IBUOTIKỌ MAGAZINE EMI | MMANIE ẸDI MME NTIENSE JEHOVAH?
Ntak Emi Nnyịn Isikwọrọde Ikọ?
Etie nte idụhe n̄kpọ en̄wen emi ẹdade ẹdiọn̄ọ nnyịn nte ukwọrọikọ nnyịn. Imesikwọrọ ikọ ke ufọk ke ufọk, ke mme ebiet emi mme owo ẹwakde, ye ke ebiet ekededi oro ikụtde owo. Ntak emi isinamde emi?
Mme Ntiense Jehovah ẹsikwọrọ ikọ man ẹnọ Abasi ubọn̄ ẹnyụn̄ ẹnam mme owo ẹfiọk enyịn̄ esie. (Mme Hebrew 13:15) Ntak en̄wen emi isikwọrọde ikọ edi man inam item Jesus Christ emi: “Ẹka ẹkenam mme owo ke kpukpru idụt ẹdi mbet mi, . . . ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.
Ntak en̄wen edi ke imama mbọhọidụn̄ nnyịn. (Matthew 22:39) Imọfiọk ke ediwak owo ẹnyene ufọkabasi mmọ ye nte ke idịghe kpukpru owo ẹdikpan̄ utọn̄ inọ nnyịn. Kpa ye oro, imenịm ke se Bible ekpepde ekeme ndinyan̄a owo. Oro anam ika iso “ndikpep nnyụn̄ ntan̄a eti mbụk aban̄ade Christ,” kpa nte akpa mme Christian ẹkenamde.—Utom 5:41, 42.
Ataifiọk emi ekerede Antonio Cova Maduro ama ewet aban̄a “nte Mme Ntiense Jehovah ẹsịnde ifịk ẹsinyụn̄ ẹwade idem . . . man ẹkụt ẹte ke ẹkwọrọ ikọ Abasi ke kpukpru ebiet ke isọn̄.”—N̄wedmbụk n̄kpọntịbe Venezuela emi ẹkotde El Universal
Ata ediwak mbon oro ẹsikotde n̄wed nnyịn idịghe Mme Ntiense Jehovah. Ediwak mbon oro ẹsinyụn̄ ẹkpepde Bible ye nnyịn ẹnyene ufọkabasi mmọ. Edi mmọ ẹsinem esịt ndikụt Mme Ntiense Jehovah ẹdide ufọk mmọ ẹdineme Ikọ Abasi.
Ekeme ndidi ke osụk enyenyene mme n̄kpọ en̄wen emi akpamade ndifiọk mban̄a Mme Ntiense Jehovah. Edieke edide ntre, mbọk
-
Bụp Mme Ntiense Jehovah.
-
Ka ikpehe Intanet nnyịn emi www.isa4310.com/efi.
-
Dụk mbono esop nnyịn; owo ekededi ekeme ndidụk, nnyịn isibọhọ owo okụk.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Ndi Mme Ntiense Jehovah Ẹkere ke Mmimọ Kpọt ke Ẹdinyan̄a
Bible etịn̄ mbon emi ẹdinyan̄ade.
MBỤME EMI ẸSIWAKDE NDIBỤP
Ndi Mme Ntiense Jehovah Ẹsima Mbon Ido Ukpono En̄wen?
Kot ibuotikọ emi man okụt nte ima anamde ẹdiọn̄ọ ata mme Christian.
