Ibuot 39

N̄kpanam Didie Nsịm Mme Utịtmbuba Mi?

Ewe ke otu emi ke akpama ndinyene?

□ Ndinen̄ede nnyene uko

□ Ndinyene mbufa ufan

□ Ndinen̄ede n̄kop inemesịt

KE AKPANIKỌ, emekeme ndinyene mbita emi! Didie ke ekeme ndinam oro? Ke ndinịm nnyụn̄ nsịm mme utịtmbuba fo. Kere ban̄a se itienede mi:

Ndinen̄ede nnyene uko. Edieke enịmde n̄kpri utịtmbuba onyụn̄ esịmde mmọ, eyenen̄ede enyene uko ndinịm ikpọ utịtmbuba. Ndien eyenen̄ede enyene uko ke ini osobode mme mfịna eke usen ke usen​—⁠utọ nte ke ini mme uke fo ẹyomde etiene anam se mmimọ inamde.

Ndinyene mbufa ufan. Mme owo ẹsima ndidian idem ye mbon oro ẹnịmde nti utịtmbuba​—⁠mbon oro ẹfiọkde se mmọ ẹyomde ẹnyụn̄ ẹnyịmede ndinam n̄kpọ man ẹnyene se mmọ ẹyomde.

Ndinen̄ede n̄kop inemesịt. Ndiwawan̄ ubọk ntie n̄kere ke eyesịm utịtmbuba fo idinyeneke ufọn ndomokiet inọ fi. Edi ke ini enịmde mme utịtmbuba onyụn̄ esịmde mmọ, esịt eyenen̄ede enem fi. Ndi emeben̄e idem nditọn̄ọ? Mme page oro ẹtienede mi ẹyen̄wam fi! a

 ✔ 1 DOMO NDIFIỌK MME UTỊTMBUBA FO

1. Wet mme utịtmbuba oro ekpenịmde ọnọ idemfo. Wet utịtmbuba ekededi oro amade! Kûnen̄ede utie ukere kan̄a; wet adan̄a nte ekekeme. Se m̀mê emekeme ndiwet utịtmbuba 10 ke nsụhọde n̄kaha.

2. Fiak se se ekewetde. Ewe ke ama akan? Ewe ke ekere ke enye edisọn̄ akan? Ewe ke edinen̄ede okop inemesịt ke ini esịmde? Ti ke esimem utom ndisịm mme utịtmbuba oro afo enen̄erede ama.

3. Wet tiene nte edide akpan n̄kpọ. Wet nọmba kpere mme utịtmbuba fo etiene nte adade mmọ ke akpan n̄kpọ.

 ✔ 2 NTE EDINAMDE

Ke utịtmbuba kiet kiet oro afo emekde, nam se itienede mi:

Wet utịtmbuba fo.

 Nyekpep Usem Idiọn̄ọ Mbon America

Nịm ini oro anade esịm utịtmbuba fo. Ndinyene utịtmbuba oro owo mînịmke ini oro anade ẹsịm etie nte ndidaba ndap!

July 1

Diomi mme n̄kpọ oro edinamde.

Mme n̄kpọ oro n̄kpanamde

1. Nyedep n̄wed usem idiọn̄ọ.

2. Nyekpep mbufa ikọ duop ke urua kiet kiet.

3. Nyese nte mbon en̄wen ẹsemde usem emi.

4. Nyọdọhọ owo ese nte nsemde usem emi onyụn̄ enen̄ede mi.

Kere ban̄a mme n̄kpọ oro ẹkemede ndibiọn̄ọ fi. Ekem kere nte edikande mmọ.

Mme n̄kpọ oro ẹkemede ndibiọn̄ọ mi

Owo oro esemde usem idiọn̄ọ idụhe ikpere

Nen̄ede biere ndisịm utịtmbuba fo. Nen̄ede biere ke ayanam ofụri ukeme fo man esịm utịtmbuba emi. Sịn ubọk ke n̄wed oro nyụn̄ wet usenọfiọn̄.

Nte n̄kpakande mme n̄kpọ emi

Nyaka ikpehe Intanet www.isa4310.com n̄kosion̄o mme n̄kpọ oro ẹdọn̄de ke Usem Idiọn̄ọ Mbon America.

