Ibuot 30

Ẹka Iso “Ẹsan̄a ke Ima”

1-3. Nso idi utịp ke ini nnyịn ikpebede uwụtn̄kpọ Jehovah ke ndiwụt ima?

 “EKESE inemesịt odu ke ndinọnọ akan ke ndibọbọ.” (Utom 20:35, NW) Ikọ Jesus emi ọsọn̄ọ ata akpanikọ emi: Ima unana ibụk asan̄a ye utịp. Okposụkedi ekese inemesịt odude ke ndibọbọ ima, n̄kponn̄kan inemesịt akam odu ke ndinọnọ, m̀mê ke ndiwowụt, mbon efen ima.

² Idụhe owo oro ọfiọkde emi ọfọn akan nte Ete nnyịn eke heaven ọfiọkde. Nte nnyịn ikokụtde ke mme ibuot oro ẹkebemde iso ke ikpehe emi, Jehovah edi akakan uwụtn̄kpọ ima. Idụhe owo emi owụtde ima ke usụn̄ oro okponde akan eke esie m̀mê ke udomo ini oro ebịghide akan eke esie. Do, nte edi n̄kpọ n̄kpaidem nte ke ẹkot Jehovah, “Abasi inemesịt?”—1 Timothy 1:11, NW.

³ Ima ima Abasi nnyịn oyom nnyịn idomo ndibiet enye, akpan akpan ke se iban̄ade ediwụt ima. Ephesus 5:1, 2 ọdọhọ nnyịn ete: “Ẹdi mme andikpebe Abasi, nte ndima nditọ; ẹnyụn̄ ẹsan̄a ke ima.” Ke ini nnyịn ikpebede uwụtn̄kpọ Jehovah ke ndiwụt ima, nnyịn iyenyene akamba inemesịt oro otode ndinọnọ. Nnyịn n̄ko iyokop uyụhọ ndifiọk nte ke nnyịn ke inem Jehovah esịt, koro Ikọ esie esịn udọn̄ ọnọ nnyịn “ndima kiet eken.” (Rome 13:8) Edi mme ntak efen ẹdu oro akpanamde nnyịn ‘ika iso ndisan̄a ke ima.’

Ntak Emi Ima Edide Akpan N̄kpọ

4, 5. Ntak edide akpan n̄kpọ nnyịn ndinyene ima n̄waidem nnọ ekemmọ mme andinịm ke akpanikọ?

⁴ Ntak edide akpan n̄kpọ nnyịn ndinyene ima nnọ ekemmọ mme andinịm ke akpanikọ? Ke nditịn̄ ke mmemmem usụn̄, ima edi edu ata Ido Ukpono Christ. Nnyịn ikemeke ndinyene n̄kpet n̄kpet itie ebuana ye ekemmọ mme Christian ke ima mîdụhe, ndien ke akande oro, nnyịn ikpọwọrọke n̄kpọ ndomokiet  ke enyịn Jehovah. Kere nte Ikọ Abasi osiode akpanikọ emi owụt.

⁵ Ke akpatre okoneyo oro enye okodude uwem ke isọn̄, Jesus ama ọdọhọ mme anditiene enye ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:34, 35) “Kpa nte n̄kamade mbufo”—ih, ẹdọhọ nnyịn iwụt utọ ima oro Jesus okowụtde. Ke Ibuot 29, nnyịn ima ikụt nte Jesus ekenịmde n̄wọrọnda uwụtn̄kpọ ke ndiwụt ima n̄waidem, ekerede aban̄a udọn̄ ye ufọn mbon efen akan eke idemesie. Nnyịn n̄ko inyene ndiwụt ima unana ibụk, ndien nnyịn inyene ndiwụt enye in̄wan̄-in̄wan̄ man mbon oro mîkam idụhe ke esop Christian ẹkpekụt ima oro nnyịn inyenede. Ke akpanikọ, ẹda ima n̄waidem itie nditọete ẹdiọn̄ọ nnyịn nte ata mme anditiene Christ.

