IKPEHE 2
Ẹbịn Mmọ Ẹsion̄o ke Paradise
Ọsọn̄ibuot angel kiet anam akpa erenowo ye n̄wan, Adam ye Eve, ẹsọn̄ ibuot ye Abasi. Ndien nsọn̄ibuot mmọ emi ada n̄kpa ọsọk ubonowo
ABASI ekebem iso obot mme angel ata anyan ini mbemiso obotde owo. Ke ini Adam ye Eve ẹkesụk ẹdude ke In̄wan̄ Eden, ọsọn̄ibuot angel oro idiọn̄ọde nte Satan kpa Devil ama akabian̄a Eve anam enye adia mfri eto oro Abasi ọkọdọhọde mmọ ẹkûdia.
Satan akada ke edem urụkikọt etịn̄ ikọ ọnọ Eve, ikọ esie ọkọwọrọ ke Abasi iyomke n̄kpọ ọfọn ye n̄wan oro ye ebe esie. Angel oro ọkọdọhọ Eve ke enye ye ebe esie idikpaha edieke mmọ ẹdiade mfri eto oro Abasi akakpande. Ntem ke Satan okodori Abasi ikọ ete ke Abasi iketịn̄ke akpanikọ inọ nditọ Esie. Owo abian̄a emi akanam etie nte ke ndisọn̄ ibuot ye Abasi ayanam owo ọfiọk n̄kpọ onyụn̄ osio owo ke ufụn. Edi kpukpru emi ẹkedi nsu, enye okonyụn̄ edi akpa nsu emi ẹkesude ke isọn̄. Satan ekenen̄ede eneni aban̄a ukara Abasi—oro edi, m̀mê Abasi odot ndikara, n̄ko m̀mê Enye akara ke usụn̄ oro enende, m̀mê ukara Esie anam ufọn ndomokiet ọnọ mbon oro Enye akarade.
Eve ama enịm nsu oro Satan okosude. Enye ama owụk enyịn ese mfri oro, ekem ekịbi adia. Ekem enye ọnọ ebe esie, ndien ebe esie adia. Ntre mmọ ẹma ẹkabade ẹdi mme anamidiọk. Okposụkedi emi se mmọ ẹkenamde oro eketiede nte ekpri n̄kpọ, enye ekedi ata nsọn̄ibuot. Adam ye Eve ndikokoi mbiat ibet Abasi okowụt ke mmọ ikenyịmeke Andibot emi ọkọnọde mmọ kpukpru n̄kpọ, esịnede mfọnmma uwem, akara mmọ.
Mfri oro “ayanuak fi ibuot, afo oyonyụn̄ anuak enye nditịn̄-ikpat.”—Genesis 3:15
Abasi ama ebiere ikpe ọnọ mbon nsọn̄ibuot emi. Enye ama ọdọhọ ke Andifak m̀mê Mfri oro ẹken̄wọn̄ọde eyedi edisobo Satan emi ẹkotde urụkikọt. Abasi ikosoboke Adam ye Eve ke ndondo oro, edi ama okop mbọm aban̄a nditọ mmọ oro mîkamanake kan̄a. Nditọ oro ẹyenyene idotenyịn ke ini iso sia Enye emi Abasi edidọn̄de edi, ọyọdiọn̄ kpukpru se mbon nsọn̄ibuot oro ẹkebiatde. Nte ẹkesụk ẹwetde Bible ẹka, ntre ke ẹkeyarade nte kpukpru se Abasi aduakde aban̄a Andinyan̄a emi ẹdisude ye Owo emi enye edidide.
Abasi ama ebịn Adam ye Eve osion̄o ke Paradise oro. Akana mmọ ẹnam utom ọkpọsọn̄ man ẹnyene se ẹdiade ke ẹma ẹkewọrọ ke In̄wan̄ Eden. Eve ama oyomo onyụn̄ aman eyen erenowo, ndien mmọ ẹsio enye oro Cain. Mmọ ẹma ẹnyụn̄ ẹnyene nditọ irenowo ye iban efen, esịnede Abel ye Seth emi ekedide ete ete Noah.
—Ẹda ẹto Genesis ibuot 3 esịm 5; Ediyarade 12:9.
