Mme owo ke nsio nsio itie ẹnyene nte mmọ ẹdade mmịn emi ekemede ndinam owo. Ndusụk owo ẹsima nditie ye mme ufan mmọ ndusụk ini n̄n̄wọn̄ utọ mmịn oro. Ndusụk owo isiyomke-yom utọ mmịn oro odụk mmọ inua. Ndien enyene mbon emi ẹsimade ndin̄wọn̄ enye tutu enye odụk mmọ ibuot. Nso ke Bible etịn̄ aban̄a mmịn emi ekemede ndinam owo?

1. Ndi ọdiọk ndin̄wọn̄ mmịn emi ekemede ndinam owo?

Bible idọhọke owo okûdedei un̄wọn̄ mmịn emi ekemede ndinam owo. Utu ke oro, Bible ọdọhọ ke “wine emi anamde esịt adat owo” esịne ke otu nti n̄kpọ emi Abasi ọkọnọde nnyịn. (Psalm 104:14, 15) Ndusụk nti ikọt Abasi ke eset, iren ye iban, ẹma ẹsin̄wọn̄ mmịn emi ekemede ndinam owo.​—1 Timothy 5:23.

2. Nso ke Bible etịn̄ aban̄a owo ndin̄wọn̄ mmịn?

Jehovah asua owo ndin̄wọn̄ mmịn awak akaha ye owo ndin̄wọn̄ mmịn tutu anam owo. (Galatia 5:21) Ikọ esie ọdọhọ ete: “Kûdu ke otu mme ofobo wine.” (Mme N̄ke 23:20) Ntre ikpoyom ndin̄wọn̄ mmịn​—ekpededi edi ke ufọk nnyịn​—ikpanaha in̄wọn̄ tutu ọtọn̄ọ ndidụk nnyịn ibuot, tutu anam itịn̄ ikọ m̀mê inam n̄kpọ ntịme ntịme, m̀mê in̄wọn̄ tutu ọnọ nnyịn udọn̄ọ. Ekpedi nnyịn isikemeke ndin̄wọn̄ mmịn ekpri ekpri, ọkpọfọn itetre ofụri ofụri ndisin̄wọn̄.

3. Nso ke nnyịn mîkpanamke ke itie emi mmịn emi ekemede ndinam owo odude?

Owo kiet kiet edibiere m̀mê iyọn̄wọn̄ mmịn emi ekemede ndinam owo m̀mê idin̄wọn̄ke. Ikpanaha ibiere ikpe inọ owo ke ntak emi enye ọn̄wọn̄de utọ mmịn oro, ikponyụn̄ inaha idọhọ owo emi mîyomke ndin̄wọn̄ ite ọn̄wọn̄. (Rome 14:10) Ikpanaha in̄wọn̄ mmịn edieke ikụtde ke oro ekeme ndinam owo en̄wen atuak ukot ọduọ. (Kot Rome 14:21.) Ikọ Abasi ọdọhọ yak “owo kiet kiet okûyom ufọn idemesie, edi oyom ufọn owo en̄wen.”​—Kot 1 Corinth 10:23, 24.

 SỊN IDEM KPEP

4. Biere m̀mê eyesin̄wọn̄ mmịn m̀mê udusun̄wọn̄ke

Jesus akada didie mmin emi ekemede ndinam owo? Akpa utịben̄kpọ emi Jesus akanamde ọbọrọ mbụme oro. Kot John 2:1-11, ekem ẹbọrọ mbụme emi ẹnyụn̄ ẹneme ẹban̄a mmọ:

• Utịben̄kpọ oro owụt ke Jesus akada didie mmịn emi ekemede ndinam owo ye mbon emi ẹsin̄wọn̄de utọ mmịn oro?

• Sia Jesus mîkọdọhọke ke ọdiọk ndin̄wọn̄ mmịn emi ekemede ndinam owo, didie ke Christian akpada owo emi ọn̄wọn̄de utọ mmịn oro?

Edi oro iwọrọke ke ana ini ekededi Christian okụtde mmịn emi ekemede ndinam owo ke ana enye ọn̄wọn̄. Kot Mme N̄ke 22:3, ekem da se itienede mi biere ini emi mîfọnke ọn̄wọn̄ mmịn:

• Okpoyom ndiwat uwat m̀mê ndikama masịn nnam utom.

• Edieke asan̄ade ye idịbi.

• Dọktọ ọkpọdọhọ fi okûn̄wọn̄ mmịn.

• Ekpedi usukemeke ndin̄wọn̄ ekpri ekpri.

• Edieke ibet ukara akpande fi ndin̄wọn̄ mmịn.

• Okpodu ye owo emi ekesinyenede mfịna mmịn onyụn̄ an̄wanade-n̄wana nditre.

Okpoyom ndinam ndọ m̀mê usọrọ, nso idin̄wam fi ọdiọn̄ọ m̀mê ọyọnọ mmịn emi ekemede ndinam owo? Se VIDIO emi.

Kot Rome 13:13 ye 1 Corinth 10:31, 32. Ama okot itie kiet ama, ẹtuak ẹda kan̄a ẹbọrọ mbụme emi ẹnyụn̄ ẹneme ẹban̄a enye:

• Nso n̄kpọ ke itie Bible emi idin̄wam fi ebiere ndinam se idinemde Jehovah?

 5. Biere udomo mmịn emi ọkpọn̄wọn̄de

Edieke ebierede ndin̄wọn̄ mmịn emi ekemede ndinam owo, ti ke kpa ye oro Jehovah mîkpanke owo ndin̄wọn̄ utọ mmịn oro, ke enye iyomke owo ọn̄wọn̄ akaha. Ntak-a? Kot Hosea 4:11, 18, ekem ẹbọrọ mbụme emi ẹnyụn̄ ẹneme ẹban̄a enye:

• Nso ikeme nditịbe owo ọkpọn̄wọn̄ mmịn akaha?

Nso idin̄wam nnyịn ikûn̄wọn̄ mmịn ukaha? Ọfọn inịm adan̄a inyụn̄ iti ke ọkpọsọn̄ mmịn ekeme ndinam nnyịn. Kot Mme N̄ke 11:2, ekem ẹbọrọ mbụme emi ẹnyụn̄ ẹneme ẹban̄a enye:

• Ntak emi ọfọnde ebiere udomo mmịn emi edisin̄wọn̄de?

6. Se akpanamde man udûn̄wọn̄ mmịn ukaha

 SE IKPEPDE

Mmịn esịne ke otu n̄kpọ emi Jehovah ọnọde nnyịn man anam esịt enem nnyịn. Edi enye imaha owo ọn̄wọn̄ mmịn akaha, inyụn̄ imaha owo ọn̄wọn̄ mmịn tutu anam owo.

Se M̀mê Emeti

• Nso ke Bible etịn̄ aban̄a mmịn emi ekemede ndinam owo?

• Ntak emi mîfọnke owo ọn̄wọn̄ mmịn akaha?

• Nso ke nnyịn mîkpanamke owo emi oyomde ndin̄wọn̄ mmịn m̀mê owo emi mîyomke ndin̄wọn̄?