6, 7. (a) Nnyịn isan̄a didie ifiọk ke Ikọ Jehovah ada ediwụt ima ke akamba n̄kpọ? (b) Mme ikọ Paul oro ẹwetde ke 1 Corinth 13:4-8 ẹwụk ntịn̄enyịn ke ikpehe ima ewe?

⁶ Nso edieke nnyịn mînyeneke ima? Apostle Paul ọkọdọhọ ete: “[Edieke mmenyeneke] ima, mmakabade nyomo uyom nte akpan̄kpan̄, nnyụn̄ nsioro uyo nte ekpri n̄kanika.” (1 Corinth 13:1) Uyom akpan̄kpan̄ esidadiari. Nso kaban̄a uyo ekpri n̄kanika? Mme edikabade efen ẹdọhọ “ekpri n̄kon̄” m̀mê “akamba n̄kon̄.” Nso uwụtn̄kpọ oro odotde ke emi edi ntem! Owo oro mînyeneke ima etie nte n̄kpọ ubre ikwọ emi anamde ọkpọsọn̄ uyom oro etiede inan inan onyụn̄ ebịnde-bịn mme owo utu ke ndinenem owo. Didie ke utọ owo oro ekpekeme ndinyene n̄kpet n̄kpet itie ebuana ye mbon en̄wen? Paul ama ọdọhọ n̄ko ete: “N̄kponyụn̄ nnyene ọyọhọ mbuọtidem, tutu n̄keme ndimen ikpọ obot ke itie nduọk, ndien nnyeneke ima, ndịghe baba n̄kpọ kiet.” (1 Corinth 13:2) Kam kere, owo oro mînyeneke ima “[idịghe] baba n̄kpọ kiet,” inamke n̄kpọ m̀mê nso utom ke enye anam! Nte in̄wan̄ake ndien do ntak emi Ikọ Jehovah ọsọn̄ọde etịn̄ nte edide akpan n̄kpọ ndinyene ima?

⁷ Didie ndien ke nnyịn ikeme ndiwụt edu emi ke edinam  nnyịn ye mbon en̄wen? Man inyene ibọrọ, ẹyak nnyịn idụn̄ọde mme ikọ Paul emi ẹdude ke 1 Corinth 13:4-8. Se ẹsọn̄ọde ẹtịn̄ ẹban̄a ke mme ufan̄ikọ emi idịghe ima oro Abasi enyenede ọnọ nnyịn m̀mê ima oro nnyịn inyenede inọ Abasi. Utu ke oro, Paul ọsọn̄ọ etịn̄ nte nnyịn ikpowụtde kiet eken ima. Enye etịn̄ ndusụk n̄kpọ oro ima edide ye ndusụk n̄kpọ oro enye mîdịghe.

Se Ima Edide

8. Didie ke anyanime ekeme ndin̄wam nnyịn ke mme edinam nnyịn ye mbon en̄wen?

⁸ “Ima enyenyene anyan ime.” Ndinyene anyanime ọwọrọ ndiyọ mbon en̄wen. (Colossae 3:13) Nte nnyịn iyomke utọ ime oro? Sia nnyịn idide mme anana-mfọnmma edibotn̄kpọ oro inamde utom ọtọkiet, owụt ifiọk ndidori enyịn nte ke ini ke ini, nditọete Christian nnyịn ẹkeme ndiyat nnyịn esịt, nnyịn n̄ko imekeme ndiyat mmọ esịt. Edi ime ekeme ndin̄wam  nnyịn ndiyọ n̄kpri ndutan̄uyo ye utọk oro ẹdemerede ke mme edinam nnyịn ye mbon en̄wen—ye unana edibiat emem esop.

