Mme ufan ẹsineme nneme man ẹnen̄ede ẹkpere kiet eken. Kpasụk ntre, Abasi ọdọhọ isineme nneme ye imọ sia enye oyom idi ufan imọ. Enye ọdọhọ ete: “Mbufo ẹyekot mi ẹnyụn̄ ẹdi ẹdibọn̄ akam ẹnọ mi, ami nyonyụn̄ n̄kpan̄ utọn̄ nnọ mbufo.” (Jeremiah 29:12) Nte enemede nneme ye Abasi, afo ‘ayasan̄a ekpere enye, ndien enye ayasan̄a ekpere fi.’ (James 4:8) Bible ọdọhọ ete: “Jehovah emekpere kpukpru mbon oro ẹsemede ẹkot enye.” (Psalm 145:18) Nte ibọn̄de akam inọ Abasi, ntre ke idinen̄ede ikpere enye.

Jesus ọkọdọhọ ete: “Anie ke otu mbufo ọkpọnọ eyen esie itiat ke ini eben̄ede enye uyo? Mîdịghe, ọkpọnọ enye urụkikọt ke ini eben̄ede enye iyak? Ke ntre, edieke mbufo . . . ẹfiọkde ndinọ nditọ mbufo nti enọ, adan̄a didie akan oro ke Ete mbufo emi odude ke heaven edinọ mbon oro ẹben̄ede enye nti n̄kpọ!” (Matthew 7:9-11) Abasi ọdọhọ fi esibọn̄ akam sia ‘enye ekere aban̄a fi’ onyụn̄ oyom ndin̄wam fi. (1 Peter 5:7) Enye akam ọdọhọ etịn̄ mfịna fo ọnọ imọ. Kop se Bible ọdọhọde mi: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹben̄e Abasi se mbufo ẹyomde.”—Philippi 4:6.

Ntaifiọk emi ẹnen̄erede ẹdiọn̄ọ n̄kpọ ẹban̄a owo ẹdọhọ ke esidọn̄ ata ediwak owo ndibọn̄ akam. Idem mbon oro mînịmke ke Abasi odu ye mbon oro ẹdọhọde ke owo idiọn̄ọke m̀mê enye odu, ẹsibọn̄ akam. * Emi owụt ke nte ẹkebotde nnyịn esinam ọdọn̄ nnyịn ndiyom Abasi. Jesus ọkọdọhọ ete: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.” (Matthew 5:3) Usụn̄ kiet emi ikpowụtde ke imoyom Abasi edi ndisineme nneme ye enye.

Edieke isibọn̄de akam inọ Abasi nte enye ọdọhọde ibọn̄, nso ufọn ke ididia?