Ke ini okopde ikọ emi “Utịt ekpere,” nso ke esikere? Ndi esikere aban̄a pastọ emi akamade Bible ada ke iso ufọkabasi osio ofụri odudu esie ọkwọrọ utịt ererimbot? Mîdịghe ndi esikere aban̄a owo emi esịnede nduọ-nduọ ọfọn̄ amia n̄kanika asan̄a ke efak ọdọhọ ke utịt ekpere? Mme n̄kpọ ntem ẹsifịna ndusụk owo. Edi ndusụk owo inịmke-nịm utọ n̄kpọ oro ke akpanikọ, ndien mbon en̄wen ẹda enye nte n̄kpọ mbubru.

Bible ọdọhọ ke ‘utịt eyedi.’ (Matthew 24:14) Utịt emi ke Bible okot n̄ko “akwa usen Abasi” ye “Armageddon.” (Ediyarade 16:14, 16) Imọfiọk ke nsio nsio owo ye ufọkabasi ẹtịn̄ nsio nsio n̄kpọ ẹban̄a utịt ererimbot. Ndusụk se ẹtịn̄de esinam owo ndịk, ndusụk akam akpakpa owo idem. Edi Bible etịn̄ se utịt ererimbot edide ye se enye mîdịghe. Bible n̄ko an̄wam nnyịn ifiọk m̀mê utịt ekpere. Se ifọnde ikan edi ke enye ekpep nnyịn se anade inam man ibọhọ. Akpa kan̄a, yak ineme ndusụk se mme owo ẹtịn̄de ẹban̄a utịt ererimbot, emi mîdịghe akpanikọ, ndien ekem itịn̄ se utịt edide nte Bible ọdọhọde.

1. UTỊT IDỊGHE IKAN̄ NDITA OFỤRI ISỌN̄.

   Bible ọdọhọ ete: “[Abasi] owụk isọn̄ ke itie esie; idisehekede tutu amama, m̀mê ke nsinsi.” (Psalm 104:5) Itien̄wed emi ye mme itien̄wed en̄wen ẹnam ifiọk ke Abasi idisoboke isọn̄ emi idinyụn̄ iyakke mme owo ẹsobo enye tutu amama!—Ecclesiastes 1:4; Isaiah 45:18.

2. UTỊT IDỊGHE N̄KPỌ EMI EDITỊBEDE INI EKEDEDI.

   Bible owụt ke Abasi enịm ini emi utịt edidide; edidi ke edikem ini esie. Enye ọdọhọ ete: “Baba owo kiet ifiọkke usen m̀mê hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete. Ẹka iso ẹse, ẹdu ke edidemede, koro mbufo mîfiọkke edikem ini.” (Mark 13:32, 33) Omokụt do ke utịt edidi ke “edikem ini” Abasi.

3. UTỊT IDỊGHE N̄KPỌ EMI MME OWO ẸDIDADE ẸDI INYỤN̄ IDỊGHE N̄KPỌ EDITO ENYỌN̄ IDISOBO ISỌN̄ EMI.

   Nso idida utịt idi? Ediyarade 19:11 ọdọhọ ete: “Ekem n̄kụt nte ẹbererede heaven, ndien, sese! afia enan̄-mbakara. Ndien andidoro enye ke edem ekere Anam-Akpanikọ ye Akpanikọ.” Ufan̄ikọ 19 aka iso ete: “Ndien n̄kụt idiọk unam ye ndidem isọn̄ ye udịmekọn̄ mmọ ẹsopde idem ọtọkiet ẹte in̄wana ekọn̄ ye andidoro ke edem enan̄-mbakara ye udịmekọn̄ esie.” (Ediyarade 19:11-21) Okposụkedi ediwak n̄kpọ oro ẹtịn̄de mi ẹdade ẹban̄a n̄kpọ, itien̄wed emi anam ifiọk ke Abasi edidọn̄ mme angel esie ẹdisobo mme asua esie.