9. Ke mme usụn̄ ewe ke nnyịn ikeme ndiwụt mbon en̄wen mfọnido?

⁹ “Ima . . . ọfọn ido.” Ẹwụt mfọnido ke ndinọ owo un̄wam ye ke nditịn̄ mme ikọ oro ẹwụtde edikere mban̄a. Ima onụk nnyịn ndiyom mme usụn̄ ndiwụt mfọnido, akpan akpan ye mbon oro ẹnen̄erede ẹyom enye. Ke uwụtn̄kpọ, ekemmọ andinịm ke akpanikọ oro ọsọn̄de ekeme ndikop ndobo onyụn̄ oyom ẹkese enye man ẹnọ nsịnudọn̄. Eka oro ọbọkde nditọ ikpọn̄ m̀mê eyenete an̄wan oro otode ubon oro abaharede ke n̄kan̄ ido ukpono ekeme ndiyom ndusụk un̄wam. Owo oro ọdọn̄ọde m̀mê oro osobode ndusụk afanikọn̄ ekeme ndiyom ndikop ikọ mfọnido nto ufan akpanikọ. (Mme N̄ke 12:25; 17:17) Ke ini nnyịn ibemde iso inam n̄kpọ ndiwụt mfọnido ke mme utọ usụn̄ emi, nnyịn iwụt nte ke ima nnyịn edi ima akpanikọ.—2 Corinth 8:8.

10. Didie ke ima an̄wam nnyịn ndisọn̄ọ mmụm akpanikọ n̄kama nnyụn̄ ntịn̄ akpanikọ, idem ke ini mîmemke ndinam ntre?

¹⁰ “Ima . . . adadara se idide akpanikọ.” Edikabade efen ọdọhọ: “Ima . . . adadara ndida nnọ akpanikọ.” Ima an̄wam nnyịn ndisọn̄ọ mmụm akpanikọ n̄kama, nnyụn̄ “[ntịn̄] akpanikọ ye kiet eken.” (Zechariah 8:16) Ke uwụtn̄kpọ, edieke owo oro nnyịn imade anamde akwa idiọkn̄kpọ, ima oro inyenede inọ Jehovah—ye anamidiọk oro—ayan̄wam nnyịn ndisọn̄ọ mmụm mme idaha Abasi n̄kama utu ke ndidomo ndifụk, mme ndidomo ndiwụt ke idiọk oro enen m̀mê ndikam nsu nsu mban̄a idiọk edinam oro. Edi akpanikọ, ekeme ndisọn̄ ndinyịme se iketịbede. Edi ke itịmde iyom ufọn owo ima nnyịn, nnyịn iyoyom enye ọbọ onyụn̄ enyịme ima ima ntụnọ Abasi. (Mme N̄ke 3:11, 12) Nte mme Christian oro ẹnyenede ima, nnyịn n̄ko iyom “ndidu uwem akpanikọ ke kpukpru n̄kpọ.”—Mme Hebrew 13:18, NW.

11. Sia ima ‘emede kpukpru n̄kpọ,’ nso ke nnyịn ikpodomo ndinam mban̄a mme ndudue ekemmọ mme andinịm ke akpanikọ?

¹¹ “Ima ememe kpukpru n̄kpọ.” Ikọ oro enen̄ede ọwọrọ  “ofofụk kpukpru n̄kpọ.” (Kingdom Interlinear) Akpa N̄wed Peter 4:8 ọdọhọ ete: “Koro ima ofụkde ekese idiọk-n̄kpọ.” Ih, Christian oro adade ima odu uwem idiyomke ndiyarade kpukpru unana mfọnmma ye ndudue eyenete Christian esie. Ke ediwak idaha, mme ndudue oro ekemmọ mme andinịm ke akpanikọ ẹnamde isikponke, onyụn̄ edi se ẹkemede ndida ima mfụk.—Mme N̄ke 10:12; 17:9.

12. Didie ke apostle Paul okowụt ke imọ imenịm ke Philemon ayanam se inende, ndien nso ke nnyịn ikeme ndikpep nto uwụtn̄kpọ Paul?

