IBUOTIKỌ MAGAZINE EMI | NDI UFỌN OSỤK ODU NDIBỌN̄ AKAM?
Nso Isinam Mme Owo Ẹbọn̄ Akam?
“Mma nsibre mbre mfọniso etieti. Mma nsinyụn̄ mbọn̄ akam man ndia ediwak okụk, edi n̄kadiaha.”—Samuel, * Kenya.
“Ke ufọkn̄wed, ikesinyụn̄ ibọn̄ akam oro ẹkekpepde nnyịn imụm idọn̄ ke ibuot.”—Teresa, Philippines.
“Mmesibọn̄ akam ke ini nnyenede mfịna. Mmesidọhọ Abasi efen mme idiọkn̄kpọ mi onyụn̄ anam ndi eti Christian.”—Magdalene, Ghana.
Se Samuel, Teresa, ye Magdalene ẹtịn̄de owụt ke enyene nsio nsio ntak emi ẹsinamde mme owo ẹbọn̄ akam. Ndusụk owo ẹsibọn̄ akam ke ofụri esịt, ndusụk ẹbọn̄, edi esịt mmọ isịneke do. Edide mme owo ẹbọn̄ akam man ẹbe udomo ke ufọkn̄wed, m̀mê ẹbọn̄ man n̄ka mbre bọl emi mmọ ẹmade, ẹkan, m̀mê ẹbọn̄ ẹdọhọ Abasi an̄wam ubon mmọ, se idude edi ke ata ediwak owo ẹsibọn̄ akam. Ke nditịm ntịn̄, ndụn̄ọde oro ẹnamde owụt ke idem mbon oro mîsikaha ufọkabasi ẹsibọn̄ akam.
Ndi afo emesibọn̄ akam? Edieke edide emesibọn̄, esibọn̄ aban̄a nso? M̀mê emesibọn̄ akam m̀mê ubọn̄ke, omosụk ekeme ndibụp ete: ‘Ndi ufọn osụk odu ndibọn̄ akam? Ndi odu eke esikopde akam?’ Ewetn̄wed kiet ọkọdọhọ ke akam onyụn̄ etie nte ‘n̄kpọ emi owo anamde man okop idem inem.’ Ndusụk mme dọkta ẹsịn kpa ke uyo oro. Mmọ ẹdọhọ ke akam etie nte owo ndida ibọk man idem ọsọn̄ enye. Ndi akam edi n̄kpọ emi ẹsinyụn̄ ẹnamde man ẹkop idem inem?
Bible idọhọke ntre. Bible ọdọhọ ke enyene owo emi esikopde akam, ama akam edi ẹbọn̄ ke nnennen usụn̄ ẹnyụn̄ ẹben̄e nnennen n̄kpọ. Ndi oro edi akpanikọ? Ẹyak ise ise.
^ ikp. 3 Ẹkpụhọ ndusụk enyịn̄.