․․․․․ ․․․․․

Ebiet emi ndisịnde ubọk Usenọfiọn̄

 ✔ 3 NAM SE EKEWETDE!

Tọn̄ọ idahaemi. Bụp idemfo, ‘Nso ke n̄kpọtọn̄ọ nnam mfịn man nsịm utịtmbuba mi?’ Ekeme ndidi ukûwetke kpukpru se edinamde man esịm utịtmbuba fo, edi kûyak oro akpan fi nditọn̄ọ. Bible ọdọhọ ke “owo eke esede ofụm idisuanke n̄kpasịp; owo eke onyụn̄ esede ikpaenyọn̄ idikpen̄eke ukpen̄e.” (Ecclesiastes 11:​4) Yom n̄kpọ nam mfịn​—idem ọkpọkọm edi esisịt.

Dụn̄ọde mme utịtmbuba fo ke usen ke usen. Fiak ti idemfo se inamde ada mmọ kiet kiet ke akpan n̄kpọ. Se adan̄a nte anamde n̄kọri ke ndisịn idiọn̄ọ emi ✔ (m̀mê usenọfiọn̄ emi anamde okụre) n̄kpere n̄kpọ kiet kiet oro anamde okụre.

Kere nte editiede fi ke idem. Kere nte editiede fi ke idem ke ini esịmde utịtmbuba fo. Kere nte edikopde inemesịt. Ekem, fiak kere n̄kpọ kiet kiet oro edinamde man esịm utịtmbuba emi. Ke akpatre, da enyịn ikike fo se nte anamde n̄kpọ emi kiet kiet man esịm utịtmbuba fo, ndien kere nte edikopde inemesịt ama esịm utịtmbuba fo. Ebet nso nan̄a? Ọkpọfọn ọtọn̄ọ idahaemi!

[Ikọ idakisọn̄]

AKPAN ITIE N̄WED ABASI

“N̄kọkibuot owo nsịnifịk itreke ndinyene ufọn.”​—Mme N̄ke 21:5.

ITEM

Kûkere ke ana anam kpukpru n̄kpọ oro ekewetde ketket. Nte anamde n̄kpọ kiet kiet man esịm utịtmbuba fo, nam ukpụhọde ke ebiet oro oyomde.

NDI AMA ỌFIỌK . . . ?

Adan̄a nte utịtmbuba fo okponde, ntre n̄ko ke edinen̄ede okop inemesịt ke ini esịmde utịtmbuba oro!

AFO EKERE DIDIE?

● Ndi owo ekeme ndinịm utịtmbuba awak akaha?​—Philippi 1:10.

● Ndi ndinịm utịtmbuba ọwọrọ ke ana ewewet kpukpru se edinamde ke usen ke usen?​—Philippi 4:5.

[Se ẹwetde ke ikpọ abisi ke page 283]

“Idem eyemem fi edieke mûnyeneke se anamde idahaemi mûnyụn̄ unyeneke se odoride enyịn aban̄a. Edi edieke enịmde mme utịtmbuba onyụn̄ esịmde mmọ, esịt eyenen̄ede enem fi.”​—Reed

[Ekebe/​Ndise ke page 283]

Nte Ekpewetde Mme Utịtmbuba Fo

Mme ufan Nyanam ufan ye owo emi mîdịghe uke mi. Nyafiak n̄kọtọn̄ọ ufan ye owo emi ekesidide ufan mi.

Nsọn̄idem Nyesisịn̄ede idem ke minit 90 ke nsụhọde n̄kaha ke urua. Nyeside idap hour itiaita kpukpru okoneyo.

Ufọkn̄wed Nyesịn idem n̄kpep ibat man mbe udomo. Nyọsọn̄ọ nda nnam se inende ke ini mme uke mi ẹyomde ntiene mmimọ nnam idiọk.

N̄kpọ eke spirit Nyesikot Bible minit 15 kpukpru usen. Nyetịn̄ se nnịmde ke akpanikọ nnọ eyen ufọkn̄wed nnyịn urua emi.

[Ndise ke page 284, 285]

Ndinịm utịtmbuba etie nte ndiwet mbuwet ufọk​—ana esịn ukeme man anam se ekewetde