UKPEPN̄KPỌ 20
Nte N̄kpọ Asan̄ade ke Esop Abasi
Jehovah idịghe Abasi ndutịme. (1 Corinth 14:33) Ntre akpana n̄kpọ asan̄a ke nde ke nde ke otu ikọt esie. Ẹsinam n̄kpọ didie ke esop ata mme Christian? Nso ke kpukpru nnyịn ikpanam man n̄kpọ asan̄a ke nde ke nde?
1. Anie edi ibuot esop ata mme Christian?
“Christ [edi] ibuot ọnọ esop.” (Ephesus 5:23) Enye etie ke heaven ada ikọt Jehovah ke ofụri isọn̄ usụn̄. Jesus ama emek mbiowo oro ẹnamde n̄kpọ Abasi ẹbịghi nte “ofụn emi anamde akpanikọ onyụn̄ enyenede ọniọn̄”—mmọ ke ẹsikot Otu Emi Ẹsede Ẹban̄a Utom Mme Ntiense Jehovah. (Kot Matthew 24:45-47.) Irenowo emi ẹnam ukem se mme apostle ye mbiowo ke Jerusalem ẹkesinamde; mmọ ẹsiteme esop Mme Ntiense Jehovah ke ofụri ererimbot se ẹkpenamde. (Utom 15:2) Edi idịghe mmọ ẹda nnyịn usụn̄. Mmọ ẹsida ini ẹdụn̄ọde Bible man ẹdiọn̄ọ se Jehovah oyomde ẹnam, ẹnyụn̄ ẹsụk ibuot ẹnọ Jesus emi edide Adausụn̄ nnyịn.
2. Mmanie ẹdi mbiowo, ndien nso ke mmọ ẹsinam?
Mbiowo ẹdi irenowo emi ẹsọn̄ọde ẹda ẹnam n̄kpọ Abasi. Ẹsimek mmọ man ẹda Ikọ Abasi ẹkpep ikọt Abasi usụn̄ Abasi, ẹn̄wam ikọt Abasi, ẹnyụn̄ ẹsọn̄ọ mmọ idem. Owo isikpehe mbiowo okụk. Mmọ ẹdiọn̄ọ ke Bible ọdọhọ mmimọ ete: “Ẹnam ke edinyịme esịt; ẹkûnyụn̄ ẹnam ke ntak emi ẹmade idiọk udori, edi ẹnam koro emi enen̄erede ọdọn̄ mbufo ndinam.” (1 Peter 5:1, 2) Irenowo emi ẹdide mme asan̄autom unamutom ẹsin̄wam mbiowo ke nsio nsio n̄kpọ, ndien nte ini akade, ẹkeme ndimek mmọ mbiowo n̄ko.
Otu Emi Ẹsede Ẹban̄a Utom Mme Ntiense Jehovah ẹsimek ndusụk mbiowo nte mme esenyịn circuit. Mme esenyịn emi ẹsisan̄a ke esop kiet kiet ẹteme ikọt Abasi se ẹkpenamde, ẹsọn̄ọ mmọ idem, ẹnyụn̄ ẹda Bible ẹse m̀mê enyene irenowo emi ẹdotde se imek mbiowo ye mme asan̄autom unamutom.—1 Timothy 3:1-10, 12; Titus 1:5-9.
3. Nso idi utom kpukpru Ntiense Jehovah?
Utom Ntiense Jehovah kiet kiet edi “[nditoro] enyịn̄ Jehovah.” Mmọ ẹsitoro Jehovah ke ini mmọ ẹdụkde ikọ Abasi mmọ, ẹbuanade ke se ẹnamde do, ẹnyụn̄ ẹsịnde idem ẹkwọrọ ikọ nte ẹkekeme.—Kot Psalm 148:12, 13.
SỊN IDEM KPEP
Se utọ adausụn̄ emi Jesus edide, se nte mbiowo ẹkpebede enye, ye nte ikpokopde uyo inọ Jesus inyụn̄ inamde se mbiowo ẹdọhọde.
4. Jesus edi adausụn̄ emi ọfọnde ido
Enyene se Jesus ọdọhọde nnyịn inam, emi edifọnde ye nnyịn. Kot Matthew 11:28-30, ekem ẹbọrọ mbụme emi ẹnyụn̄ ẹneme ẹban̄a enye:
-
Nso utọ adausụn̄ ke Jesus edi, ndien enye oyom ukara esie etie nnyịn didie?