1. UTỊT UKARA OWO.

   Bible ọdọhọ ete: “Abasi enyọn̄ oyowụk obio ubọn̄ [ukara] eke owo mîdisoboke ifep tutu amama.  Ndien idikpọn̄ke obio ubọn̄ oro inọ mbio efen. Enye ayanuak onyụn̄ osobo kpukpru mme obio ubọn̄ emi, ndien enye ayada ke nsinsi.” (Daniel 2:44) Nte ima iketetịn̄, ẹyesobo “ndidem isọn̄ ye udịmekọn̄ mmọ” emi ẹdisopde “idem ọtọkiet ẹte in̄wana ekọn̄ ye andidoro ke edem enan̄-mbakara ye udịmekọn̄ esie.”—Ediyarade 19:19..

2. UTỊT EKỌN̄, AFAI, UFỊK, YE UTỤK.

   “[Abasi] amanam ekọn̄ etre tutu esịm utịt isọn̄.” (Psalm 46:9) “Ndinen owo ẹyedụn̄ ke isọn̄, mmọ eke mînyeneke nduduọhọ ẹyenyụn̄ ẹsụhọ ke esịt. Edi ẹyesobo mme idiọkowo ẹfep ke isọn̄; ndien amaedi mbon abian̄a, ẹyesọhi mmọ ẹfep ke esịt.” (Mme N̄ke 2:21, 22) “Sese! Mmanam kpukpru n̄kpọ ẹdi mbufa.”—Ediyarade 21:4, 5..

3. UTỊT UFỌKABASI EMI ẸKPEPDE MME OWO NSU MÎNYỤN̄ INAMKE SE ABASI ỌDỌHỌDE.

   “Mme prọfet ẹmetịn̄ ntịn̄nnịm ikọ ke nsu; ndien amaedi mme oku, mmọ ẹmewọrọ ẹkekan nte odudu mmọ edide. . . . Mbufo ẹdinyụn̄ ẹnam didie ke utịt esie?” (Jeremiah 5:31) “Ediwak owo ẹyedọhọ mi ke usen oro ẹte, ‘Ọbọn̄, Ọbọn̄, nte nnyịn iketịn̄ke nte prọfet ke enyịn̄ fo, inyụn̄ idaha enyịn̄ fo ibịn mme demon, inyụn̄ idaha enyịn̄ fo inam ediwak utom odudu?’ Ndien adan̄aoro nyọdọhọ mmọ nte: ‘Akananam ndiọn̄ọke mbufo! Ẹdian̄ade mi ke idem, mbufo mme abiatibet.’”—Matthew 7:21-23..

4. UTỊT MBON ORO ẸNAMDE ERERIMBOT ỌDIỌK NTEM.

   Jesus Christ ọkọdọhọ ete: “Se ẹdade ẹbiere ikpe edi emi, nte ke un̄wana ama edi ke ererimbot edi mme owo ẹma ekịm utu ke un̄wana, koro mme utom mmọ ẹdiọkde.” (John 3:19) Bible etịn̄ aban̄a ini emi Abasi okosobode ofụri ererimbot ke eyo Noah. “[Ẹma] ẹsobo ererimbot emi okodude adan̄aoro ke ini ẹkedade ukwọ ẹfụk enye. Edi ẹda ukem ikọ emi ẹmụm enyọn̄ ye isọn̄ emi ẹdude ke emi ẹnịm ẹnọ ikan̄ ẹnyụn̄ ẹnịm ẹnọ usen ubiereikpe ye usen emi edisobode mmọ eke mîten̄eke Abasi.”—2 Peter 3:5-7.

Itien̄wed oro emen ‘usen ubiereikpe ye usen nsobo’ oro edide ke iso odomo ye nsobo “ererimbot” eyo Noah. Ewe “ererimbot” ke ẹkesobo? Owo ikosoboke isọn̄ nnyịn emi, edi ẹkesobo “mmọ eke mîten̄eke Abasi,” oro edi, mme asua Abasi. Ntre, ke “usen ubiereikpe” emi edide ke iso, mme asua Abasi ke ẹdisobo, owo idisoboke mme ufan Abasi, kpa nte owo mîkosoboke Noah ye ubon esie.—Matthew 24:37-42.

Kere nte uwem edinemde ke isọn̄ emi ke Abasi ama okosobo kpukpru mme idiọkowo efep! Omokụt do ke se Bible etịn̄de aban̄a utịt idịghe idiọk mbụk, akam edi eti mbụk. Edi afo omosụk ekeme ndikere: ‘Ndi Bible etịn̄ ini emi utịt edidide? Okûdi utịt ekpere? Nso ke n̄kpanam man mbọhọ?’