¹² “Ima . . . enenịm se ifọnde ke akpanikọ kpukpru ini.” Nnyịn iyịkke ekemmọ mme andinịm ke akpanikọ nte mîdotke, inyeneke eyịghe iban̄a kpukpru uduak mmọ. Ima an̄wam nnyịn ‘ndinịm se ifọnde’ mban̄a nditọete nnyịn nnyụn̄ nnyene mbuọtidem ke mmọ. a Tịm fiọk uwụtn̄kpọ kiet emi odude ke leta oro Paul ọkọnọde ẹsọk Philemon. Paul ekewet ndisịn udọn̄ nnọ Philemon ndida mfọnido ndara ofụn esie oro ekefehede, Onesimus, emi akakabarede edi Christian. Utu ke ndidomo ndinyenyịk Philemon, Paul akada ima ekpe enye ubọk. Enye ama owụt mbuọtidem oro enye ekenyenede nte ke Philemon ayanam se inende, ọdọhọde ete: “Sia mbụrede mfiọk nte afo ayanam nte uyo mi edide, n̄wet nnọ fi; koro mmọfiọk nte afo ayanam ebe se ndọhọde.” (Ufan̄ikọ 21) Ke ini ima onụkde nnyịn ndinyene utọ mbuọtidem emi ke idem nditọete nnyịn, nnyịn iyanam mmọ ẹkọri nti edu.

13. Didie ke nnyịn ikeme ndiwụt nte ke nnyịn imodori enyịn ke nditọete nnyịn ẹyenam se ifọnde?

¹³ “Ima . . . ododori enyịn aban̄a kpukpru n̄kpọ.” Kpa nte ima akam enịmde n̄kpọ ke akpanikọ, ntre n̄ko ke enye enyene idotenyịn. Ke ntak ima, nnyịn imodori enyịn nditọete nnyịn ndinam se ifọnde. Ke uwụtn̄kpọ, edieke eyenete anamde “ndudue,” nnyịn imodori enyịn ke enye ayanam n̄kpọ aban̄a ima ima ukeme oro ẹsịnde ndinen̄ede enye. (Galatia  6:1) Nnyịn n̄ko imodori enyịn nte ke mbon oro ẹmemde ke mbuọtidem ẹyefiak ẹkop nsọn̄idem. Nnyịn iyeme ime ye utọ mbon oro, inamde se ikemede ndin̄wam mmọ ẹsọn̄ idem ke mbuọtidem. (Rome 15:1; 1 Thessalonica 5:14) Idem edieke owo ima nnyịn ọwọrọde ọkpọn̄ usụn̄, nnyịn ididuọkke idotenyịn nte ke usen kiet enye ayafiak ebịne Jehovah, nte idiọk udọ oro ke n̄ke Jesus.—Luke 15:17, 18.

14. Ke mme usụn̄ ewe ke ẹkeme ndidomo ukeme ediyọ nnyịn ke esịt esop, ndien didie ke ima edin̄wam nnyịn ndinam n̄kpọ?

¹⁴ “Ima . . ọyọyọ kpukpru n̄kpọ.” (NW) Ndiyọ n̄kpọ an̄wam nnyịn ndisọn̄ọ nda ke ini isobode edikpu m̀mê nsọn̄ọn̄kpọ. Mme idomo oro ẹyomde ẹyọ isitoho an̄wa kpọt. Ndusụk ini, nnyịn imekeme ndisobo idomo ke esịt esop. Ke ntak unana mfọnmma, nditọete nnyịn ẹkeme ndikpu nnyịn ndusụk ini. Ikọ n̄ken̄inua ekeme ndiyat nnyịn esịt. (Mme N̄ke 12:18) Ekeme ndidi odu n̄kpọ oro owo mînamke ke esop nte nnyịn ikerede ke akpana ẹnam. Edu eyenete oro ẹkponode ekeme ndidiọk nnyịn esịt, anamde nnyịn ikere, ‘Christian akpasan̄a didie anam n̄kpọ ntre?’ Ke ini nnyịn isobode mme utọ idaha oro, nte nnyịn iyọwọrọ ikpọn̄ esop inyụn̄ itre ndinam n̄kpọ Jehovah? Nnyịn idinamke oro edieke nnyịn inyenede ima! Ih, ima idiyakke mme ndudue eyenete ẹkịm nnyịn enyịn tutu nnyịn ikemeke aba ndikụt eti n̄kpọ ekededi ke idem esie m̀mê ke ofụri esop. Ima ayanam nnyịn isọn̄ọ inam akpanikọ inọ Abasi inyụn̄ inọ esop ibetedem inamke n̄kpọ m̀mê nso ke anana-mfọnmma owo efen etịn̄ m̀mê anam.—Psalm 119:165.