Didie ke mbiowo ẹsikpebe Jesus? Se VIDIO emi.
Bible etịn̄ nte mbiowo ẹkpenamde utom mmọ.
Kot Isaiah 32:2 ye 1 Peter 5:1-3, ekem ẹbọrọ mbụme emi ẹnyụn̄ ẹneme ẹban̄a mmọ:
-
Esitie fi didie ama eti ke mbiowo ẹsidomo ndifọn ido ukem nte Jesus?
-
Nso en̄wen ke mbiowo ẹsinam emi owụtde ke mmọ ke ẹdomo ndikpebe Jesus?
5. Mbiowo ẹsinam se mmọ ẹdọhọde mbon en̄wen ẹnam
Jesus oyom mbiowo ẹda utom mmọ didie? Se VIDIO emi.
Jesus ama etịn̄ nte mbon oro ẹdade usụn̄ ke esop ẹkpenamde n̄kpọ. Kot Matthew 23:8-12, ekem ẹbọrọ mbụme emi ẹnyụn̄ ẹneme ẹban̄a enye:
-
Nso ke Bible ọdọhọ mbiowo, edi nso ke ikpọ owo ufọkabasi ẹsinam?
-
Mbiowo ẹsinam se idinamde mmọ ye ubon mmọ ẹnen̄ede ẹkpere Abasi
-
Mbiowo ẹma kpukpru owo ke esop
-
Mbiowo ẹsitiene ẹsịn idem ẹkwọrọ ikọ
-
Mbiowo ẹsikpep ikọt Abasi Ikọ Abasi, ẹsitiene ẹnam itie ikọt Abasi ẹsisopde idem asan̄a, ye mme n̄kpọ ntre.
6. Ọfọn inam se mbiowo ẹdọhọde
Bible etịn̄ ntak emi ọfọnde inam se mbiowo ẹdọhọde. Kot Mme Hebrew 13:17, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ese didie se Bible ọdọhọde oro, ndi ọfọn ikop uyo inọ mbon oro ẹdade usụn̄ inyụn̄ isụk ibuot inọ mmọ? Nso inam ọdọhọ ntre?
Kot Luke 16:10, ekem ẹbọrọ mbụme emi ẹnyụn̄ ẹneme ẹban̄a enye:
-
Ntak emi ọfọnde inam se mbiowo ẹdọhọde idem ke n̄kpri n̄kpri n̄kpọ?
NDUSỤK OWO ẸSIDỌHỌ ẸTE: “Abasi idọhọke ke ana owo enyene ufọkabasi emi enye esikade.”
-
Ekere ke nso inam ọfọn yak owo adiana kiet ye ata ikọt Abasi okpono Abasi?
SE IKPEPDE
Jesus ada ata ikọt Abasi usụn̄. Esinem nnyịn ndinam se mbiowo ẹdọhọde sia se Jesus oyomde edi oro. Mbiowo ẹsifọn ido; mmọ ẹsitiene ẹnam se mmọ ẹdọhọde mme owo ẹnam.
Se M̀mê Emeti
-
Anie edi ibuot esop ata mme Christian?
-
Didie ke mbiowo ẹsin̄wam mme owo ke esop?
-
Nso idi utom kpukpru Ntiense Jehovah?
KPEP N̄KPỌ EN̄WEN
Se se iwụtde ke mbiowo ye Otu Emi Ẹsede Ẹban̄a Utom Mme Ntiense Jehovah ẹkere ẹban̄a ikọt Jehovah.
Se se mme esenyịn circuit ẹsinamde.
Nte N̄kpọ Esitiede ye Esenyịn Circuit ke Obio In̄wan̄ (4:51)
Kot n̄kpọ ban̄a se iban ẹsinamde ke esop ikọt Abasi.
“Ndi Iban Mme Ntiense Jehovah Ẹsikwọrọ Ikọ?” (Enyọn̄-Ukpeme, September 1, 2012)
Se se mbiowo ẹsinamde man ẹsọn̄ọ ikọt Jehovah idem.
“Mbiowo Ẹdi ‘Nsan̄autom Emi Ẹnamde Nnyịn Inyene Idatesịt’” (Enyọn̄-Ukpeme, January 15, 2013)
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
