Udia-Inọ Eyetre!

“Dori enyịn ke Jehovah nyụn̄ tiene usụn̄ esie . . . Ke ini ẹsobode mme idiọkowo ẹfep, afo oyokụt.”​—PSALM 37:34.

NDI emetiene ekere ke owo iditreke udia-inọ tutu amama? An̄wan̄a owo ntak emi ekerede ntre. Mme owo ẹdomo nsio nsio orụk ukara ẹse ke ata ediwak isua idahaemi. Edi idụhe ukara ndomokiet emi ekemede nditre udia-inọ. Ndi ini oyodu emi kpukpru owo ẹdinamde akpanikọ ye kiet eken?

Bible ọdọhọ ke utọ ini oro oyodu! Enye ọdọhọ ke Abasi ọmọn̄ etetre kpukpru udia-inọ ke ererimbot emi. Didie ke enye edinam emi? Abasi edida Obio Ubọn̄ esie inam emi. Obio Ubọn̄ emi edi ukara esie eke heaven, enye edinam isọn̄ emi ọfọn. Ukara emi ke Jesus ekekpep nnyịn ete ibọn̄ akam iben̄e. Jesus ọkọdọhọ ke Akam Ọbọn̄ m̀mê Ete Nnyịn ete: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:10, Edisana Ŋwed Abasi Ibom.

 Bible etịn̄ se Jesus Christ emi edide Edidem Obio Ubọn̄ emi edinamde ete: “Enye ayanyan̄a ubuene emi esemede oyom un̄wam, ye owo ukụt ye owo ekededi emi mînyeneke andin̄wam. Enye ayatua usụhọde owo ye ubuene mbọm, oyonyụn̄ anyan̄a ukpọn̄ mme ubuene. Enye ayafak ukpọn̄ mmọ osio ke ufịk ye afai.” (Psalm 72:12-14) Omokụt ke itien̄wed oro ọdọhọ ke mbọm mbon oro ẹfịkde ananam Jesus, ndien ke enye ayanam n̄kpọ man osio mmọ ke ufịk. Ndi oro idọn̄ke fi esịt?

Obio Ubọn̄ Abasi eyetre kpukpru udia-inọ ke isọn̄ emi sia Andikara Obio Ubọn̄ emi enen̄ede enyene odudu. Didie ke enye edinam emi? Edi ke ndisio n̄kpọ ita emi ẹsinamde mme owo ẹdia inọ.

Ẹyesio Idiọkn̄kpọ Ẹfep

Kan̄a ke emi, ana ika iso in̄wana ye idiọkn̄kpọ oro ikadade-da imana, emi esinamde nnyịn iyom ufọn idem nnyịn kpọt. (Rome 7:21-23) Edi nti owo ẹsụk ẹdodu ke isọn̄ emi, emi ẹyomde ndinam se ifọnde. Mmọ ẹbuọt idem ke ufak oro iyịp Jesus ọnọde, ndien emi anam Abasi efen idiọkn̄kpọ mmọ. * (1 John 1:7, 9) Utọ mbon emi ke Abasi ama, nte isikotde ke John 3:16 ite: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”

Abasi ayanam ata utịben̄kpọ ọnọ mbon emi ẹbuọtde idem ye enye. Ke obufa ererimbot emi enye ọn̄wọn̄ọde, enye oyosio kpukpru idiọkn̄kpọ tutu kpukpru mbon oro ẹbuọtde idem ye enye ẹfọn ẹma. (Isaiah 26:9; 2 Peter 3:13) Idiọkn̄kpọ idifiakke inam mme owo ẹdia inọ aba tutu amama. Abasi ayanam kpukpru mbon oro ẹbuọtde idem ye enye “ẹbọhọ ufụn” idiọkn̄kpọ.—Rome 8:20-22.

Ẹyesobo Idiọk Ererimbot Emi Ẹfep

Mfịn, ediwak owo ẹsikokoi ẹtụk mbon en̄wen. Mmọ ẹsiwak nditụk mme ubuene ye mbon oro mînyeneke owo. Ke ini mbon en̄wen ẹkụtde emi, mmọ ẹsitiene ẹtụk mme owo n̄ko. Bible ọdọhọ mme abak-ibak emi ete: “Yak idiọkowo ọkpọn̄ usụn̄ esie, owo ibak onyụn̄ ọkpọn̄ mme ekikere esie.” Edieke mmọ ẹkabarede esịt, Bible ọdọhọ ke Abasi “eyefen [ọnọ mmọ] ke akamba usụn̄.”—Isaiah 55:7.

Edi edieke mmọ mîkabakede esịt, Abasi oyosobo mmọ. Bible ọdọhọ ke Abasi ayada Obio Ubọn̄ esie osu un̄wọn̄ọ esie emi: “Dori enyịn ke Jehovah nyụn̄ tiene usụn̄ esie . . . Ke ini ẹsobode mme idiọkowo ẹfep, afo oyokụt.” * (Psalm 37:34) Ke ini ẹdisobode mme anamidiọk oro mîmaha ndikabade esịt, mbon emi ẹmade Abasi idibọhọ aba ufen ke ubọk mme adia-inọ.

Ẹyesobo Satan kpa Devil Ẹfep

Satan kpa Devil edi akakan anamidiọk emi mîkemeke ndikabade esịt. Edi esịt enem nnyịn nte ke Jehovah ọmọn̄ ọbọbọ enye odudu man enye okûnam mme owo ẹdia inọ aba. Ekem Abasi oyosobo enye efep. Tutu amama, mbuka mbuka owo ubi emi idikemeke ndinam mme owo ẹdia inọ aba.

Edi ndusụk owo ẹkeme ndikere ke Abasi idinamke kpukpru se inemede emi. Afo n̄ko emekeme ndikere m̀mê enye akam enyene odudu ekem ndinam emi. Edieke edide enyene, ntak emi enye mînamke tutu emi? Eti mbụme edi oro, ndien Bible ọbọrọ mbụme emi. * Imesịn udọn̄ inọ fi ite odụn̄ọde Bible man okụt nte uwem editiede ke ini idiọkn̄kpọ ye udia-inọ mîdidụhe aba ke nsinsi.

[Mme Ikọ Idakisọn̄]