N̄kokpon ke Montreal. N̄kpọ ama ọsọn̄ etieti ke ebiet oro ikodụn̄de. Ke ini n̄kedide ọfiọn̄ itiokiet kpọt, ete mi ama akpa, ndien kpukpru n̄kpọ ke ufọk okodoro eka mi ke ibuot. Ete ye eka mi ẹkenyene nditọ itiaita ndien ami n̄kedi ekperedem.

Nte n̄kosụk n̄kponde owo, n̄kukụre se n̄kọdiọn̄ọde ekedi ndida n̄kpọsọn̄ ibọk, ndibre mbre mfọniso, ndinam afai, nnyụn̄ ndụk nsan̄a ye mme abiatibet. N̄kedi isua duop kpọt ini ntọn̄ọde ndisan̄a utom nnọ mme akpara ye mbon emi ẹsibuọtde owo okụk ẹbọ ikpọ udori. Mma nsisu nsu etieti, ekesinyụn̄ enenem mi ndibre mme owo utọtọ. Ekesesịne mi ke iyịp.

Etisịm ini ndide isua 14, mma ndọdiọn̄ọ nsio nsio usụn̄ ndida mbian̄a mme owo. Ke uwụtn̄kpọ, mma nsidep ediwak n̄kanika ubọk, okpohoubọk, ye n̄kpanuen emi mîdịghe ata gold, nnyụn̄ n̄wet ke idem mmọ ke ẹdi ata gold. Ekem nda mmọ n̄kanyam ke efak ye ke mme itie unịm moto ke ikpọ ufọkurua. Ekesinenem mi ndidia owo. Enyene usen emi n̄kakam ndiade $10,000 (₦1,570,000)!

Ke ini n̄kedide isua 15, ẹma ẹbịn mi ke itie emi ẹsinamde ndiọi nditọwọn̄ ẹkpụhọde; ntre n̄kenyeneke ebiet emi n̄kpodụn̄de. N̄kesina ke efak, ke itie unịm moto, m̀mê ke ufọk mme ufan mi.

Sia n̄kesisan̄ade mbre mme owo utọtọ, mme bodisi ikesiyakke mbọ emem. Owo ikesịnke mi ke ufọk-n̄kpọkọbi sia n̄kesiyịpke-yịp n̄kpọ nnyam. Edi mma nsikpe ediwak okụk nnyan̄a idem ke ntak oro n̄kesisan̄ade mbian̄a mme owo nnyụn̄ nnyamde n̄kpọ ke ini ukara mînyịmeke nnyam. Sia mmen̄kesifeheke owo enyịn, mma nsisan̄a mbọ okụk nnọ mbon emi ẹsibuọtde owo okụk ẹbọ ikpọ udori. Ata idiọk utom ekedi oro, ntre mma nsikama ikan̄ ndusụk ini. Mma nsitiene mme abiatibet ndusụk ini n̄wọrọ.

N̄kedi isua 17 akpa ini oro n̄kokopde n̄kpọ mban̄a Bible. N̄kodụn̄ ye ufan mi an̄wan ke ini enye ọkọtọn̄ọde ndikpep Bible ye Mme Ntiense Jehovah. Edi n̄kamaha nte Bible ọdọhọde ẹdu uwem, ntre mma n̄kpọn̄ enye n̄kodụn̄ ye eyenan̄wan en̄wen emi ekedide ufan mi n̄ko.

Uwem mi okokpụhọde ke ini eyenan̄wan emi n̄ko ọkọtọn̄ọde ndikpep Bible ye Mme Ntiense Jehovah! Ama enem mi ndikụt nte enye ọtọn̄ọde nditie emem emem onyụn̄ enyenede ime. Ẹma ẹdọhọ ntiene ndi mbono esop ke Ufọkmbono Obio Ubọn̄ Mme Ntiense Jehovah, ndien mma nnyịme. Ẹma ẹnen̄ede ẹdara mi ke ini nsịmde do. Mme Ntiense ẹfọn ido ẹnyụn̄ ẹdu eti uwem. Eketie nte ndu ke ererimbot en̄wen! Ubon nnyịn ikamaha mi; n̄kekwe eke amade mi ata ima ke ini eyenọwọn̄. Ima oro n̄kokụtde ke otu Mme Ntiense Jehovah ekedi se n̄koyomde-yom ke ediwak isua. Ke ini Mme Ntiense ẹkebụpde m̀mê n̄kpama ndikpep Bible, mma nsọsọp nnyịme.

