme apostle esie okoneyo oro. Enye ama ọnọ mmọ obufa ibet—ete ẹma kiet eken ke ofụri esịt. Enye ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Enye ama ọdọhọ mmọ ẹkûyak esịt etịmede mmọ ke ntak n̄kpọ mmọn̄eyet oro editịbede ke mîbịghike. Jesus ama enen̄ede ọbọn̄ akam ke ibuot mmọ. Mmọ ẹma ẹtie ọtọkiet ẹkwọ itoro ekem ẹwọn̄ọ ẹka in̄wan̄ Gethsemane okoneyo oro.

Ke ini mmọ ẹkesịmde do, Jesus ama ọtọn̄ọ edọn̄ ọbọn̄ akam, an̄wan̄a ofụri esịt esie ọnọ Abasi. Ikebịghike, mbonekọn̄, mme oku, ye mbon eken ẹma ẹdi ndimụm enye. Judas ama asan̄a aka eketịm Jesus inua man anam mmọ ẹdiọn̄ọ Jesus. Ke ini mbonekọn̄ oro ẹkemụmde Jesus, mme apostle esie ẹfen̄e.

Ke ini ẹkemende Jesus ẹka akwa esop mme Jew, enye ama etịn̄ an̄wan̄wa ete ke imọ idi Eyen Abasi. Esop oro ọkọdọhọ ke enye etịn̄ ikọ isụn̄i, ntre ke odot n̄kpa. Ekem, ẹma ẹda Jesus ẹsọk Pontius Pilate emi ekedide owo ukara Rome. Kpa ye oro Pilate okokụtde ke Jesus iduehe n̄kpọ ndomokiet, enye ama ayak Jesus ọnọ mbon ntịme oro ẹkeyomde ẹwot enye.

Ẹma ẹmen Jesus ẹka ebiet emi ẹkotde Golgotha, ndien mbonekọn̄ Rome ẹkọn̄ enye do ke eto ẹwot. Eyo ama okụt ufọt uwemeyo. Ekem Jesus akpa, ndien ata akwa unyekisọn̄ etịbe. Ndien ẹmen enye ẹkebụk ke udi oro ẹtụn̄de ke akamba itiat. Ke ndan̄nsiere, mme oku ẹdọn̄ ẹkenịm idiọn̄ọ ke udi oro ẹnyụn̄ ẹnịm owo ekpeme inuaotop udi. Ndi Jesus edidu ke udi ke nsinsi? N̄wan̄ansa-o! N̄kponn̄kan utịben̄kpọ ọmọn̄ etịbe ke mîbịghike.

—Ẹda ẹto Matthew ibuot 26 ye 27; Mark ibuot 14 ye 15; Luke ibuot 22 ye 23; John ibuot 12 esịm 19.