Se Ima Mîdịghe

15. Nso idi ufụp, ndien didie ke ima an̄wam nnyịn ndifep idiọk edu emi?

¹⁵ “Ima ifịbeke ufụp.” Ufụp ekeme ndinam nnyịn itọn̄ọ ndisịn enyịn ke n̄kpọ mbon efen—inyene mmọ, mme ifetutom mmọ, m̀mê mme ukeme mmọ. Utọ ufụp oro edi ibụk ibụk, idiọk edu oro edide edieke owo mîkpemeke, ekeme ndibiat emem ke esịt esop. Nso idin̄wam nnyịn ndikan “ufụp”? (James 4:5) Ke nditịn̄ ibio ibio, ima. Ọsọn̄urua edu emi  ekeme ndin̄wam nnyịn ndidara ye mbon oro ẹtiede nte ke ẹbọ ndusụk ufọn ke uwem oro nnyịn mîbọhọ. (Rome 12:15) Ima idiyakke nnyịn ida nte ke ẹsesuene nnyịn ke ini owo ọbọde itoro ke san̄asan̄a ukeme oro enye enyenede m̀mê ke ntak n̄wọrọnda n̄kpọ oro enye anamde.

16. Edieke nnyịn imade nditọete nnyịn ke akpanikọ, ntak emi nnyịn mîdinamke inua iban̄a se nnyịn inamde ke utom Jehovah?

¹⁶ “Ima inamke inua, ikohokede idem.” Ima idiyakke nnyịn itan̄ idem ke ntak mme ukeme nnyịn m̀mê se inamde. Edieke imade nditọete nnyịn ke akpanikọ, nnyịn ikpasan̄a didie inam inua kpukpru ini iban̄a unen oro nnyịn ikụtde ke utom ukwọrọikọ nnyịn m̀mê mme ifetutom oro nnyịn ikamade ke esop? Utọ mbụre oro ekeme ndinam idem emem mbon efen, anamde mmọ ẹtie nte mme usụhọde owo ke ẹmende ẹdomo ye nnyịn. Ima iyakke nnyịn inam inua iban̄a se Abasi ayakde nnyịn inam ke utom esie. (1 Corinth 3:5-9) Kamse, ima “ikohokede idem,” m̀mê nte The New Testament in Modern English ọdọhọde, ima “imaha n̄kokon̄ ekikere oro owụtde ke imọ idi akpan n̄kpọ.” Ima iyakke nnyịn ikere ke idi n̄kpọ ikan nte ikpekerede.—Rome 12:3.

17. Nso edikere mban̄a ke ima esinụk nnyịn ndiwụt mbon en̄wen, ndien ke ntem, nso utọ edu ke nnyịn idifep?

¹⁷ “Ima . . . inamke ido eke mîdotke.” Owo emi anamde ido eke mîdotke esinam n̄kpọ ke ukwan̄ usụn̄ m̀mê ke usụn̄ oro ayatde owo esịt. Utọ uwem oro edi unana ima, koro enye owụtde ata idiọk unana edikere mban̄a ntụk ye mfọnọn̄kpọ mbon en̄wen. Ke edide isio, ima asan̄a ye mfọnido oro onụkde nnyịn ndiwụt mbon en̄wen edikere mban̄a. Ima anam owo enyene nti edu, edu Abasi, onyụn̄ owụt ukpono ọnọ ekemmọ mme andinịm ke akpanikọ. Ntem, ima idiyakke nnyịn ika iso ndinam ‘ndek-ndek ido’—oro edi, edu ekededi oro edinamde mbọribọ omụm nditọete Christian nnyịn m̀mê ndiyat mmọ esịt.—Ephesus 5:3, 4.