Se n̄kekpepde ke Bible ama anam mbọhọ n̄kpa. Ami ye ufan mi iba ima idiomi ndikama ikan̄ n̄ka inọ. N̄koyom ndinyene okụk nsio isọn oro n̄kakamade ke ntak mbre mfọniso; isọn mi ama ebe $50,000 (₦8,350,000). Esịt enem mi ke n̄ketieneke n̄ka! Edi mme ufan mi oro ẹma ẹka. Ẹma ẹmụm owo mmọ kiet, ẹwowot enye eken.

Nte n̄kakade iso n̄kpep Bible, mma ndikụt ke enyene ediwak n̄kpọ emi anade n̄kpụhọde ke uwem mi. Ke uwụtn̄kpọ, mma n̄kpep se Bible ọdọhọde ke 1 Corinth 6:10: “Mme inọ, mbon idiọkitọn̄, mme akpammịn, mme osụn̄i isụn̄i, ye mbon n̄kanubọk ididaha obio ubọn̄ Abasi inyene.” Ke mma n̄kokot itien̄wed oro, mmọn̄eyet ama asiaha mi ke enyịn sia mma nsinam ediwak se itien̄wed oro etịn̄de. Mma n̄kụt ke ana n̄kpụhọde ofụri ofụri. (Rome 12:2) N̄kesitie ikọ ikọ, nsiduọ obom, nnyụn̄ nsu nsu n̄kan̄ n̄kpọ en̄wen.

Edi mma n̄kpep n̄ko ke Bible nte ke Jehovah esitua owo mbọm onyụn̄ efen ọnọ owo. (Isaiah 1:18) Mma nnen̄ede mbọn̄ akam n̄kpe Jehovah ubọk nte an̄wam mi ntre ndiọi n̄kpọ oro n̄kesinamde. Jehovah ama an̄wam mi n̄kpụhọde. Akpan n̄kpọ kiet oro n̄kanamde ekedi ndisịn ndọ nnyịn ke n̄wed.

N̄kedi isua 24 ini oro nnyụn̄ nnyene nditọ ita. Akana nyom eti utom nnam ndien. N̄kenen̄ekede n̄ka n̄wed, n̄konyụn̄ nnyeneke n̄weditoro. Mma mfiak nnen̄ede mbọn̄ akam nnọ Jehovah. Ekem mma n̄wọrọ n̄koyom utom. Mma nsidọhọ mbon oro ẹkeyomde ndida mi ke utom ke nyom ndikpụhọde nte n̄kesidude uwem nnyụn̄ ntọn̄ọ nnam eti utom. Ndusụk ini, mma nsidọhọ mmọ ke n̄kpep Bible, ke nyom ndidi eti owo. Mmọ ikosụk imaha ndida mi. Ke akpatre, ke mma n̄ketịn̄ nte n̄kodude uwem nnọ owo en̄wen emi ekenemede nneme ye ami ese m̀mê edi se ikpadade mi ke utom, enye ama ọdọhọ ete: “Ndiọn̄ọke se idide ntak, edi esịt mi osụk ọdọhọ nda fi.” Mma nnịm ke Abasi ọkọbọrọ akam mi. Nte ini akade, ami ye n̄wan mi ima ina baptism inyụn̄ ikabade idi Mme Ntiense Jehovah.

Ndinam item Bible nnyụn̄ ndu uwem nte Christian anam ndu uwem tutu emi. Mmenyene ubon idemmi idahaemi, ndien ubon mi enem etieti. Esịt ifịnake mi aba sia nnịmde ke Jehovah efen ọnọ mi.

Ke isua 14 emi ẹbede, nsida n̄kpọ nte hour 70 n̄kwọrọ ikọ kpukpru ọfiọn̄ man n̄n̄wam mme owo ẹfiọk se Bible ekpepde. Ke ndondo emi, n̄wan mi etiene mi anam utom emi n̄ko. Ke isua 30 emi ẹbede, mman̄wam owo 22 ke itieutom mi ẹtọn̄ọ ndikpono Jehovah; esịt enem mi n̄kwe kan̄a. Nsụk n̄kaka ikpọ ufọkurua, edi nsikaha ndibre mme owo utọtọ nte n̄kesinamde. Nsika ndikwọrọ ikọ nnọ mmọ. Nyom mmọ ẹnyene idotenyịn ke obufa ererimbot emi edidide, emi mme utọtọ ye mbon abian̄a mîdidụhe aba.—Psalm 37:10, 11.