N̄kamana ke Bilbao ke Spain. Nnyịn idi iban inan̄ ndien ami ndi udun̄wan. Nnyịn ikenyeneke n̄kpọ ikonyụn̄ idịghe ubuene. Sia ikedide mbon Catholic, n̄kesidụk ederi Udia Ọbọn̄ kpukpru usen. N̄kedi isua 23 ke ini ntọn̄ọde ndikpep n̄wed. Mma nnam utom emi nnyụn̄ n̄kop inem utom emi ke ofuri isua 40. Mma nsikpep ediwak n̄kpọ, edi se ikenemde mi ikan ekedi ndikpep nditọwọn̄ mban̄a ufọkabasi Catholic. Mbubreyo ke n̄kesida nnọ nditọiban item mbemiso mmọ ẹdiade Udia Ọbọn̄.

Mma ndọ ebe, ndien ndọ nnyịn ama enem etieti. Edi ebe mi ama akpa ọkpọn̄ mi ye nditọiban inan̄ ke ima ikọdọ ndọ isua 12. N̄kedi isua 33 kpọt ini oro! Ukpepn̄kpọ Ufọkabasi Catholic ikọdọn̄ke mi esịt. Ke uwụtn̄kpọ, mma nsikere m̀mê nso inam mme owo ẹsụk ẹkpa edieke edide Christ ama afak nnyịn. M̀mê nso inam isibọn̄ akam idọhọ Obio Ubọn̄ Abasi edi edieke edide nti owo ẹdika heaven. Enyene mbụme en̄wen emi akafịnade mi akan: ‘Edieke Abasi esibierede ikpe ọnọ owo ke ini owo akpade, ntak emi ẹdọhọde ke iyọkpọn̄ heaven, m̀mê purgatory, m̀mê hell ifiak ikada ke iso ikpe Abasi?’

Mma mbụp ndusụk mme oku nnyịn mbụme emi. Oku kiet ọkọdọhọ mi ete: “Ndiọn̄ọke. Ka kobụp bishop. Nso inam utọ n̄kpọ emi afịna fi? N̄kọ ọmọbuọt idem ke Abasi? Sion̄o idem kpọn̄ n̄kpọ emi!” Nte ini akade, mma ndụk ederi mbon Jesuit, Pentecostal ye mbon Gnostic. Edi idụhe eke ọkọnọde mi nnennen ibọrọ.

Ke mma n̄kebe isua 60, eyen isua itiaba emi n̄kekpepde n̄wed ama ọdọhọ ndi Ikọ Abasi Mme Ntiense Jehovah. Mma n̄ka, ndien se n̄kokụtde nnyụn̄ n̄kopde ama enem mi. Edi n̄kafiakke nsobo ye Mme Ntiense Jehovah sia n̄kesinyeneke ini. Ke isua iba ama ekebe, Juan ye Maite emi ẹdide Mme Ntiense Jehovah ẹma ẹwaha edem mi. Ke ofụri ọfiọn̄ ita, ebe ye n̄wan emi ẹma ẹsibọrọ mme mbụme mi, ekem ẹtọn̄ọ ndikpep mi Bible.

 N̄kesitetie mbet mmọ ẹdikpep mi Bible! N̄kesikama Bible ita man nse m̀mê se Mme Ntiense Jehovah ẹkpepde edi akpanikọ. Ikebịghike, mma ndikụt ke ediwak n̄kpọ emi n̄kekpepde ke ufọkabasi ikan̄wan̄ake mi. Se ẹkekpepde mi ke Ufọkabasi ikedịghe ukem ye se ẹkedade Bible ẹkpep mi. Eketie nte n̄kpọ eke ẹdian̄arede mi n̄kpan̄ ke enyịn.

Ekem, ọyọhọ owo iba emi n̄kọdọde ama ọdọn̄ọ onyụn̄ akpa. Mma n̄kpọn̄ utom nnyụn̄ n̄kpọn̄ obio Bilbao kan̄a. Juan ye Maite ẹma ẹwọrọ idụn̄ n̄ko. Mma ntre ndikpep Bible ye Mme Ntiense. Edi n̄kefreke ke se mmọ ẹkedade Bible ẹkpep mi edi akpanikọ.

Ke isua 20 ama ekebe, Juan ye Maite ẹma ẹfiak ẹdi Bilbao ẹnyụn̄ ẹdi ẹdise mi. N̄kedi isua 82 ini oro. Esịt ama enem mi etieti ndifiak n̄kụt mmọ! Mma nnen̄ede n̄kụt ke Jehovah ifreke mi. Mma mfiak ntọn̄ọ ndikpep Bible. Juan ye Maite ẹma ẹnyene ime, ẹnyụn̄ ẹbọrọ mme mbụme mi, ifịnake idem nte n̄kesibụpde mbụme kiet ediwak ini. Ikememke mi ndifre se ẹkekpepde mi ke Ufọkabasi. Emi ekesinam mbụp mbụme ndien ndien man n̄kop nte ẹdade Bible ẹwụt ke mme n̄kpọ emi ikenenke. N̄konyụn̄ nyom ndinam ikọtufọk mi ye mme ufan mi ẹfiọk se Bible ekpepde.

N̄kana baptism ke mbono Mme Ntiense Jehovah ke ini ndide isua 87. Usen oro ke esịt ekenem mi akan. Ebiowo akada Bible etịn̄ ikọ ọnọ mbon oro ẹkeyomde ndina baptism. Ikọ esie ama anam mmọn̄eyet asiaha mi ke enyịn. Mma nnen̄ede n̄kpan̄ utọn̄ nte n̄kpọ eke Jehovah eketịn̄de ikọ emi ọnọ mi. Ke mma n̄kana baptism, ndusụk Mme Ntiense ẹma ẹdi ẹdikọm mi okposụkedi emi ata ediwak mmọ mîkọdiọn̄ọke mi!

Mma ndiọn̄ọ ke Jesus Christ edi “usụn̄.” (John 14:6) Edi ndikpep Bible ama anam ndiọn̄ọ Jehovah n̄ko. Idahaemi mmesibọn̄ akam nnọ Abasi nte edima Ete ye Ufan mi. Mma n̄kot n̄wed San̄a Kpere Jehovah * ndien se n̄kokotde ama okpụhọde uwem mi. Akpa ini emi n̄kokotde n̄wed emi, n̄kokụre enye okoneyo kiet. Mma n̄kụt ke Jehovah esinen̄ede atua owo mbọm.

Ofụri anyan ini emi n̄kadade nyom akpanikọ anam nnịm ikọ Jesus emi: “Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo.” (Matthew 7:7) Idahaemi mma n̄kokụt akpanikọ mi, esịt esinem mi ndinam mbon en̄wen ẹfiọk akpanikọ.

Ndi isua 90 idahaemi, edi ke nnyenyene ediwak n̄kpọ ndikpep mban̄a Jehovah. Esinem mi ndika Ufọkmbono Obio Ubọn̄, sia mi ke nsikpep Ikọ Abasi nnyụn̄ n̄kụt ndima nditọete mi. Ke ntie mbet ini emi ndikpepde mme owo n̄kpọ ke Paradise. (Ediyarade 21:3, 4) Ke mbet n̄ko ndikụt nte mbon nnyịn emi ẹkekpade ẹsetde ẹdidu uwem, ndien nyekpep mmọ Bible. (Utom 24:15) Enen̄ede ọdọn̄ mi ndinam mmọ ẹfiọk se Jehovah akanamde ọnọ mi ke eyo usọn̄!