Edieke mme aka ufọkabasi ẹnamde n̄kpọ emi mûkekereke ke nditọ Abasi ẹkpenam, afo emekeme ndikere ke idụhe ufọkabasi emi ọfọnde. Edi iyom ndinam fi ọfiọk ke enyene ufọkabasi emi ọfọnde. Ke ini Jesus okodude ke isọn̄, enye ama obon mbon oro ẹmade akpanikọ ọtọkiet onyụn̄ ekpep mmọ ndida Ikọ Abasi ndu uwem. Ata mme anditiene Christ—oro edi, mbon oro ẹsịnde idem ẹdu uwem nte Bible etemede—ke ẹdodu. M̀mọ̀n̄ ke afo ekeme ndikụt mmọ?

Estelle emi iketịn̄de iban̄a ọdọhọ ete: “N̄kọtọn̄ọ ndidiọn̄ọ Bible ke ini Mme Ntiense Jehovah ẹkekpepde mi Bible. Ikebịghike, se Jesus eketịn̄de ke John 8:32 ama edin̄wan̄a mi. Enye ọkọdọhọ ete: ‘Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.’”

Ray emi iketịn̄de iban̄a n̄ko ọdọhọ ete: “Ke mma n̄kọtọn̄ọ ndikpep Bible ye Mme Ntiense Jehovah, mma ndifiọk ke idịghe Abasi anam owo ọbọ ufen ke ererimbot emi. Esịt ama enem mi ndifiọk ke Abasi enyene eti ntak emi anamde enye ayak mme owo ẹbọ ufen, ye nte ke enye ọn̄wọn̄ọ ndisọsọp ntre ufen ke ererimbot emi.”

Imọfiọk ke imemke ndidu eti uwem ke idiọk ererimbot emi. Edi emi iwọrọke ke nnyịn ikemeke ndidu eti uwem. Ediwak owo ẹyom ẹn̄wam mmimọ ifiọk se Bible ekpepde man ikeme ndida Ikọ Abasi ndu uwem. Ntak edi oro Mme Ntiense Jehovah ẹsikade ufọk ata ediwak miliọn owo ke ofụri ererimbot ẹkekpep mmọ Bible ke mfọn. Kpukpru urua, ata ediwak owo ke ẹkpep se Bible enen̄erede ekpep. Emi anam mmọ ẹsan̄a ẹkpere Abasi ẹnyụn̄ ẹkop inem uwem. *

Ini ekededi emi okụtde Mme Ntiense Jehovah, dọhọ mmọ ẹtịn̄ ntak emi mmọ ẹkerede ke ido ukpono mmimọ ọfọn. Dụn̄ọde se mmọ ẹkpepde ye se mmọ ẹnamde. Ekem biere ke idemfo m̀mê ewe ufọkabasi ọfọn.