18. Ntak emi owo oro enyenede ima mîdiyịreke ite ẹnam kpukpru n̄kpọ ẹsịn ke usụn̄ imọ?

¹⁸ “Ima . . . iyomke ufọn esiemmọ.” Revised Standard Version  ọdọhọ mi ete: “Ima isọn̄ọke iyịre ke usụn̄ esie.” Owo oro enyenede ima isiyomke ẹnam kpukpru n̄kpọ ẹsịn ke usụn̄ imọ, nte n̄kpọ eke ekikere esie esidide nnennen kpukpru ini. Enye isidaha n̄kari inam n̄kpọ ye mbon efen, idaha mbukpek esie inam n̄kpọ man akan mbon oro ẹnyenede isio isio ekikere. Utọ itụn oro ayarade iseri owo oro, ndien Bible ọdọhọ ete: “Iseri ebem nsobo iso.” (Mme N̄ke 16:18) Edieke nnyịn inen̄erede ima nditọete nnyịn, nnyịn iyowụt ukpono inọ mme ekikere mmọ, ndien ke ebiet ikemede, inyịme ndinam n̄kpọ ke usụn̄ mmọ. Edu edinyịme nnọ odu ke n̄kemuyo ye mme ikọ Paul emi: “Owo okûyom ufọn esie, edi oyom ufọn owo en̄wen.”—1 Corinth 10:24.

19. Didie ke ima esin̄wam nnyịn ndinam n̄kpọ ke ini mbon en̄wen ẹduede nnyịn?

¹⁹ “Ima . . . isọpke iyatesịt, ikamake udu.” Ima isisọpke ndiyat esịt mban̄a se mbon efen ẹtịn̄de m̀mê ẹnamde. Edi akpanikọ, edi ndammana n̄kpọ ndiyat esịt ke ini mbon efen ẹduede nnyịn. Edi idem edieke nnyịn iyatde esịt ye eti ntak, ima idiyakke nnyịn imụm iyatesịt oro ikama ke esịt. (Ephesus 4:26, 27) Nnyịn idimụmke ndiọi ikọ m̀mê ndiọi edinam inịm, nte n̄kpọ eke iwetde mmọ idọn̄ ke n̄wed isọn man ikûfre. Utu ke oro, ima oyonụk nnyịn ndikpebe ima ima Abasi nnyịn. Nte nnyịn ikokụtde ke Ibuot 26, Jehovah esifen ke ini eti ntak odude ndifen. Ke ini enye efende ọnọ nnyịn, enye esifre, oro edi, enye ididaha mme idiọkn̄kpọ oro ibiom nnyịn ikpe ke ini iso. Nte nnyịn ikopke inemesịt nte ke Jehovah ikamake udu?

20. Didie ke nnyịn ikpanam n̄kpọ ke ini ekemmọ andinịm ke akpanikọ odụkde afia idiọkn̄kpọ onyụn̄ ọbọde ufen ke ntak oro?

²⁰ “Ima idarake se ikwan̄ade.” The New English Bible ọdọhọ mi ete: “Ima . . . idarake idiọkn̄kpọ mbon efen.” Edikabade Moffatt ọdọhọ ete: “Ima inemke esịt ke ini mbon efen ẹnamde se mîfọnke.” Ima idarake se ikwan̄ade, ntre nnyịn ididaha oburobụt ido ekededi ke ekpri n̄kpọ. Didie ke nnyịn isinam n̄kpọ ke ini ekemmọ andinịm ke akpanikọ odụkde afia idiọkn̄kpọ onyụn̄ ọbọde ufen ke ntak oro? Ima idiyakke nnyịn idara, nte n̄kpọ eke idọhọde, ‘Iya ndọ!’ (Mme N̄ke 17:5) Nte  ededi, nnyịn imesikop inemesịt ke ini eyenete oro akanamde idiọk anamde n̄kpọ ndifiak ndaha nda ke iduọ eke spirit esie.

“Usụn̄ eke Akande Mmọ Eken Kpukpru”

21-23. (a) Nso ke ikọ Paul oro “ima idibehe ifep [ke] nsinsi” ọwọrọ? (b) Nso ke ẹdineme ke akpatre ibuot n̄wed emi?

²¹ “Ima idibehe ifep [ke] nsinsi.” Nso ke mme ikọ Paul emi ẹwọrọ? Nte udọn̄ikọ emi owụtde, enye ekeneme aban̄a mme enọ eke spirit oro akpa mme Christian ẹkenyenede. Mme enọ oro ẹkedi idiọn̄ọ nte ke Abasi ama enyịme esop oro ẹketọn̄ọde obufa do. Edi idịghe kpukpru mme Christian ẹkekeme ndikọk udọn̄ọ, nditịn̄ ntịn̄nnịm ikọ, m̀mê ndisem mme usem. Nte ededi, oro ikanamke n̄kpọ; mme utịbe utịbe enọ emi ẹkenyene ndibe mfep nte ini akakade. Edi, n̄kpọ efen ama osụhọ, n̄kpọ oro kpukpru mme Christian ẹkekemede  ndikọri. Enye ekenen̄ede edi n̄wọrọnda, enen̄ede ebịghi akan mme utịbe utịbe enọ ekededi. Ke akpanikọ, Paul okokot enye “usụn̄ eke akande mmọ eken kpukpru.” (1 Corinth 12:31) Nso ikedi “usụn̄ eke akande mmọ eken kpukpru” mi? Enye ekedi usụn̄ ima.

²² Ke akpanikọ, ima Christian oro Paul eketịn̄de aban̄a ‘idibehe ifep ke nsinsi,’ enye iditreke tutu amama. Tutu esịm emi, ima n̄waidem itie nditọete ke ẹda ẹdiọn̄ọ ata mme anditiene Jesus. Nte nnyịn ikwe uyarade utọ ima oro ke esop mme andituak ibuot nnọ Jehovah ke ofụri isọn̄? Ima oro eyebịghi ke nsinsi, sia Jehovah ọn̄wọn̄ọde nsinsi uwem ọnọ mme anam-akpanikọ asan̄autom esie. (Psalm 37:9-11, 29) Nnyịn ikpakam ika iso isịn ofụri ukeme ‘ndisan̄a ke ima.’ Ke inamde ntre, nnyịn imekeme ndinyene akamba inemesịt oro otode edinọnọ. Ke akande oro, nnyịn iyaka iso idu uwem—ih, ika iso ima ima—ke nsinsi nsinsi, kpa nte ima ima Abasi nnyịn, Jehovah.

²³ Ke ibuot emi adade ikpehe oro aban̄ade ima mi edisịm utịt, nnyịn imeneme nte nnyịn ikemede ndiwụt kiet eken ima. Edi ke ikerede iban̄a ediwak usụn̄ oro nnyịn ibọde ufọn ito ima Jehovah—ọkọrọ ye ufọn oro ibọde ito odudu, unenikpe, ye ọniọn̄ esie—ọkpọfọn nnyịn ndibụp nte, ‘Didie ke n̄keme ndiwụt Jehovah nte ke mmenen̄ede mma enye?’ Ẹyeneme mbụme emi ke akpatre ibuot n̄wed emi.

[Ikọ idakisọn̄]

Mme Mbụme Nditie N̄kere

2 Corinth 6:11-13 Nso ke ọwọrọ ndima ima ke ‘in̄wan̄-in̄wan̄ esịt,’ ndien didie ke nnyịn ikeme ndida item emi nsịn ke edinam?

1 Peter 1:22 Didie ke mme ikọ emi ẹwụt ke ima oro inyenede inọ ekemmọ mme andinịm ke akpanikọ ekpenyene ndito esịt, ndidi eke akpanikọ, nnyụn̄ nsịne ufiop?

1 John 3:16-18 Didie ke nnyịn ikeme ndiwụt nte ke “ima Abasi” odụn̄ nnyịn ke esịt?

1 John 4:7-11 Nso n̄kpọ inen̄ede inụk nnyịn ndima ekemmọ mme andinịm ke akpanikọ?

[Mme Mbụme Ukpepn̄kpọ]

[Ndise ke page 302]

Ima onụk nnyịn ndinyene mbuọtidem ke idem nditọete nnyịn

[Ndise ke page 308]

Se ẹdade ẹdiọn̄ọ ikọt Jehovah edi ima oro mmọ ẹnyenede ẹnọ kiet eken